రాజోలు పర్యటనలో పవన్‌కు దగ్గరగా తిరిగిన YCP కార్యకర్త.. డిప్యూటీ సీఎం ఆఫీసు అలర్ట్!

ఉప ముఖ్యమంత్రి పవన్ కళ్యాణ్ రాజోలు నియోజకవర్గంలో చేపట్టిన పర్యటన సందర్భంగా ఒక అపరిచిత వ్యక్తి అనుమానాస్పదంగా కదలాడటంతో డిప్యూటీ సీఎం కార్యాలయం తీవ్ర అప్రమతమైంది. శంకరగుప్తం డ్రెయిన్ వల్ల దెబ్బతిన్న కొబ్బరి తోటలను పరిశీలిస్తున్న సమయంలోనే ఈ వ్యక్తి పవన్ సమీపంలోనే కనిపించడం మొదలైంది. అధికారులతో చర్చలు జరుపుతున్నప్పుడు, ఆ తర్వాతి కార్యక్రమాల్లో కూడా ఆ వ్యక్తి ఎప్పుడూ దగ్గరలోనే ఉండటం భద్రతా సిబ్బందికి అనుమానం కలిగించింది.
పవన్ కళ్యాణ్‌ను ఎప్పటికప్పుడు దగ్గరగా గమనిస్తూ, ఆయన కదలికలకు అనుగుణంగా సంచరించిన ఆ వ్యక్తి గురించి డిప్యూటీ సీఎం కార్యాలయం వెంటనే సమాచారం సేకరించింది. తాజాగా వెలుగులోకి వచ్చిన సమాచారం ప్రకారం ఆ వ్యక్తి రాజోలు నియోజకవర్గానికి చెందిన వైసీపీ కార్యకర్త అని తేలింది. ఈ విషయం తెలిసిన వెంటనే భద్రతా బృందం అప్రమతమై, ఆ వ్యక్తి కదలికలను గమనించడం మొదలుపెట్టింది.
ఈ ఘటనను డిప్యూటీ సీఎం కార్యాలయం అత్యంత కీలకంగా భావించి, కోనసీమ జిల్లా ఎస్పీ రవీంద్రనాథ్ రెడ్డికి అధికారికంగా సమాచారం అందించింది. పవన్ కళ్యాణ్ భద్రతను దృష్టిలో ఉంచుకుని ఈ విషయంలో ఎలాంటి రిస్క్ తీసుకోవడం లేదని, ఆ వ్యక్తి నేపథ్యాన్ని పూర్తిగా పరిశీలిస్తున్నట్లు అధికార వర్గాలు తెలిపాయి.
ప్రస్తుతం ఆ వైసీపీ కార్యకర్తపై పోలీసులు దృష్టి సారించారు. రాజోలు పర్యటనలో జరిగిన ఈ అనుమానాస్పద ఘటన రాజకీయ వర్గాల్లో చర్చనీయాంశంగా మారింది. రాష్ట్రంలో ఇప్పటికే ఉద్రిక్త వాతావరణం నెలకొన్న నేపథ్యంలో పవన్ కళ్యాణ్ భద్రతపై ఇలాంటి అప్రమత్తత రాజకీయ పరిణామాలపై కొత్త చర్చను రేకెత్తిస్తోంది.