కాలేయానికి ఇన్ఫెక్షన్ సోకితే శరీరంలో కనిపించే లక్షణాలు ఇవే

మానవ శరీరంలో ప్రధాన అవయవం కాలేయం. మనిషి ఆరోగ్యం మొత్తం కాలేయంపై ఆధారపడి ఉంటుంది. టాక్సిన్లు తొలగించడం, జీర్ణక్రియకు సాయపడటం, రక్తాన్ని క్లీన్ చేయడం వరకు ఎన్నో విధుల్ని కాలేయం నిర్వహిస్తుంది. కాలేయం సరిగ్గా పనిచేయకపోడవం, దాని సంబంధిత వ్యాధుల కారణంగా ప్రమాదంలో పడే పరిస్థితి ఉంది.

ప్రస్తుత జీవనశైలి కారణంగా చాలా మంది కాలేయాలు అనారోగ్యానికి గురవుతున్నాయి. చెడు ఆహారపు అలవాట్లు, మద్యపానం కాలేయ పనితీరును ప్రభావితం చేస్తున్నాయి. దీంతో లివర్ ఇన్ఫెక్షన్, తీవ్రమైమ అనారోగ్యంగా అభివృద్ధి చెందుతుంది. లివర్ పూర్తిగా దెబ్బతినకముందే కొన్ని జాగ్రత్తలు తీసుకోవాలి.

లివర్ ఇన్ఫెక్షన్‌ను చాలా మంది నిర్లక్ష్యం చేస్తారు. శరీరంలో కనిపించే కొన్ని లక్షణాలతో లివర్ ఇన్ఫెక్షన్‌ను గుర్తించవచ్చు. లేదంటే లివర్ సిర్రోసిస్, హెపటైటిస్, లివర్ డ్యామేజ్ వంటి ప్రమాదాల్ని పెంచుతుంది. కాలేయంలో ఇన్ఫెక్షన్ ఉంటే ఎలాంటి లక్షణాలు కనిపిస్తాయో ఇప్పుడు చుద్దాం.

ఆకలి లేకపోవడం

ఆహారం సరిగ్గా జీర్ణం కావడంలో కాలేయం ప్రధాన పాత్ర పోషిస్తుంది. అలాంటి లివర్‌కి ఇన్ఫెక్షన్ సోకితే.. ఆహారం సరిగ్గా జీర్ణం అవ్వదు. దీంతో ఆకలి లేకపోవడం, సరిగ్గా తినకపోవడం వంటి లక్షణాలు కనిపిస్తాయి. మీకు ఎటువంటి కారణంగా ఆకలి లేకపోతే వెంటనే అలర్ట్ అవ్వాలని నిపుణులు సూచిస్తున్నారు. వైద్యుణ్ని సంప్రదించి తగిన సలహా తీసుకోవాలి.

చర్మంపై దద్దుర్లు కనిపిస్తాయి

కాలేయానికి ఇన్ఫెక్షన్ సోకితే చర్మంపై దురద, దద్దర్లు, మంట వంటివి కనిపిస్తాయి. మీరు క్రమం తప్పకుండా పరిశుభ్రత పాటించినప్పటికీ దురదను అనుభవిస్తే అలర్ట్ అవ్వండి. ఎటువంటి కారణం లేకుండా చర్మంపై దద్దుర్లు, దురద ఏర్పడితే.. ఇది అనారోగ్యకరమైన కాలేయానికి సంకేతం కావచ్చు.

వాంతులు, వికారం

కాలేయంలో ఇన్ఫెక్షన్ ఉంటే జీర్ణక్రియ సరిగ్గా జరగదు. దీంతో వాంతులు, వికారం వంటి సమస్యలు ఏర్పడుతాయి. ఆహారం లేదా ఏదైనా పానీయం సరిగ్గా జీర్ణం కాకపముందే వాంతులు చేసుకోవచ్చు. మీరు కూడా ఈ లక్షణాన్ని గమనిస్తే వెంటనే అలర్ట్ అవ్వండి. వైద్యుణ్ని సంప్రదించి తగిన సలహా తీసుకోండి.

ఈ లక్షణాలు కూడా కనిపిస్తాయి

​కాలేయ ఇన్ఫెక్షన్లు ఎటువంటి స్పష్టమైన కారణం లేకుండానే తరచూ జ్వరానికి కారణమవుతాయి. ఈ ఇన్ఫెక్షన్ శరీరానికి క్రిములతో పోరాడే సామర్థ్యాన్ని బలహీనపరుస్తుంది. దీని వల్ల పదే పదే జ్వరాలు వస్తాయి.

లివర్ ఇన్ఫెక్షన్లు తీవ్రమైన అలసటకు కారణమవుతాయి. ఈ ఇన్ఫెక్షన్ శరీర శక్తిని తగ్గిస్తుంది. చిన్న చిన్న పనులు చేసిన తర్వాత కూడా అలసటకు కారణమవుతుంది. వివరించలేని అలసట లివర్ ఇన్ఫెక్షన్‌కు సంకేతం కావచ్చు.

కాలేయ ఇన్ఫెక్షన్లు శరీరంలోని బిలిరుబిన్ సమతుల్యతను దెబ్బతీస్తాయి. దీని వల్ల చర్మం, కళ్ళు పసుపు రంగులోకి మారుతాయి. చర్మం, కళ్లు పసుపు రంగులోకి మారితే వెంటనే వైద్యుణ్ని సంప్రదించండి.

కాలేయ ఇన్ఫెక్షన్ మూత్రం రంగులో మార్పులకు కారణమవుతుంది. ఇన్ఫెక్షన్ వల్ల మూత్రం ముదురు పసుపు రంగులో వస్తుంది.

కాలేయ ఇన్ఫెక్షన్ వల్ల కడుపు నొప్పి, వాపు అనిపించవచ్చు. ఉదరం ఎగువ భాగంలో ఈ నొప్పి ఉంటుంది.

ఎలా నివారించాలి?

లివర్ ఇన్ఫెక్షన్లను నివారించడానికి ఆహారం నుంచి ప్రాసెస్ చేసిన ఆహారాలను తొలగించండి. షుగరీ డ్రింక్స్, చక్కెర పదార్థాలకు దూరంగా ఉండండి. ఆహారంలో ఆకుపచ్చ కూరగాయలు, ఆకుకూరలు, పండ్లను చేర్చుకోండి. మద్యం, ధూమపానం మానేయండి. రోజూ కనీసం ముప్పై నిమిషాలైనా వ్యాయామం చేయండి. ఒత్తిడిని నిర్వహించడానికి యోగా, వ్యాయామం జీవనశైలిలో భాగం చేసుకోండి.