ఇజ్రాయెల్ ప్రధానిపై ఢిల్లీ పేలుడు ఘటన ఎఫెక్ట్.. మూడోసారి ఆ కీలక పర్యటన రద్దు

ఇజ్రాయెల్ ప్రధాన మంత్రి బెంజమిన్ నెతన్యాహు భారత్ పర్యటన మరోసారి వాయిదా పడింది. ప్రధాన మంత్రి నరేంద్ర మోదీతో సమావేశం కోసం ఈ ఏడాది చివర్లో షెడ్యూల్ చేసిన ఈ పర్యటన.. రెండు వారాల క్రితం న్యూఢిల్లీలో జరిగిన భయంకరమైన ఆత్మాహుతి దాడి నేపథ్యంలో భద్రతాపరమైన ఆందోళనల కారణంగా రద్దు అయింది. అయితే ఈ పర్యటన రద్దు కావడం ఇదే తొలిసారి కాదు. గతంలోనే రెండు సార్లు పలు కారణాల వల్ల నెతన్యాహు భారత పర్యటన రద్దయింది.

మూడోసారి వాయిదా..

భారత దేశానికి రావాలన్న నెతన్యాహు ప్రణాళిక ఈ ఏడాది రద్దు కావడం ఇది మూడోసారి. దీనికి సంబంధించి ఇజ్రాయెల్ మీడియా సంస్థ ఓ నివేదిక విడుదల చేసింది. భద్రతా పరిస్థితులపై తాజా అంచనాల తర్వాత నెతన్యాహు వచ్చే ఏడాది కొత్త తేదీని ఖరారు చేసుకునే అవకాశం ఉందని ఆ నివేదిక పేర్కొంది. నెతన్యాహు 2018 జనవరిలో భారత్‌లో పర్యటించారు. గత కొంతకాలంగా ఇరు దేశాల ప్రధానులైన మోదీ, నెతన్యాహు మధ్య బలమైన వ్యక్తిగత సాన్నిహిత్యం ఏర్పడింది. 2017లో మోదీ ఇజ్రాయెల్‌లో పర్యటించిన తొలి భారత ప్రధానిగా నిలిచారు. ఈ సన్నిహిత సంబంధాల గురించి భారత, ఇజ్రాయెల్ పత్రికల్లో తరచుగా చర్చ జరుగుతుంటుంది.

ఈ పర్యటన నెతన్యాహు రాజకీయ వ్యూహంలో కూడా కీలకమైంది. ఇజ్రాయెల్‌లో అసాధారణంగా పదేపదే ఎన్నికలు జరుగుతున్న నేపథ్యంలో.. నెతన్యాహు ప్రపంచ వ్యాప్తంగా తనకున్న మద్దతును ప్రదర్శించడానికి ఈ పర్యటనను ఉపయోగించుకోవాలని భావించారు. గతంలో ఏప్రిల్‌లో, ఆపై సెప్టెంబర్ 9వ తేదీన ఇజ్రాయెల్‌లో జరిగిన అసాధారణ పునః-ఎన్నికల కారణంగా ఆయన తన పర్యటనలను రద్దు చేసుకున్నారు.

గతంలో నెతన్యాహు రాజకీయ పార్టీ ఆయన ప్రపంచ నాయకులతో ఉన్న సాన్నిహిత్యాన్ని ప్రదర్శించడానికి వీలుగా ప్రధాని మోదీ, అమెరికా అధ్యక్షుడు డొనాల్డ్ ట్రంప్, రష్యా అధ్యక్షుడు వ్లాదిమిర్ పుతిన్‌లతో ఉన్న చిత్రాలతో కూడిన బ్యానర్లను ప్రదర్శించింది. ఇజ్రాయెల్ రాజకీయాల్లో తన స్థాయిని, ముఖ్యంగా దేశ భద్రతకు తాను ఎంత కీలకమో నిరూపించుకోవడానికి నెతన్యాహు ఈ వ్యూహాన్ని అనుసరించారు.

ప్రస్తుత పరిస్థితుల్లో ఢిల్లీలో జరిగిన ఉగ్రదాడి భద్రతా ఆందోళనలను పెంచడంతో.. ఇజ్రాయెల్ అత్యున్నత భద్రతా ప్రమాణాలను దృష్టిలో ఉంచుకుని ఈ పర్యటనను రద్దు చేసినట్లు తెలుస్తోంది. ఇరు దేశాల మధ్య దౌత్య సంబంధాలు బలంగా ఉన్నప్పటికీ.. ప్రస్తుత పరిస్థితుల్లో నెతన్యాహు రాక సురక్షితం కాదనే నిర్ణయానికి వచ్చినట్లు నివేదికలు సూచిస్తున్నాయి. ఈ పర్యటన వాయిదా ఇరు దేశాల దౌత్య కార్యక్రమాలలో స్వల్ప అవాంతరాన్ని కలిగించినప్పటికీ, త్వరలోనే కొత్త తేదీని ఖరారు చేసే అవకాశం ఉంది.