తండ్రి అనారోగ్యానికి గురికావడంతో,,,స్మృతి మంధాన పెళ్లి వాయిదా

టీమిండియా మహిళా క్రికెటర్‌ స్మృతి మంధాన, సంగీత దర్శకుడు పలాష్ ముచ్చల్ వివాహం అకస్మాత్తుగా వాయిదా పడింది. ముహూర్తం ప్రకారం నవంబర్ 23 ఆదివారం అంటే ఈరోజు స్మృతి మంధాన పెళ్లి జరగాల్సి ఉంది. మహారాష్ట్రలోని సాంగ్లిలో ఈ పెళ్లి కోసం అన్ని ఏర్పాట్లు చేశారు. హల్దీ వేడుక కూడా ఘనంగా జరిగింది. అయితే ముహూర్తానికి కొన్ని గంటల ముందు స్మృతి మంధాన తండ్రి శ్రీనివాస్ హార్ట్ ఎటాక్‌కు గురయ్యారు! ఆయనను హుటాహుటిన ఆసుపత్రికి తరలించారు. దీంతో స్మృతి మంధాన, పలాష్ ముచ్చల్‌ల పెళ్లి వాయిదా పడింది.

మహారాష్ట్రలోని సాంగ్లిలో ఉన్న స్మృతి మంధాన కొత్త ఇంట్లో కొన్ని రోజుల క్రితమే పెళ్లి వేడుకలు ప్రారంభమయ్యాయి. మహిళల వన్డే ప్రపంచకప్ గెలిచిన భారత జట్టులో సభ్యురాలిగా ఉన్న స్మృతి మంధాన.. ఆ సంతోషం మర్చిపోకముందే పెళ్లికి రెడీ అయింది. ఇందుకు సంబంధించిన ఏర్పాట్లు కూడా చకచకా జరిగిపోయాయి. ఈ వేడుకకు టీమిండియా మహిళా క్రికెటర్లు సైతం హాజరయ్యారు. హల్దీ ఫంక్షన్‌లో డ్యాన్స్‌లు చేస్తూ హంగామా చేశారు.

ఆదివారం సాయంత్రం 4:30 గంటలకు వివాహం జరగాల్సిందని సమాచారం. కానీ స్మృతి మంధాన తండ్రి శ్రీనివాస్ అకస్మాత్తుగా అనారోగ్యానికి గురయ్యారు. ఆయనకు గుండెపోటు వచ్చింది! ఊహించని ఈ పరిణామానికి కుటుంబ సభ్యులతో పాటు పెళ్లికి వచ్చిన అతిథులు కూడా షాక్ అయ్యారు. దీంతో కాసేపట్లో పెళ్లి జరగాల్సి ఉండగా.. వేడుకల వాతావరణం ఒక్కసారిగా మారిపోయింది. స్మృతి మంధాన తండ్రిని వెంటనే ఆంబులెన్స్‌లో ఆసుపత్రికి తరలించారు. దీంతో ప్రస్తుతానికి పెళ్లి వాయిదా వేయాలని కుటుంబ సభ్యులు నిర్ణయించారు. ఈ విషయాన్ని స్మృతి మంధాన మేనేజర్ తుహిన్ మిశ్రా వెల్లడించారు.

“శ్రీనివాస్ మంధాన ఈ రోజు ఉదయం టిఫిన్‌ చేసే సమయంలో అస్వస్థతకు గురయ్యారు. ఆయన కోలుకుంటారని అనుకున్నాం. కానీ ఆ తర్వాత పరిస్థితి మరింత దిగజారింది. దీంతో ఆయనను ఆసుపత్రికి తరలించాం. తన తండ్రి పూర్తిగా కోలుకునే వరకు పెళ్లి చేసుకోకూడదని ఆమె నిర్ణయించుకుంది” అని తుహిన్ మిశ్రా చెప్పారు. కాగా ప్రస్తుతం శ్రీనివాస్‌ వైద్యుల పర్యవేక్షణలో ఉన్నారు. ఆయన కొన్ని రోజులు ఆసుపత్రిలోనే ఉండాల్సి ఉంటుందని.. సమాచారం.