కొన్ని చిట్కాలతో నకిలీ నల్ల మిరియాల్ని గుర్తించండి

ఈ రోజుల్లో కల్తీ రాయులు రెచ్చిపోతున్నారు. అనేక నకిలీ ఉత్పత్తులు మార్కెట్‌ను ముంచెత్తుతున్నాయి. వీటిని గుర్తించడం చాలా కష్టంగా మారింది. బియ్యం నుంచి కూరగాయల వరకు ప్రతిదానిలోనూ కల్తీ సర్వసాధారణం అయిపోయింది. మార్కెట్లో జరిగే నకిలీ గురించి మనం రోజూ వార్తల్లోనే చూస్తూనే ఉన్నాం. ఇక వంటలకు, బిర్యానీలకు స్పెషల్ రుచి అందించే సుగంధ ద్రవ్యాల్ని కూడా కల్తీ చేస్తున్నారు. సుగంధ ద్రవ్యాల్లో నల్ల మిరియాలకు ప్రత్యేక స్థానం ఉంది. నల్ల మిరియాలకు వంటలకు రుచిని ఇవ్వడమే కాకుండా ఆరోగ్యానికి ఎంతో మేలు చేస్తాయి. అయితే, నకిలీ మిరియాలు తింటే ఆరోగ్యం కాస్తా పాడవుతుంది.

నల్ల మిరియాల కల్తీని గుర్తించడం చాలా కష్టం. నకిలీ, నిజమైన నల్ల మిరియాల మధ్య వ్యత్యాసం ఖచ్చితంగా తెలుసుకోవాలి. లేదంటే ఆ తర్వాత చింతించాల్సి ఉంటుంది. మిరియాల్లో ఎండిన బొప్పాయి గింజలతో పాటు ఇంకొన్ని గింజల్ని కలుపుతున్నారు. వీటిని గుర్తించకపోతే ఆరోగ్యం దెబ్బతింటుంది. ఇంట్లోనే కొన్ని చిట్కాల ద్వారా నకిలీ నల్ల మిరియాల్ని గుర్తించవచ్చు. ఆ చిట్కాలేంటో ఇప్పుడు చుద్దాం.

నల్ల మిరియాల్ని ఎలా కల్తీ చేస్తారు?

నల్ల మిరియాల్ని లాభం కోసం కల్తీ చేస్తున్నారు. చౌకగా దొరికే ఎండిన బొప్పాయి గింజలతో నల్ల మిరియాల్ని కల్తీ చేస్తున్నారు. ఇందుకోసం పండిన బొప్పాయిల్ని కోసి.. అందులోని గింజల్ని కడిగి ఎండబెడతారు. పూర్తిగా ఎండినప్పుడు అవి నల్లగా మారి నల్ల మిరియాల మాదిరిగా కనిపిస్తాయి. ఈ ఎండిన బొప్పాయి గింజలు చాలా చవకైనవి. ఇక, లేత గోధుమ రంగు లేదా నిస్తేజమైన బొప్పాయి గింజల్ని నిజమైన నల్ల మిరియాల్లా కనిపించడానికి రంగులు వేస్తారు. వీటిని తింటే ఆరోగ్యం పాడవుతుంది. కొన్ని చిట్కాలతో నకిలీ నల్ల మిరియాల్ని గుర్తించవచ్చు.

నీటి పరీక్ష ద్వారా గుర్తించవచ్చు

నల్ల మిరియాల స్వచ్ఛతను పరీక్షించడానికి ఇది సులభమైన మార్గం. ఇందుకోసం ఒక గ్లాసు నీరు తీసుకొని ఒక టీస్పూన్ నల్ల మిరియాల గింజల్ని అందులో వేయండి. నిజమైన నల్ల మిరియాల బరువు తక్కువగా ఉంటుంది, కాబట్టి అవి ఉపరితలంపై తేలుతాయి. అయితే, నకిలీ లేదా కల్తీ నల్ల మిరియాల గింజలు నీటిలో మునిగిపోతాయి. ఎందుకంటే బొప్పాయి గింజలు నల్ల మిరియాల గింజల కంటే ఎక్కువ సాంద్రత కలిగి ఉంటాయి.

