సంజూ శాంసన్‌ పేరు లేకపోవడంపై ,,,,భారత వన్డే జట్టు ఎంపికపై అనిల్ కుంబ్లే ఫైర్‌

భారత సెలక్షన్‌ కమిటీ తీరును టీమిండియా స్పిన్‌ దిగ్గజం అనిల్‌ కుంబ్లే విమర్శించాడు. నవంబర్ 30 నుంచి దక్షిణాఫ్రికాతో జరగనున్న వన్డే సిరీస్‌కు ఎంపిక చేసిన జట్టులో సంజూ శాంసన్‌ను ఎంపిక చేయకపోవడంపై అసంతృప్తి వ్యక్తం చేశాడు. జట్టులో ముగ్గురు వికెట్‌ కీపర్లకు చోటిచ్చి.. సంజూను మాత్రం ఎందుకు పక్కనపెట్టారని ప్రశ్నించాడు. టెస్టుల్లో ఆడుతున్నాడనే కారణంతో ధ్రువ్‌ జురెల్‌ను వన్డేలకు కూడా సెలక్ట్‌ చేయడం అస్సలు కరెక్ట్ కాదన్నాడు.

“సౌతాఫ్రికాతో వన్డే సిరీస్‌ కోసం ఎంపిక చేసే భారత జట్టులో ఒక పేరు కచ్చితంగా ఉండాలని నేను అనుకున్నా. అతడు మరెవరో కాదు సంజూ శాంసన్‌. రెండేళ్ల క్రితం ఆడిన చివరి వన్డే మ్యాచ్‌లో అతడు సెంచరీ కొట్టాడు. కానీ ఆ తర్వాత కనుమరుగైపోయాడు. ఇటీవల ఆస్ట్రేలియాతో వన్డే సిరీస్‌కు కూడా సంజూను ఎంపిక చేయలేదు. అయినప్పటికీ సౌతాఫ్రికాతో సిరీస్‌కు ఎంపిక చేస్తారని భావించా. ఆడిన చివరి మ్యాచ్‌లో శతకం బాదిన ఆటగాడు జట్టులో చోటు కచ్చితంగా అర్హుడే” అని అనిల్‌ కుంబ్లే అభిప్రాయపడ్డాడు.

దక్షిణాఫ్రికాతో వన్డే సిరీస్‌కు వికెట్‌ కీపర్‌ బ్యాటర్లు కెప్టెన్‌ కేఎల్‌ రాహుల్‌తో పాటు రిషభ్‌ పంత్‌, ధ్రువ్‌ జురెల్‌ను బీసీసీఐ ఎంపిక చేసింది. సీనియర్‌ అయిన సంజూను కాదని.. ఇప్పటివరకు ఒక్క వన్డే మ్యాచ్ కూడా ఆడని జురెల్‌ను సెలక్టర్లు ఎంపిక చేయడం చర్చనీయాంశంగా మారింది. జురెల్‌ ఇప్పటి వరకు టీమిండియా తరఫున 9 టెస్టులు, 4 టీ20 మ్యాచ్‌లు ఆడాడు. టెస్టుల్లో 457, టీ20లలో 12 పరుగులు చేశాడు. మరోవైపు సంజూ శాంసన్ చివరి వన్డే మ్యాచ్‌ రెండేళ్ల క్రితం దక్షిణాఫ్రికాలో ఆడాడు. ఆ మ్యాచ్‌లో సెంచరీ చేశాడు. అప్పటి నుంచి జట్టులో చోటు కోల్పోయాడు.

దక్షిణాఫ్రికా వన్డే సిరీస్‌కు భారత జట్టు:

రోహిత్ శర్మ, యశస్వి జైశ్వాల్, విరాట్ కోహ్లీ, తిలక్ వర్మ, కేఎల్ రాహుల్ (కెప్టెన్, వికెట్‌ కీపర్), రిషభ్‌ పంత్ (వికెట్‌ కీపర్), వాషింగ్టన్ సుందర్, రవీంద్ర జడేజా, కుల్‌దీప్ యాదవ్, నితీశ్‌ కుమార్ రెడ్డి, హర్షిత్ రాణా, రుతురాజ్ గైక్వాడ్, ప్రసిద్ధ్ కృష్ణ, అర్ష్‌దీప్ సింగ్, ధ్రువ్ జురెల్.

భారత్, దక్షిణాఫ్రికా వన్డే సిరీస్ షెడ్యూల్..

తొలి వన్డే: నవంబర్ 30 - రాంచీ

రెండో వన్డే: డిసెంబర్ 03 - రాయ్‌పూర్

మూడో వన్డే: డిసెంబర్ 06 - విశాఖపట్నం