మనవడిని చూసేందుకు కెనడా వెళ్లి.. అమ్మాయిలపై వేధింపులు

మనవడిని చూసేందుకు కెనడాకు వెళ్లాడో భారతీయ వృద్ధుడు. ఆరు నెలల విజిటర్ వీసాపై అక్కడకు వెళ్లిన అతడు.. స్థానిక పాఠశాలలో చదువుతున్న ఇద్దరు టీనేజ్ బాలికలను వేధించాడు. దీంతో బాలికలు పోలీసులకు ఫిర్యాదు చేయగా.. కేసు నమోదు చేసుకున్న పోలీసులు దర్యాప్తు చేపట్టారు. ముఖ్యంగా భారతీయ వృద్ధుడిని పట్టుకుని అరెస్ట్ చేశారు. ఆపై కోర్టులో హాజరు పరచగా.. న్యాయస్థానం షాకింగ్ తీర్పును ఇచ్చింది. దేశం నుంచి బహిష్కరిస్తున్నట్లు వివరించింది. అంతేకాకుండా ఇక జీవితంలో అతడు కెనడాలో అడుగు పెట్టడానికి వీళ్లేకుండా నిషేధం విధించింది.

మనవడిని చూసేందుకు వెళ్లి.. వేధింపుల కేసులో చిక్కి

భారత దేశానికి చెందిన 51 ఏళ్ల జగజిత్ సింగ్.. ఈ ఏడాది జులై నెలలో కెనడాకు వెళ్లాడు. అక్కడ అతడి మనవడు ఉండగా.. చూసేందుకు ఆరు నెలల వీసా తీసుకుని కెనడా చేరుకున్నాడు. ప్రస్తుతం ఒంటారియా ప్రాంతంలోని సర్నియాలో తన మనవడితో కలిసే నివసిస్తున్నాడు. అయితే మొదటి నుంచి జగజిత్ సింగ్‌కు స్మోకింగ్ అలవాటు ఉండడంతో.. స్థానిక హైస్కూల్ సమీపంలోని స్మోకింగ్ ఏరియాకు తరచుగా వెళ్లడం ప్రారంభించాడు. అక్కడే ఆయన రోజూ బాలికను చూసేవాడు. ఈక్రమంలోనే సెప్టెంబర్ 8వ తేదీ నుంచి 11వ తేదీ మధ్య ఆయన టీనేజ్ బాలికల వద్దకు పదేపదే వెళ్లి వారితో ఫొటోలు దిగడనానికి ప్రయత్నించాడు. అంతేకాకుండా వారితో తరచుగా డ్రగ్స్, ఆల్కహాల్ గురించి మాట్లాడటం వంటి చర్యలకు పాల్పడ్డాడు.

ముఖ్యంగా ఓ బాలికను సెల్ఫీ ఇవ్వమని జగజిత్ సింగ్ కోరిగా.. ఆమె తిరస్కరించింది. అయినా అతడు వదలకపోవడంతో.. ఫొటో ఇచ్చింది. ఫొటో దిగగానే అతడు వెళ్లిపోతాడనుకునే అలా చేసినప్పటికీ.. జగజిత్ సింగ్ ఫొటో దిగే నెపంతో ఆమె ఒంటిపై చేతులు వేశాడు. ఆమెను అసభ్యంగా తాకాడు. దీంతో ఆమె అతడిని తోసేసింది. అక్కడి నుంచి వెళ్లిపోవాలని చెప్పింది. కానీ జగజిత్ సింగ్‌కు ఇంగ్లీష్ రాకపోవడంతో.. వారి వెంటే వెళ్లాడు. దీంతో సదరు బాలికలు పోలీసులకు ఫిర్యాదు చేశారు. కేసు నమోదు చేసుకున్న పోలీసులు వెంటనే రంగంలోకి దిగి జగజిత్ సింగ్‌ను అరెస్ట్ చేశారు.

సెప్టెంబర్ 16వ తేదీన జగజిత్ సింగ్‌ను అరెస్టు చేయగా.. కొన్ని రోజుల తర్వాత అతడు బెయిల్‌పై విడుదల అయ్యాడు. కానీ అదే రోజు అతడు మరికొందరు బాలికలతో అసభ్యంగా ప్రవర్తించడంతో వాళ్లు కూడా ఫిర్యాదు చేశారు. దీంతో మళ్లీ జగజిత్ సింగ్‌ను అరెస్ట్ చేశారు పోలీసులు. ఆపై అంటే సెప్టెంబర్ 19వ తేదీన సర్నియా కోర్టులో హాజరుపరిచారు. ఈక్రమంలోనే జగజిత్ సింగ్.. లైంగిక జోక్యం ఆరోపణలను ఖండించినప్పటికీ, దాని కంటే తక్కువ నేరమైన క్రిమినల్ వేధింపులకు పాల్పడినట్లు అంగీకరించాడు. ఈ సందర్భంగా న్యాయమూర్తి క్రిస్టా లిన్ లెస్జిన్స్కీ తీవ్రంగా స్పందిస్తూ.. "ఆ హైస్కూల్ ప్రాంగణానికి రావాల్సిన అవసరం సింగ్‌కు లేదు. ఈ రకమైన ప్రవర్తనను సహించబోము" అని పేర్కొన్నారు.

నిందితుడి తరఫు న్యాయవాది సింగ్ డిసెంబర్ 30న భారత్‌కు తిరిగి వెళ్లడానికి టికెట్ తీసుకున్నాడని కోర్టుకు తెలియజేశారు. అయినప్పటికీ.. న్యాయమూర్తి సింగ్‌ను వెంటనే బహిష్కరించాలని, మళ్లీ తిరిగి కెనడాలోకి ప్రవేశించకుండా శాశ్వతంగా నిషేధించాలని ఆదేశాలు జారీ చేశారు. దీంతో పాటు సింగ్‌కు మూడేళ్ల ప్రొబేషన్ కూడా విధించారు. మనవడిని చూసేందుకు వెళ్లి జగజిత్ సింగ్ ఇంతకు తెగించి శిక్షార్హుడు కావడంతో ఈ వార్త తెగ వైరల్ అవుతోంది.