ట్రంప్‌తో స్నేహమైనా వదులుకుంటాం గానీ.. ఆ ఒప్పందానికి ఓకే చెప్పం': జెలెన్‌స్కీ

రష్యా-ఉక్రెయిన్‌ యుద్ధాన్ని ముగించేందుకు అగ్రరాజ్యం అమెరికా అధ్యక్షుడు డొనాల్డ్ ట్రంప్ ప్రతిపాదించిన 28 సూత్రాల శాంతి ప్రణాళికపై ఉక్రెయిన్ అధ్యక్షుడు వొలొదిమిర్ జెలెన్‌స్కీ అనూహ్యంగా స్పందించారు. శాంతి పునరుద్ధరణ కోసం తమ ప్రతిపాదనలపై కీవ్ వారం రోజుల్లోపు అంగీకరించాల్సిందేనని ట్రంప్ అల్టిమేటం జారీ చేసిన నేపథ్యంలో.. జెలెన్‌స్కీ దీటుగా బదులిచ్చారు. అవసరమైతే అమెరికా వంటి కీలక మిత్రదేశంతో స్నేహబంధాన్ని కూడా వదులుకునేందుకు సిద్ధమని పరోక్షంగా హెచ్చరించారు.

జెలెన్‌స్కీ స్పందిస్తూ.. ప్రస్తుతం ఉక్రెయిన్ చరిత్రలోనే అత్యంత క్లిష్ట పరిస్థితిని ఎదుర్కొంటోందన్నారు. ఉక్రెయిన్ తన ఆత్మగౌరవాన్ని కోల్పోవడమా? లేక కీలకమైన భాగస్వామిని వదులుకోవడమా? అనే దాన్ని ఎంచుకునే పరిస్థితి తలెత్తిందని ఆయన ఆందోళన వ్యక్తం చేశారు. అయితే ఉక్రెయిన్ ప్రయోజనాల మేరకే తమ నిర్ణయాలు ఉంటాయని, ఇందుకోసం అవసరమైతే మిత్రులను కూడా వదులుకుంటామని ఆయన స్పష్టం చేశారు.

 దాదాపు మూడేళ్లకు పైగా కొనసాగుతున్న యుద్ధానికి ముగింపు పలికేందుకు ట్రంప్ ఈ 28 సూత్రాల ప్రణాళికను ప్రతిపాదించారు. అయితే ఈ ప్రణాళిక రష్యాకు ఎక్కువ అనుకూలంగా ఉండే విధంగా రూపొందించినట్లు తెలుస్తోంది. దీని ప్రకారం ఉక్రెయిన్ దొనెట్స్క్ సహా పలు కీలక ప్రాంతాలను వదులుకోవాల్సి ఉంటుంది. అంతేకాకుండా ఉక్రెయిన్ తన సాయుధ దళాలను తగ్గించుకోవడం వంటి కీలక అంశాలు కూడా ఈ ప్రణాళికలో ఉన్నాయి. ఈ ప్రణాళికతో పాటు ఉక్రెయిన్ పునరుద్ధరణకు సహకరించే విధంగా పలు అంశాలను కూడా ట్రంప్ చేర్చారు.

ఈక్రమంలోనే జెలెన్‌స్కీ ట్రంప్ ప్రణాళికకు సంబంధించి ప్రత్యామ్నాయాలను ప్రతిపాదిస్తామని వెల్లడించారు. యుద్ధాన్ని వీలైనంత త్వరగా ముగించాలనే ట్రంప్ ఆకాంక్షను తాము గౌరవిస్తామని పేర్కొన్నారు. ఈ ప్రతిపాదనపై చర్చించేందుకు జెలెన్‌స్కీ త్వరలోనే ట్రంప్‌తో భేటీ కానున్నట్లు అధ్యక్ష కార్యాలయం తెలిపింది. ఈ నేపథ్యంలోనే ఉక్రెయిన్ అధ్యక్షుడు, అమెరికా ఉపాధ్యక్షుడు జేడీ వాన్స్‌తో కూడా చర్చలు జరిపారు.

ట్రంప్ శాంతి ప్రణాళికపై రష్యా అధ్యక్షుడు వ్లాదిమిర్ పుతిన్ కూడా స్పందించారు. ఉక్రెయిన్ దీన్ని అంగీకరించి తీరాల్సిందేనని పుతిన్ తేల్చి చెప్పారు. కీవ్ దాని నాటో మిత్రదేశాలు ఇప్పటికీ భ్రమల్లోనే జీవిస్తున్నాయని, యుద్ధంలో రష్యాను ఓడించగలమని కలలు కంటున్నారని ఆయన విమర్శించారు. అయితే యుద్ధం ముగింపునకు రష్యా సిద్ధంగా ఉందని పేర్కొన్న పుతిన్.. ఈ ప్రణాళికపై వివరణాత్మక చర్చకు అంగీకరిస్తున్నామని.. అది జరగకపోతే యుద్ధం కొనసాగుతుందని హెచ్చరించారు. ట్రంప్ ఇటీవల ఇజ్రాయెల్‌-హమాస్‌ యుద్ధం ముగింపునకు కూడా ఇలాంటి శాంతి ప్రణాళికనే ప్రతిపాదించడం, దానికి ఇరువైపుల నుంచి అంగీకారం లభించడంతో ప్రస్తుతం కాల్పుల విరమణ అమల్లో ఉంది. ఈ విజయాన్ని ట్రంప్ ఉక్రెయిన్ విషయంలోనూ పునరావృతం చేయాలని భావిస్తున్నారు.