మార్కుల ఒత్తిడి తట్టుకోలేక ,,,బిల్డింగ్ పైనుంచి దూకి విద్యార్థిని ఆత్మహత్య

మార్కుల విషయంలో తల్లిదండ్రులు మందలించడంతో తీవ్ర మనస్తాపానికి గురైన ఓ పదవ తరగతి విద్యార్థిని ఆత్మహత్య చేసుకున్న ఘటన హైదరాబాద్ హబ్సిగూడ ప్రాంతంలో చోటుచేసుకుంది. భవనంపై నుంచి దూకి ఆ బాలిక బలవన్మరణానికి పాల్పడటం స్థానికంగా తీవ్ర విషాదాన్ని నింపింది. వివరాల్లోకి వెళితే.. హబ్సిగూడ ప్రాంతానికి చెందిన శ్రీ వైష్ణవి స్థానికంగా ఓ ప్రైవేటు స్కూల్‌లో పదో తరగతి చదువుతోంది. మార్కులు తక్కువ వస్తున్నాయని ఇటీవల తల్లిదండ్రులు ఆమెను మందలించినట్లు తెలుస్తోంది. ఈ మందలింపును తట్టుకోలేకపోయిన వైష్ణవి.. తీవ్ర మనస్థాపానికి గురైంది.

ఇవాళ ఉదయం వైష్ణవి తాను నివసిస్తున్న భవనం పైకి వెళ్లి ఒక్కసారిగా కిందికి దూకింది. ఈ సంఘటనతో స్థానికులు ఉలిక్కిపడ్డారు. తీవ్ర గాయాలైన వైష్ణవిని వెంటనే స్థానిక ఆసుపత్రికి తరలించే ప్రయత్నం చేసినప్పటికీ ఫలితం లేకుండా పోయింది. సమాచారం అందుకున్న ఉస్మానియా యూనివర్సిటీ (OU) పోలీసులు హుటాహుటిన సంఘటన స్థలానికి చేరుకున్నారు. వారు మృతదేహాన్ని స్వాధీనం చేసుకుని.. పోస్ట్‌మార్టం కోసం గాంధీ ఆసుపత్రికి తరలించారు. ఈ ఘటనపై పోలీసులు కేసు నమోదు చేసి.. ఆత్మహత్యకు దారితీసిన పరిస్థితులపై విచారణ చేపట్టారు.

కాగా, శ్రీ వైష్ణవి ఆత్మహత్య నిజంగా అత్యంత దురదృష్టకరం, బాధాకరం. తమ జీవితంలో ఎదుర్కొనే చిన్న చిన్న ఒత్తిళ్లకు ఇంతటి తీవ్ర నిర్ణయం తీసుకోవడం కలచివేస్తుంది. విద్యార్థుల సామర్థ్యాన్ని, భవిష్యత్తును కేవలం మార్కుల ఆధారంగా అంచనా వేయడం సరైంది కాదు. పిల్లలు ఎదుర్కొనే విద్యా ఒత్తిడిని తల్లిదండ్రులు అర్థం చేసుకోవాల్సిన అవసరం ఉంది. వారికి స్నేహితుల్లా మద్దతుగా నిలబడి.. మందలించడం కంటే ప్రేమగా ప్రోత్సహించాలి. పిల్లల మానసిక ఆరోగ్యంపై దృష్టి పెట్టడంటో పాటు వారికి భయం కలిగించే వాతావరణం నుంచి దూరం కావాలి.

అదే సమయంలో విద్యార్థులు కూడా ఒత్తిడికి గురికావద్దు. పరీక్షల్లో తక్కువ మార్కులు రావడం అనేది తాత్కాలికమే. అది మీ జీవితాన్ని, భవిష్యత్తును నిర్ణయించదనే విషయాన్ని గుర్తుంచుకోవాలి. ఒత్తిడి అనిపించినా, భయం వేసినా తల్లిదండ్రులు, స్నేహితులు, ఉపాధ్యాయులు లేదా కౌన్సిలర్‌తో తప్పకుండా మాట్లాడాలి. ప్రతి సమస్యకు పరిష్కారం ఉంటుంది. ఆత్మహత్య అంతిమ పరిష్కారం కాదనే విషయాన్ని మర్చిపోవద్దు. విద్యార్థులు, తల్లిదండ్రులు చదువును ఆరోగ్యకరమైన వాతావరణంలో భాగం చేయాలే కానీ.. ఒత్తిడికి దారి తీయకూడదు.