మమ్దానీతో ట్రంప్ జోకులు.. ఫాసిస్ట్ అనే విమర్శపై ఎవరూ ఊహించని సమాధానం

అగ్రరాజ్యం అమెరికా రాజకీయాల్లో ఓ అరుదైన దృశ్యం శుక్రవారం వైట్‌హౌస్ ఓవల్ ఆఫీస్‌లో ఆవిష్కృతమైంది. అధ్యక్షుడు డొనాల్డ్ ట్రంప్, న్యూయార్క్ నూతన మేయర్ జోహ్రన్ మమ్దానీతో భేటీ అయ్యారు. ఈ సమావేశం గొప్ప, ఉత్పాదకతతో కూడుకున్నదని ట్రంప్ అభివర్ణించారు. అయితే సమావేశం తర్వాత జరిగిన ప్రెస్ మీట్‌లో రిపోర్టర్లు అడిగిన ప్రశ్నకు ట్రంప్ ఇచ్చిన సమాధానం రాజకీయ వర్గాలను ఆశ్చర్యపరిచింది. ముఖ్యంగా ట్రంప్.. మమ్దానీతో జోకులు చేయడం అందరినీ నవ్విస్తోంది. ప్రస్తుతం ఇందుకు సంబంధించిన వీడియో నెట్టింట వైరల్ కూడా అవుతోంది.

గతంలో ఎన్నికల ప్రచార సభల్లో జోహ్రన్ మమ్దానీ.. ట్రంప్‌ను ఫాసిస్ట్ అంటూ తీవ్రంగా విమర్శించారు. అయితే తాజాగా వైట్‌హౌస్‌లో వీరిద్దరి మధ్య భేటీ జరగ్గా.. ఓ విలేకరి మమ్దానీని ఉద్దేశించి ఓ ప్రశ్న అడిగారు. మీరు ఇప్పటికీ.. ట్రంప్ ఫాసిస్ట్ అనే దానికే కట్టుబడి ఉన్నారా అని ప్రశ్నించారు. దీనికి మమ్దానీ నేను దాని గురించి మాట్లాడాను అని సమాధానం చెప్పడం ప్రారంభించగా.. ట్రంప్ వెంటనే జోక్యం చేసుకున్నారు. ట్రంప్ నవ్వుతూ.. 'ఫర్వాలేదు. మీరు 'అవును' అని చెప్పవచ్చు. వివరించడం కంటే అదే సులభం. నాకు అభ్యంతరం లేదు' అని అన్నారు. దీంతో అక్కడున్న వారంతా నవ్వారు. ముఖ్యంగా ట్రంప్ పాత విమర్శలను తేలికగా తీసుకోవడం అందరిలోనూ నవ్వులు పూయించింది.

న్యూయార్క్‌కు చెందిన ట్రంప్.. ఎన్నికల్లో విజయం సాధించినందుకు మమ్దానీకి అభినందనలు తెలిపారు. ఇద్దరు నేతలు హౌసింగ్ డెవలప్‌మెంట్, పెరుగుతున్న ఆహార ధరలు వంటి కీలక అంశాలపై ఏకాభిప్రాయం వ్యక్తం చేశారు. "మేమిద్దరం గొప్ప, నిజంగా మంచి, చాలా ఉత్పాదక సమావేశం చేసుకున్నాం. మేము ప్రేమించే ఈ నగరం చాలా బాగా ఉండాలని కోరుకుంటున్నాం" అని ట్రంప్ విలేకరులతో అన్నారు. ట్రంప్ మమ్దానీపై సానుకూల వైఖరిని ప్రదర్శిస్తూ.. ఆయన రాజకీయ వర్గాల అంచనాలను తిప్పికొట్టే అవకాశం ఉందని సూచించారు. నేను అనుకుంటున్నాను. ఆయన కొందరు కన్జర్వేటివ్‌లను, కొందరు లిబరల్‌లను కూడా ఆశ్చర్యపరుస్తారని" అని ట్రంప్ అన్నారు.

ట్రంప్ పక్కనే ఉన్న మమ్దానీ కూడా ట్రంప్ అంచనాను సమర్థిస్తూ.. చర్చ చాలా ఉత్పాదకతతో కూడుకున్నదని, న్యూయార్క్ వాసులు ఎదుర్కొంటున్న అత్యవసర జీవన వ్యయ సవాళ్లపై దృష్టి సారించినట్లు తెలిపారు. అద్దె పెరుగుదల, నిత్యావసరాలు, వినియోగ బిల్లులు వంటి సమస్యలపై మాట్లాడినట్లు మమ్దానీ పేర్కొన్నారు. ఈ ఉమ్మడి లక్ష్యం కోసం కలిసి పనిచేయడానికి ఎదురుచూస్తున్నానని చెబుతూ ఆయన ప్రసంగాన్ని ముగించారు.