హైదరాబాద్ ఓఆర్ఆర్‌పై ఘోర ప్రమాదం,,,,కారులో చెలరేగిన మంటలు

మేడ్చల్-మల్కాజిగిరి జిల్లా శామీర్‌పేట్ పోలీస్ స్టేషన్ పరిధిలోని ఔటర్ రింగ్ రోడ్డుపై ఆదివారం తెల్లవారుజామున అత్యంత విషాదకర ఘటన చోటుచేసుకుంది. కారులో ఆకస్మికంగా చెలరేగిన మంటల కారణంగా కారు డ్రైవర్ సజీవ దహనమయ్యాడు. శామీర్‌పేట్ నుంచి కీసర వైపు వెళ్తున్న క్రమంలో.. ఓఆర్ఆర్ పక్కన లియోనియో రెస్టారెంట్ సమీపంలో ఈ దుర్ఘటన జరిగింది. ప్రాథమిక దర్యాప్తులో పోలీసులు గుర్తించిన వివరాల ప్రకారం.. కారు డ్రైవర్ వాహనాన్ని రింగ్ రోడ్డు పక్కన ఆపి ఏసీ వేసుకొని కారులోనే నిద్రిస్తున్న సమయంలోనే మంటలు చెలరేగినట్టు తెలుస్తోంది.

మంటలు వేగంగా వ్యాపించడంతో డ్రైవర్‌కు బయటకు వచ్చే అవకాశం దొరకలేదు. కారు పూర్తిగా కాలి బూడిదైంది. సమాచారం అందుకున్న వెంటనే శామీర్‌పేట్ పోలీసులు ఘటనా స్థలానికి చేరుకున్నారు. క్లూస్ టీం సహాయంతో అగ్ని ప్రమాదానికి గల ఖచ్చితమైన కారణాలను, అలాగే మృతుడి వివరాలను తెలుసుకునేందుకు దర్యాప్తు చేపట్టారు. షార్ట్ సర్క్యూట్ కారణంగానే మంటలు చెలరేగి ఉంటాయని పోలీసులు అనుమానిస్తున్నారు.

ఏసీ ఆన్ చేసి నిద్రించడం ప్రమాదకరమా?

కారులో ఏసీ వేసుకొని నిద్రించడం చాలా సందర్భాలలో ప్రమాదకరమేనని నిపుణులు హెచ్చరిస్తున్నారు. ఏసీ ఆన్ చేసి, కారు అద్దాలు మూసివేసి నిద్రించినప్పుడు ఇంజిన్ నుంచి వచ్చే కార్బన్ మోనాక్సైడ్ (CO) గ్యాస్ కారు క్యాబిన్‌లోకి చేరే ప్రమాదం ఉంటుంది. ఈ గ్యాస్ వాసన లేకుండా లేకుండా ఉంటుంది. ఇది ప్రాణాంతకం. నిద్రిస్తున్న వ్యక్తికి తెలియకుండానే ఇది ఆక్సిజన్ స్థానంలో చేరి ఊపిరాడక చనిపోయే ప్రమాదం ఉంది. ముఖ్యంగా పాత కార్లు, లేదా వైరింగ్ సమస్యలు ఉన్న కార్లలో ఏసీ ఎక్కువసేపు ఆన్ చేసి ఉంచడం వల్ల ఓవర్‌ హీటింగ్ జరిగి షార్ట్ సర్క్యూట్‌కు దారితీయవచ్చు. ఏసీ ఆన్‌లో ఉండగా విద్యుత్ వైర్లపై అధిక ఒత్తిడి పడుతుంది. ఏసీని సుదీర్ఘంగా ఉపయోగించడం వల్ల బ్యాటరీ లేదా ఫ్యూయల్ లైన్‌లో కూడా కొన్నిసార్లు సాంకేతిక సమస్యలు తలెత్తి మంటలు చెలరేగే అవకాశం ఉంటుందని చెబుతున్నారు.

తీసుకోవాల్సిన జాగ్రత్తలు

వీలైనంత వరకు కారులో ఏసీ వేసుకొని నిద్రించడాన్ని పూర్తిగా మానుకోవాలి. తప్పనిసరి పరిస్థితుల్లో కారులో నిద్రించాల్సి వస్తే.. ఏసీని కాసేపు మాత్రమే ఆన్ చేసి ఉంచాలి. ఒకట్రెండు అద్దాలను కొద్దిగానైనా దించి ఉంచడం ద్వారా తాజా గాలి లోపలికి వచ్చేలా చూసుకోవాలి. కారు ఎలక్ట్రికల్ వైరింగ్, ఏసీ సిస్టమ్, ఫ్యూయల్ లైన్‌లను ఎప్పటికప్పుడు నిపుణులతో తనిఖీ చేయించాలి.