చికెన్ లేదా మటన్‌ను ఫ్రిజ్‌లో ఎన్ని రోజులు పెట్టొచ్చు

ఆరోగ్యం విషయంలో ఆహారం కీలక పాత్ర పోషిస్తుంది. ఆహారం శుచి, శుభ్రత విషయంలో ఎన్నో జాగ్రత్తలు తీసుకోవాలి. లేదంటే అనారోగ్యం పాలయ్యే ప్రమాదముంది. ఇంట్లో వండిన భోజనం ఆరోగ్యకరమైంది. చాలా మంది ఇళ్లల్లో ఫ్రిజ్‌ని ఉపయోగిస్తుంటారు. ఈ ఫ్రిజ్‌ని రకరకాల ఆహార పదార్థాల్ని స్టోర్ చేయడానికి ఉపయోగిస్తారు. పండ్లు, కూరగాయలు, పచ్చళ్లు, వండిన కూరలు ఇలా స్టోర్ చేస్తుంటారు. వీటికి ఒక టైమ్ పరిమితి ఉంటుంది. ఎక్కువ రోజులు స్టోర్ చేస్తే పాడైపోతాయి. చికెన్, మటన్ విషయంలో ఒక సమయ పరిమితి ఉంటుంది.

చికెన్ లేదా మటన్‌ను ఎక్కువసేపు నిల్వ చేయడం వల్ల వాటి పోషక విలువలతో పాటు రుచి కూడా ప్రభావితమవుతుంది. చికెన్ లేదా మటన్ వంటి మాంసాలు రిఫ్రిజిరేటర్లో నిల్వ చేసిన తర్వాత ఎంతకాలం తాజాగా ఉంటాయో తెలుసుకోవడం చాలా ముఖ్యం. ఎన్ని రోజుల వరకు అవి సేఫ్‌గా ఉంటాయో ఇప్పుడు చుద్దాం.

చికెన్ ఎంతకాలం తాజాగా ఉంటుంది?

మీరు పచ్చి చికెన్‌ను రిఫ్రిజిరేటర్లో ఉంచాలనుకుంటే, ఒకటి లేదా రెండు రోజుల్లో మాత్రమే ఉంచాలి. ఆ తర్వాత వండుకోవడానికి ఉపయోగించాలి. అయితే, చికెన్‌ను గట్టిగా సీల్ చేసిన ప్యాకేజీలో ఉంచి ఫ్రీజర్‌లో వారాల పాటు నిల్వ ఉంచవచ్చు. చికెన్‌లో తేమ ఎక్కువగా ఉంటుంది.

రిఫ్రిజిరేటర్ ఉష్ణోగ్రతలో దాని కణజాలాలు విచ్ఛిన్నమవుతాయి. దీనివల్ల అది వేగంగా చెడిపోతుంది. చికెన్ వింతగా వాసన వస్తే లేదా లేత బూడిద రంగులో కనిపిస్తే, అది చెడిపోతోందని అర్థం. కొన్నిసార్లు, చెడిపోయిన చికెన్ జిగటగా కూడా ఉంటుంది. అందుకే ఒకటి లేదా రెండు రోజుల కంటే ఎక్కువ సమయం స్టోర్ చేయకూడదు.

మటన్ ఎంతకాలం తాజాగా ఉంటుంది?

మటన్‌ను రిఫ్రిజిరేటర్‌లో మూడు నుంచి ఐదు రోజుల స్టోర్ చేయవచ్చని హెల్త్ లైన్ నివేదిక చెబుతుంది. అయితే, మటన్‌లోని కొవ్వు చుట్టుపక్కల వాసనల్ని త్వరగా గ్రహిస్తుంది. దీనిని నివారించడానికి దానిని లీక్ ప్రూఫ్ ప్యాకేజీలో సీలు చేయాలి.

ఇంట్లో అదనపు మటన్ ఉంటే, దానిని సీలు చేయడం ద్వారా రిఫ్రిజిరేటర్లో సులభంగా నిల్వ చేయవచ్చు. మటన్ చెడిపోయినప్పుడు వాసవ వస్తుంది. అంతేకాకుండా జిగటగా ఉంటుంది. మటన్ రంగు కూడా మారడం ప్రారంభమవుతుంది. ఇలాంటి మటన్ తింటే ఆరోగ్యానికి హానికరం.

చేపలు ఎంతకాలం తాజాగా ఉంటాయి?

చేపలు ఉష్ణోగ్రత మార్పులకు వేగంగా స్పందిస్తాయి. ఫ్రిజ్‌లో ఉంచినప్పటికీ, అది దాని తాజాదనాన్ని కోల్పోవడం ప్రారంభిస్తుంది. అందువల్ల చేపల్ని కొనుగోలు చేసిన వెంటనే వండటం మంచిది. రిఫ్రిజిరేటర్‌లో ఉంచాలనుకుంటే ఐస్ క్యూబ్స్‌తో నిండి ఉన్న గిన్నెలో చేపల్ని ఉంచి స్టోర్ చేయవచ్చు. చేప చెడిపోయినప్పుడు అదో రకమైన నీచు వాసన వస్తుంది. దాని పట్టుకోగానే జిగట జిగటగా ఉంటుంది.

వండినవి అయితే ఎంతకాలం ఉంచాలి?

చాలా మంది వండిన తర్వాత కూడా చికెన్ లేదా మటన్‌ను ఫ్రీజ్‌లో ఉంచుతారు. అయితే, వండిన చికెన్‌ను 3 నుంచి 4 రోజుల కంటే ఎక్కువ రిఫ్రిజిరేటర్‌లో ఉంచకూడదు. వండిన మటన్‌ను కూడా 3 నుంచి 4 రోజుల కంటే ఎక్కువ ఫ్రిజ్‌లో ఉంచకూడదని నిపుణులు అంటున్నారు. అంతకంటే ఎక్కువసేపు నిల్వ చేయడం వల్ల సమస్యలు వస్తాయి.

ఏ విషయాల్ని గుర్తించుకోవాలి?

​చికెన్‌ లేదా మటన్‌ను ఫ్రిజ్‌లో ఉంచే ముందు వాటిని బాగా కడిగి రక్తాన్ని తొలగించడానికి ప్రయత్నించండి.

చికెన్‌ లేదా మటన్ ఫ్రిజ్‌లో ఉంచే ముందు వాటిని బాగా ఆరబెట్టి, గాలి చొరబడని కంటైనర్‌లో ఉంచండి.

మాంసాన్ని ఎల్లప్పుడూ తక్కువ ఉష్ణోగ్రత వద్ద ఫ్రీజర్‌లో ఉంచండి. ఉష్ణోగ్రత తక్కువగా ఉంటే.. అవి అంత సురక్షితంగా ఉంటాయి.

మీరు చికెన్‌ను ఒక వారం పాటు ఫ్రిజ్‌లో ఉంచాలనుకుంటే. దానిని మ్యారినేట్ చేయవచ్చు. దీని కోసం పసుపు, ఉప్పు ఉపయోగించి మ్యారినేట్ చేసుకోవచ్చు.