కారులో నుంచి దిగిన పెళ్లి మండపానికి వెళ్తోన్న వరుడు.. ఇంతలోనే ఊహించని రోడ్డు ప్రమాదం

ఊరేగింపుగా కళ్యాణ మండపానికి వెళ్తోన్న వరుడు అనూహ్యంగా జరిగిన ప్రమాదంలో ప్రాణాలు కోల్పోయాడు. దీంతో అప్పటి వరకూ సందడిగా ఉన్న ఆ వేడుక ఒక్కసారిగా విషాదంగా మారిపోయింది. కాసేపట్లో మండపానికి చేరుకుంటానడగా ఓంట్లో కొంచెం నలతగా ఉందని వరుడు వాహనంలో నుంచి కిందికి దిగాడు. ఇంతలోనే వేగంగా వచ్చిన ఓ ట్రక్కు అతడ్ని ఢీకొట్టి వెళ్లిపోయింది. ఈ దుర్ఘటనలో తీవ్రంగా గాయపడిన యువకుడ్ని బంధువులు ఆసుపత్రికి తరలించగా.. అతడు అప్పటికే మృతిచెందినట్టు వైద్యులు నిర్దారించారు. అత్యంత విషాదకరమైన ఈ ఘటన ఉత్తర్‌ ప్రదేశ్‌లోని భాగపత్‌లో ఆదివారం రాత్రి చోటుచేసుకుంది.

వివరాల్లోకి వెళ్లే.. బినౌలి పోలీస్ స్టేషన్ పరిధిలోని పిచోక్రా గ్రామానికి చెందిన సుబోధ్ కుమార్‌కి పెళ్లి నిశ్చయమైంది. నవంబరు 23న వివాహానికి ముహూర్తాలు పెట్టుకున్నారు. ఈ క్రమంలో వధువు గ్రామమైన సరూర్‌పూర్ కలన్‌కు ఆదివారం ఊరేగింపుగా బయలుదేరి వెళ్లారు. వధువు గ్రామ పొలిమేరలకు చేరుకున్న వరుడు, అతడి పరివారం.. స్నాక్స్, డిన్నర్ కోసం అక్కడ ఉన్న పంచాయతీ ఆఫీసు వద్ద ఆగారు.

 బంధువులు తెలిపిన ప్రకారం.. అసౌకర్యానికి గురైన వరుడు సుబోధ్‌కు వాంతులు మొదలవడంతో రోడ్డు పక్కన నిలిపి ఉంచి వాహనం నుంచి కిందకు దిగాడు. ఈ సమయంలో ఎదురుగా అతివేగంతో వచ్చిన ఓ ట్రక్కు అదుపుతప్పి అతడ్ని ఢీకొట్టి కొన్ని మీటర్ల దూరం ఈడ్చుకెళ్లింది. తీవ్రంగా గాయపడిన వరుడ్ని కుటుంబసభ్యులు, బంధువులు చికిత్స కోసం ప్రయివేట్ ఆసుపత్రికి తీసుకెళ్లారు. పరిస్థితి విషమంగా ఉండటంతో అక్కడి వైద్యులు జిల్లా హాస్పిటల్‌కు రిఫర్ చేయగా.. డాక్టర్లు అతడ్ని చనిపోయినట్టు ధ్రువీకరించారు.

ప్రమాదం గురించి సమాచారం అందుకున్న పోలీసులు.. ఘటనా స్థలికి చేరుకుని కేసు నమోదుచేశారు. మృతదేహాన్ని స్వాధీనం చేసుకుని పోస్ట్‌-మార్టం కోసం తరలించారు. పరారైన ట్రక్కు డ్రైవర్‌ను పట్టుకోడానికి హైవేపై, సమీపంలో ఉన్న సీసీటీవీ కెమెరాలను పరిశీలిస్తున్నారు. కుటుంబసభ్యుల ఫిర్యాదు మేరకు కేసు నమోదుచేసి దర్యాప్తు కొనసాగిస్తున్నామని పోలీసులు తెలిపారు. అప్పటి వరకూ ఎంతో సంతోషంగా ఉన్న ఇరు కుటుంబాల్లోనూ ఈ సంఘటన తీవ్ర విషాదాన్ని మిగిల్చింది. రోడ్డు ప్రమాదం గాయపడిన వరుడ్ని ఆదివారం రాత్రి 10.30 గంటల ప్రాంతంలో జిల్లా ఆసుపత్రికి తీసుకొచ్చినట్టు డాక్టర్ రాజేష్ సింగ్ చెప్పారు. ఆసుపత్రికి వచ్చేసరికి అతడు చనిపోయాడని పేర్కొన్నారు.