బ్యాంకులో ఉద్యోగం.. ప్రేమించే కుటుంబం.. కానీ

ఒక్క క్షణంలో.. మదిలో వచ్చిన ఓ చిన్న ఆలోచన నిండు నూరేళ్ల జీవితాన్ని బలి తీసుకుంటుంది. చిన్న చిన్న సమస్యలకు కూడా ప్రాణాలు తీసుకుంటున్న వారి సంఖ్య రోజు రోజుకు పెరుగుతోంది. తాజాగా జైపూర్‌లో నాలుగో తరగతి చదువుతోన్న చిన్నారి ఆత్మహత్య చేసుకోవడం దేశవ్యాప్తంగా సంచలనంగా మారింది. పట్టుమని పదేళ్ల వయసు కూడా లేని ఆ చిన్నారి ఆత్మహత్య చేసుకోవడం దేశంలో.. కలకలం రేపుతోంది. తాజాగా మరో సంఘటన వెలుగు చూసింది. బ్యాంకులో ఉద్యోగం చేస్తున్న ఓ యువతి పెళ్లి కావడం లేదని మనస్థాపంతో ఆత్మహత్య చేసుకుంది. ఈ సంఘటన హైదరాబాద్‌లో వెలుగు చూసింది.

పోలీసులు తెలిపిన వివరాల ప్రకారం.. సిద్ధిపేట జిల్లా, మద్దూర్ మండలం, రేబర్తి గ్రామానికి చెందిన కుంటి నిరోష(32) అనే యువతి తన సోదరుడితో కలిసి చింతల్, పద్మానగర్ కాలనీలోని ఓ ఇంట్లో అద్దెకు నివాసం ఉంటుంది. సికింద్రాబాద్‌లోని హెచ్‌డీఎఫ్‌సీ బ్యాంకులో ఉద్యోగం చేస్తోంది. గత కొన్నాళ్లుగా తల్లిదండ్రులు ఆమెకు పెళ్లి సంబంధాలు చూస్తున్నారు. కానీ పెళ్లి కుదరడం లేదు. దీనికి తోడు ఆమె గత కొంతకాలంగా అనారోగ్య సమస్యలతో బాధ పడుతోంది. ఓ వైపు పెళ్లి కావడం లేదన్న దిగులు.. మరోవైపు అనారోగ్య సమస్యలు.. వెరసి ఆమెను దారుణం వైపు పురిగొల్పాయి.

అనారోగ్య సమస్యలు, ఆపై పెళ్లి కాకపోవడంతో తీవ్ర మనస్థాపానికి గురైన నిరోష.. గురువారం సాయంత్ర ఇంట్లో ఫ్యాన్‌కు ఉరేసుకుని ఆత్మహత్య చేసుకుంది. విషయం తెలుసుకున్న పోలీసులు సంఘాటన స్థలానికి చేరుకుని కేసు నమోదు చేశారు. అల్లారుముద్దుగా పెంచుకున్న బిడ్డ ఇలా అర్ధాంతరంగా చనిపోవడంతో ఆమె కుటుంబంలో తీవ్ర విషాదం నెలకొంది.

తాజాగా నిజమాబాద్ జిల్లాలో ఇలాటి దారుణమే వెలుగు చూసింది. పెళ్లికి ఒక్కరోజు ముందు పెళ్లి కొడుకు ఆత్మహత్య చేసుకోవడం కలకలం రేపింది. వివాహానికి వచ్చిన బంధువులు ఏదో అన్నారని మనస్థాపం చెందిన యువకుడు రేపు పెళ్లి అనగా దారుణ నిర్ణయం తీసుకున్నాడు. ఆత్మహత్య చేసుకున్నాడు. దీంతో రెండు కుటుంబాల్లో తీవ్ర విషాదం నెలకొంది. పెళ్లి బాజాలు మోగాల్సిన ఇంట్లో గుండెలు పగిలే ఏడుపులతో భయానక వాతావరణం నెలకొంది. యువకుడి తల్లిదండ్రులను ఓదార్చడం ఎవరి తరం కాలేదు.