ఇంటర్నెట్‌ను షేక్ చేస్తున్న,,, వైరల్ బ్యూటీ 'బందనా గర్ల్'?

సోషల్ మీడియాలో కొందరు ఓవర్ నైట్ సెలెబ్రిటీలు అయిపోతున్నారు. ఇప్పుడు నెట్టింట్లో ఏ వీడియో ఎప్పుడు, ఎందుకు వైరల్ అవుతుందో చెప్పలేని పరిస్థితి ఏర్పడింది. ప్రస్తుతం అలాంటి ఓ యువతి ఇంటర్నెట్‌ను షేక్ చేస్తోంది. నెటిజన్లు అంతా ఆమె కోసం తెగ వెతికేస్తున్నారు. ఆమె అసలు పేరు కచ్చితంగా తెలియకపోయినా.. అందరూ ముద్దుగా 'బందనా గర్ల్' అని పిలుచుకుంటున్నారు. అసలు ఈ 'బందనా గర్ల్' ఎవరు, ఆమె విశేషాలేంటో ఇప్పుడు తెలుసుకుందాం.

ఈ నెల 2వ తేదీన 'bud wiser @w0rdgenerator' అనే పేరుతో ఉన్న ఓ ఎక్స్‌ అకౌంట్ నుంచి రెండు సెకన్ల నిడివి ఉన్న వీడియో పోస్ట్ చేశారు. దానికి ‘Makeup ate today’ (ఈరోజు మేకప్ చక్కగా వేసుకున్నావు) అనే క్యాప్షన్‌ పెట్టారు. ఆ వీడియోలో ఒక అమ్మాయి తెలుపు రంగు టాప్, వెండి చెవిపోగులు, బందనా (తలకు కట్టుకునే వస్త్రం) ధరించి కనిపిస్తోంది. ఆటోలో కూర్చుని ఈ వీడియో తీసినట్టుగా అర్థమవుతోంది. కాగా ఈ వీడియోకు.. 100 మిలియన్లకు పైగా వ్యూస్‌, లక్షల్లో లైక్‌లు, వేలల్లో కామెంట్లు రీపోస్టులు దక్కాయి.

ఎవరీ బందనా గర్ల్?

వీడియోలో కనిపించిన యువతికి 'బందనా గర్ల్' అని పేరు పెట్టారు నెటిజన్లు. అయితే ఈమె ఎవరు అని తెలుసుకోవడానికి తెగ వెతికేస్తున్నారు. ఈ బందనా గర్ల్ పోస్ట్‌ వైరల్‌ కావడంతో.. పలు మీడియా సంస్థలు ఆమె ఎవరా అని ఆరా తీశాయి. దీంతో ఆమె పేరు ప్రియాంగ అని ఓ మీడియా సంస్థ పేర్కొంది. కానీ ఇది ఇంకా ధ్రువీకరణ కాలేదు. అయితే ఆ మీడియా సంస్థ తెలిపిన సమాచారం ప్రకారం.. తన వీడియో ఇంత వైరల్ అవ్వడం.. తానే నమ్మలేకపోతోందట. మహా అయితే వెయ్యి లైకులు వస్తాయని అనుకున్నానని.. కానీ ఇది ఇప్పుడు తన కంట్రోల్‌లో లేదని చెప్పిందట. తన ముఖాన్ని సోషల్ మీడియాలో పదే పదే చూసి తానే అలసిపోయినట్లు వైరల్ బ్యూటీ తెలిపిందని ఆ మీడియా సంస్థ పేర్కొంది.

ఈ వీడియో ఎంతలా వైరల్ అయిందంటే.. ఆ క్లిప్ పోస్ట్ చేసిన ఎక్స్ అకౌంట్‌కు దెబ్బకు బ్లూటిక్ వచ్చేసింది. ఆ తర్వాత కొందరు ఔత్సాహికులు అలాగే ఆటోలో సెల్ఫీ వీడియోలు తీసుకుని పోస్టు చేశారు. అయితే బ్లూటిక్ రావడంపై నెటిజన్లు ఫన్నీగా కామెంట్లు చేస్తున్నారు. ఈ బందనా గర్ల్‌కు బ్లూటిక్ వచ్చింది.. ఈ వైరల్ వీడియో ద్వారా ఆమెకు వచ్చే పారితోషికం భారత ఆర్థిక వ్యవస్థకు పెద్ద ఎత్తున డాలర్లను సమకూర్చి పెడుతుంది అంటూ ఫన్నీగా కామెంట్ చేశారు. మరో యూజర్ స్పందిస్తూ.. ఈ నెలలో తన తల్లిదండ్రుల కంటే ఎక్కువసార్లు ఈ అమ్మాయినే చూశానని రాసుకొచ్చాడు.