నకిలీ నల్ల మిరియాల్ని ఇలా కనిపెట్టండి?

వాసన పరీక్షతో కనిపెట్టొచ్చు

ఇందుకోసం మీ అరచేతిలోకి కొన్ని నల్ల మిరియాల్ని తీసుకోండి. ఆ తర్వాత వాటిని సున్నితంగా రుద్దండి. రుద్దిన తర్వాత నల్ల మిరియాలు నిజనమైనవి అయితే.. వాటి నుంచి బలమైన, ఘాటైన వాసన వస్తుంది. ఇది నల్ల మిరియాల లక్షణం. మిరియాల గింజలు వాసన లేకుండా ఉంటే.. లేదా మట్టి వాసన వస్తుంటే.. అవి పాతవి లేదా కల్తీ అయి ఉండొచ్చు.

పేపర్ టెస్ట్‌తో గుర్తించవచ్చు

నల్ల మిరియాల్ని తరచుగా మినరల్ ఆయిల్ లేదా గ్రీజుతో కల్తీ చేస్తారు. దీంతో అవి మెరుస్తూ, తాజాగా కనిపిస్తాయి. స్వచ్ఛతను తనిఖీ చేయడానికి.. తెల్లటి కాగితంపై కొన్ని మిరియాల్ని ఉంచి తేలికగా నొక్కండి. కాగితంపై నూనె గుర్తు లేదా మరక కనిపిస్తే, మిరియాలను కృత్రిమంగా ప్రకాశవంతం చేయడానికి ఆయిల్ లేదా గ్రీజు వాడారని అర్థం. స్వచ్ఛమైన నల్ల మిరియాలు అయితే.. ఎలాంటి మరకలు కూడా కనిపించవు.

ఫుడ్ సేఫ్టీ అండ్ స్టాండర్డ్స్ అథారిటీ ఆఫ్ ఇండియా నకిలీ నల్ల మిరియాల్ని ఎలా కనిపెట్టొచ్చో చెప్పింది. స్వచ్ఛమైన నల్ల మిరియాలు ముదురు నలుపు, ముడతలు పడి, దాదాపు ఒకే పరిమాణంలో ఉంటాయి. కొనుగోలు చేసిన విత్తనాల్లో గోధుమ లేదా లేత నలుపు, నునుపుగా, ఖచ్చితంగా గుండ్రంగా ఉండే విత్తనాలను చూసినట్టయితే.. అవి ఎండిన బొప్పాయి గింజలు. ఒక పేపర్‌ మీద ఉంచి భూతద్దంతో మీరు పరీక్షించవచ్చు. బొప్పాయి గింజలు నల్ల మిరియాల గింజల కంటే కొంచెం చిన్నవి. మీరు జాగ్రత్తగా చూస్తే ఈ తేడాను గుర్తించడం సులభం.

నకిలీ నల్ల మిరియాలు తింటే ఆరోగ్యానికి ముప్పు

​కొన్ని నివేదికల ప్రకారం, నకిలీ మిరియాల్ని తినడం వల్ల దురద, దద్దుర్లు, ఎరుపు వంటి చర్మ లక్షణాలు కనిపిస్తాయి.

నకిలీ నల్ల మిరియాల్ని తినడం వల్ల కడుపుకు సంబంధించిన సమస్యలు వస్తాయి. ఇది కడుపు పూతలకు కూడా దారితీస్తుంది.

జీర్ణ సమస్యలు కూడా తలెత్తవచ్చు. కడుపులో మంట, అజీర్ణం, వికారం, వాంతులు వంటి సమస్యలు వస్తాయి. అందుకే మార్కెట్ నుంచి నల్ల మిరియాలు కొనేటప్పుడు స్వచ్ఛతను చెక్ చేయాలని నిపుణులు చెబుతున్నారు.