ఉచిత స్కూటీ ఇస్తామంటూ మోసం.. కేంద్రం స్పష్టికరణ.. వైరల్ పోస్టులన్నీ ఫేక్!

సోషల్ మీడియాలో “ప్రధానమంత్రి ఫ్రీ స్కూటీ యోజన” పేరుతో గత కొన్ని రోజులుగా తీవ్రంగా వైరల్ అవుతున్న ప్రకటనలు పూర్తిగా తప్పుడు వార్తలేనని కేంద్ర ప్రభుత్వం అధికారికంగా ఖండించింది. కాలేజీ విద్యార్థినులకు ఉచితంగా స్కూటీలు అందజేస్తామంటూ ఫేస్‌బుక్, వాట్సాప్, ఇన్‌స్టాగ్రామ్‌లలో షేరవుతున్న పోస్టులు, గ్రాఫిక్స్, దరఖాస్తు లింకులు అన్నీ నకిలీవేనని ప్రెస్ ఇన్ఫర్మేషన్ బ్యూరో (PIB) ఫ్యాక్ట్ చెక్ ధృవీకరించింది.
ఈ మోసపూరిత ప్రచారంలో కొన్ని పోస్టులు ప్రధానమంత్రి కార్యాలయం లోగో, భారత ప్రభుత్వ గుర్తులను దుర్వినియోగం చేస్తూ యువతులను ఆకర్షిస్తున్నాయి. విద్యార్థినుల వివరాలు సేకరించి, ఆ తర్వాత “రిజిస్ట్రేషన్ ఫీజు” లేదా “డెలివరీ చార్జెస్” పేరుతో డబ్బు కట్టమని మోసం చేసే అవకాశం ఉందని అధికారులు హెచ్చరిస్తున్నారు. ఇప్పటికే దేశంలోని పలు రాష్ట్రాల్లో ఈ లింకుల ద్వారా జరిగిన సైబర్ మోసాల ఫిర్యాదులు నమోదయ్యాయి.
ప్రస్తుతం కేంద్ర ప్రభుత్వం నుంచి కాలేజీ విద్యార్థినులకు ఉచిత స్కూటీలు అందించే ఎలాంటి కేంద్రీయ యోజన లేదని PIB స్పష్టంగా ప్రకటించింది. ఇలాంటి ఫేక్ ప్రకటనలు గుర్తించిన వెంటనే సమాచారం షేరు చేయకుండా, అధికారిక వెబ్‌సైట్లు లేదా ప్రభుత్వ హ్యాండిల్స్‌ను మాత్రమే నమ్మాలని సూచించింది.
ప్రజలు ఎలాంటి ఆఫర్ వచ్చినా ముందు ఆచితూచి వ్యవహరించాలని, అనుమానం కలిగితే PIB Fact Check ట్విట్టర్ హ్యాండిల్ @PIBFactCheck లేదా factcheck.pib.gov.inలో సమాచారం పరిశీలించుకోవాలని కేంద్రం కోరింది. మోసపూరిత లింకులను క్లిక్ చేయడం, వ్యక్తిగత వివరాలు షేరు చేయడం పూర్తిగా మానేయాలని హెచ్చరించింది. ఈ విషయంలో అప్రమత్తత చాలా ముఖ్యమని నొక్కి చెప్పింది.