భారత్‌లో పుట్టిన వారికి ఫుల్ బెనిఫిట్స్,,,,కెనడా పౌరసత్వ చట్టంలో కీలక మార్పులు

ఎట్టకేలకు పౌరసత్వం చట్టంలో కెనడా కీలక మార్పులకు శ్రీకారం చుట్టింది. ఈ మేరకు పౌరసత్వ చట్టంలో సవరణకు ఉద్దేశించిన సీ-3 బిల్లుకు ఆమోదం లభించింది. త్వరలో ఇది చట్టంగా మారనుంది. ఈ చట్టం అమల్లోకి వస్తే కెనడాలో ఉంటున్న వేలాది మంది భారత సంసతి వారికి ఉపయోగకరంగా ఉంటుంది. ఇప్పటికే ఆ దేశంలో చర్చనీయాంశంగా ఉన్న సెకండ్‌ జనరేషన్‌ కటాఫ్‌లోని సమస్యలను కెనడా ప్రభుత్వం పరిష్కరించింది. గతంలో ఉన్న నిబంధనల ప్రకారం.. విదేశాల్లో జన్మించిన కెనడా వాసుల పిల్లలకు అటోమేటిక్‌గా పౌరసత్వం వచ్చేది కాదు. ఇప్పుడు ఆ సమస్య తీరిపోనుంది.

కాగా, సెకండ్‌ జనరేషన్‌ కటాఫ్‌ రూల్ ప్రకారం.. కెనడా బయట జన్మించిన పిల్లలకు ఒకవేళ వారి పేరెంట్స్ కూడా బయటి దేశాల్లో జన్మిస్తే.. పౌరసత్వం వచ్చేది కాదు. ఈ రూల్ వల్ల నష్టపోయిన వారందరిని ‘లాస్ట్‌ కెనెడీయన్స్‌’గా పరిగణించేవారు. ఈ రూల్‌‌ను వ్యతిరేకిస్తూ గత కొన్నేళ్లుగా ఉద్యమం జరుగుతోంది. ఇక ఈ నిబంధన రాజ్యాంగ విరుద్ధమని ఆ దేశ కోర్టు తేల్చి చెప్పింది. దీంతో కెనడా ప్రభుత్వం ఈ కొత్త బిల్లును సిద్ధం చేసింది.

కొత్త చట్టం ప్రకారం.. ఒకవేళ పిల్లలు కెనడా వెలుపల పుడితే.. వారి తల్లిదండ్రులకు కెనడాతో గణనీయమైన సంబంధం ఉండాలి. అంటే తల్లిదండ్రులు విదేశీయులు అయినా.. పిల్లలు పుట్టడానికి ముందు కనీసం మూడేళ్లు (1,095) కెనడాలో నివసించి ఉన్నామని నిరూపించుకోవాలి. విదేశాల్లో పిల్లలను దత్తత తీసుకునే పేరెంట్స్‌‌కు కూడా ఇదే నిబంధన వర్తించనుంది. ఆస్ట్రేలియా, యూకే, అమెరికా వంటి దేశాల్లో పౌరసత్వ ప్రక్రియలో ఇలాంటి విధానాలనే పాటిస్తున్నారు. ఈ నేపథ్యంలోనే కెనడా ఈ మేరకు మార్పులు చేపట్టింది. కాగా, కెనడా మంత్రి వర్గం తేదీ నిర్ణయించగానే సవరించిన చట్టం అమల్లోకి వస్తుంది.

తమ పిల్లలకు పౌరసత్వం రాక.. భారత సంతతికి చెందిన అనేక మంది కెనడాలో ఇబ్బందులు పడుతున్నారు. ఈ చట్టం అమల్లోకి వచ్చిన తర్వాత.. తల్లిదండ్రులు ఎక్కడ పుట్టారన్న విషయంతో సంబంధం లేకుండా.. వారి పిల్లలు కెనడా పౌరులుగా పెరుగుతారు. భారత్ నుంచి ఇకపై వెళ్లే వారికి కూడా ఈ బెనిఫిట్స్ వర్తిస్తాయి. ఈ చట్టం అమల్లోకి రాగానే పౌరసత్వ దరఖాస్తుల సంఖ్య గణనీయంగా పెరుగుతుందని అక్కడి లాయర్లు పేర్కొన్నారు.