తోకతో పుట్టిన చిన్నారి.. క్రమంగా పెరిగి 14 సెంటీమీటర్ల పొడవు

ఉత్తర్‌ప్రదేశ్ డాక్టర్లు అత్యంత అరుదైన ఆపరేషన్ చేశారు. లక్నోలోని బలరాంపూర్ ఆస్పత్రి డాక్టర్లు.. పుట్టుకతోనే తోకతో ఉన్న బాలుడు గత 18 నెలలుగా అనుభవిస్తున్న బాధను దూరం చేశారు. అతడి తోకను తొలగించేందుకు ఒక అరుదైన సర్జరీ చేశారు. అది సక్సెస్ కావడంతో.. తోకను తొలగించిన తర్వాత బాలుడు ప్రస్తుతం కోలుకుంటున్నట్లు డాక్టర్లు తెలిపారు. గత కొన్ని నెలలుగా ఆ తోక కారణంగా అనుభవిస్తున్న బాధను అతడికి దూరం చేశారు. ఈ అత్యంత అరుదైన ఆపరేషన్ విజయవంతంగా పూర్తి చేయడంతో బలరాంపూర్ ఆస్పత్రి డాక్టర్లపై ప్రశంసల జల్లు కురుస్తోంది. 18 నెలల బాలుడికి వెన్నుముక దిగువ భాగంలో 14 సెంటీమీటర్ల పొడవు ఉన్న తోక లాంటి దాన్ని తొలగించారు.

మానవ పరిణామ క్రమంలో కొంతమందిలో అరుదుగా కనిపించే ఇలాంటి నిరుపయోగ అవయవాల కోవలోకి ఈ తోక లాంటి నిర్మాణాలు వస్తాయని డాక్టర్లు తెలిపారు. అపెండిక్స్, జ్ఞాన దంతాలు కూడా ఇలాంటి నిరుపయోగ అవయవాల కిందికే వస్తాయని తెలిపారు. కానీ.. అందరిలో వచ్చినట్లుగా కాకుండా.. ఈ బాలుడికి.. వెనుక భాగంలో తోక వంటి అసాధారణ నిర్మాణం వెన్నుముక దగ్గర ఏర్పడటం చాలా అరుదైన కేసు అని డాక్టర్లు వెల్లడించారు.

ఈ తోక వంటి నిర్మాణం వయసు మీద పడుతున్న కొద్దీ పెరుగుతుండటంతో.. కేవలం బాలుడి చర్మానికి మాత్రమే పరిమితం కాకుండా.. వెన్నుముక వైపునకు కూడా విస్తరించినట్లు డాక్టర్లు చెప్పారు. అందుకే ఆ తోకను కత్తిరించేటప్పుడు చాలా జాగ్రత్తగా ఉండాల్సి వచ్చిందని వివరించారు. 20 ఏళ్లకు పైగా తాను డాక్టర్‌గా పనిచేస్తున్నానని.. తన వృత్తి జీవితంలో ఇంత పొడవు ఉన్న తోకను చూడలేదని.. పీడియాట్రిక్ సర్జన్ డాక్టర్ అఖిలేష్ కుమార్ వెల్లడించారు. సాధారణంగా 2 నుంచి 3 సెంటీమీటర్ల పొడవు ఉన్న తోకలను ఇప్పటివరకు చూశామని.. కానీ ఇది 14 సెంటీమీటర్లు ఉండటం చాలా అసాధారణమని చెప్పారు.

అయితే ఆ చిన్నారి పుట్టినప్పటి నుంచి ఈ తోక లాంటి నిర్మాణం పెరుగుతూ రావడంతో.. రోజురోజుకూ విపరీతమైన ఇబ్బందులు ఎదురయ్యాయి. ఆ తోకను తాకినా లేదా నొక్కినా స్పర్శతో పాటు నొప్పి కూడా ఉండేదని బాలుడి తల్లిదండ్రులు చెప్పారు. దీంతో పడుకోవడానికి, కూర్చోవడానికి లేదా నడవడానికి ప్రయత్నించినా అది అతడికి అడ్డుపడి, నొప్పితో ఏడ్చేవాడని పేర్కొన్నారు.

కుటుంబ సభ్యులకు కౌన్సెలింగ్ ఇచ్చిన తర్వాత.. డాక్టర్లు స్కానింగ్‌లు, టెస్ట్‌లు పూర్తి చేసి.. ఆస్పత్రిలో గురువారం చేరగా.. మరుసటి రోజున శుక్రవారం.. డాక్టర్ల బృందం 90 నిమిషాల పాటు శస్త్రచికిత్స చేశారు. వెన్నుముక వైపు విస్తరించిన ఈ తోక లాంటి నిర్మాణాన్ని జాగ్రత్తగా విడదీసి తొలగించారు. ఆపరేషన్ తర్వాత బాలుడిని పర్యవేక్షణ కోసం ఐసీయూకి తరలించారని పేర్కొన్నారు. ప్రస్తుతం బాలుడి ఆరోగ్యం నిలకడగా ఉందని.. త్వరలోనే డిశ్చార్జ్ చేసి ఇంటికి పంపిస్తామని తెలిపారు.