పెట్రోల్ పోయించకపోయినా ,,,,పెట్రోల్ బంకుల్లో ఈ సర్వీస్ ఫ్రీ

మనలో చాలా మందికి ద్విచక్ర వాహనాలు, కార్లు ఉంటాయి. ప్రతి రోజూ కాకపోయినా.. అప్పడప్పుడైనా పెట్రోల్ బంకులకు వెళ్తుంటాం. అయితే పెట్రోల్ బంకుల వద్ద ఉచితంగా అందించే సౌకర్యాల గురించి మనలో ఎంతమందికి అవగాహన ఉంది అంటే.. సమాధానం కష్టమే. ఎందుకంటే పెట్రోల్ బంకులోకి వెళ్లామా.. పెట్రోల్ కొట్టించుకున్నామా.. వచ్చేశామా ఇలాగే ఉంటుంది వ్యవహారం. కానీ అక్కడ ఎలాంటి సౌకర్యాలు ఉన్నాయి.. అందులో మనకు ఉపయోగపడేవి ఏవి.. ఏయే సర్వీసులు ఉచితంగా అందిస్తారనే దానిపై కనీస అవగాహన చాలా మందికి ఉండదు. ఈ విషయాన్ని గ్రహించి పెట్రోల్ బంక్ నిర్వాహకులు కూడా సౌకర్యాలు కల్పించకుండా లైట్ తీసుకుంటూ ఉంటారు. ఈ నేపథ్యంలో పెట్రోల్ బంకుల్లో కల్పించాల్సిన కనీస సౌకర్యాలు, ఉచితంగా అందించే సేవల గురించి ఇప్పుడు తెలుసుకుందాం.

పెట్రోల్ బంకులలో ఎయిర్ ఫిల్లింగ్ మెషీన్ తప్పనిసరిగా ఉండాలి. ఈ మెషీన్ ద్వారా వాహనదారుల వాహనాల్లో ఉచితంగా గాలిని నింపాల్సి ఉంటుంది. ఎలాంటి డబ్బులు వసూలు చేయకూడదు. అలాగే గాలి నింపేందుకు ప్రత్యేకంగా ఓ వ్యక్తిని నియమించాల్సి ఉంటుంది. ఇక్కడ మరో ముఖ్యమైన విషయం ఏమిటంటే.. పెట్రోల్ బంకులో పెట్రోల్ పోయించుకున్నవారికే కాదు.. ఏ వాహనానికైనా ఉచితంగా గాలిని నింపాల్సి ఉంటుంది. ఈ విషయాన్ని నిబంధనలు వెల్లడిస్తున్నాయి. ఇక పెట్రోల్ బంకుల్లో ఫోన్ సౌకర్యం అందుబాటులో ఉంచాలి. ప్రమాదాలు, అత్యవసర సమయాల్లో సమాచారాన్ని చేరవేసేందుకు ఫోన్ సౌకర్యం అందుబాటులో ఉంచాలి.

వీటితో పాటుగా అగ్నిమాపక పరికరాలను పెట్రోల్ బంకుల వద్ద అందుబాటులో ఉంచడం తప్పనిసరి. నిర్వాహకులతో పాటుగా ఏజెన్సీ వివరాలు, ఫోన్‌ నంబర్లను పెట్రోల్ బంకుల వద్ద ప్రదర్శించాలి. అలాగే వినియోగదారులు, వాహనదారుల కోసం తాగునీటి సౌకర్యం కల్పించాలి. ఉచిత మరుగుదొడ్లు, ప్రథమ చికిత్స పెట్టె, అత్యవసర మందులను పెట్రోల్ బంకుల వద్ద తప్పనిసరిగా అందుబాటులో ఉంచాలి.

ఒక వేళ మీరు వెళ్లిన పెట్రోల్ బంకుల వద్ద ఈ సౌకర్యాలు లేకపోయినా.. ఇబ్బందులు ఎదురైనా కూడా మీరు ఉన్నతాధికారులకు చేరవేయవచ్చు. జీవీపోర్టల్‌.జీవోవీ.ఇన్‌ అనే వెబ్‌సైట్‌లో ఫిర్యాదు చేయవచ్చు. లేదంటే మండల, జిల్లా స్థాయి గ్రీవెన్స్‌ వేదికలలోనూ ఫిర్యాదు చేసేందుకు అవకాశం ఉంది. పెట్రోల్ బంక్ ఏజెన్సీతో పాటుగా స్థానిక తహసీల్దార్, జిల్లా పౌర సరఫరాల సంస్థ అధికారులకు కూడా ఫిర్యాదు చేసే అవకాశం ఉంది.