'మీరు ఆ పని చేస్తే.. నేను వెనెజులాను వీడేందుకు సిద్ధం'

వెనెజులా అధ్యక్షుడు నికోలస్ మదురో తన పదవి నుంచి వైదొలగడానికి సిద్ధంగా ఉన్నట్లు అమెరికా అధ్యక్షుడు డొనాల్డ్ ట్రంప్‌తో జరిగిన రహస్య చర్చల్లో పేర్కొన్నట్లు అంతర్జాతీయ మీడియా తెలిపింది. ముఖ్యంగా తనతో పాటు తన కుటుంబానికి, కీలక అధికారులకు అమెరికా ఆంక్షల నుంచి పూర్తి ఉపశమనం లభిస్తే.. దేశాన్ని వీడేందుకు తాను సిద్ధంగా ఉన్నానని మదురో షరతు విధించినట్లు సమాచారం.

మదురో షరతులు ఇవే..

గత నెలలో ట్రంప్, మదురోలు 15 నిమిషాల కంటే తక్కువ సమయం పాటు ఫోన్‌లో మాట్లాడుకున్నారు. ఈ సంభాషణలో మదురో తన ఎగ్జిట్ ప్లాన్‌ను ప్రస్తావించారు. ముఖ్యంగా మదురో తనపై, తన కుటుంబంపై యూఎస్ విధించిన అన్ని ఆంక్షలను ఎత్తివేయాలని కోరారు. అంతేకాకుండా అంతర్జాతీయ క్రిమినల్ కోర్టు నుంచి తాను ఎదుర్కొంటున్న కేసును కూడా మూసివేయాలని డిమాండ్ చేశారు. అవినీతి, మాదక ద్రవ్యాల అక్రమ రవాణా, మానవ హక్కుల ఉల్లంఘనలకు సంబంధించి ఆంక్షలు ఎదుర్కొంటున్న 100 మందికి పైగా వెనెజులా అధికారులపై విధించిన ఆంక్షల నుంచి ఉపశమనం కల్పించాలని కూడా ఆయన ట్రంప్‌ను కోరినట్లు తెలిపింది.

మదురో షరతుల్లో చాలావాటిని ట్రంప్ తిరస్కరించినట్లు తెలుస్తోంది. మదురో తన కుటుంబంతో సహా దేశాన్ని వీడేందుకు ట్రంప్ ఒక వారం రోజులు గడువు విధించారు. ఆ గడువు శుక్రవారంతో ముగియడంతో.. వెనెజులా భూభాగంలో ఆపరేషన్లకు ట్రంప్ ప్రకటన చేసినట్లు సమాచారం. ట్రంప్ ఆదివారం మదురోతో ఫోన్‌లో మాట్లాడిన విషయాన్ని ధ్రువీకరించినప్పటికీ.. చర్చల వివరాలను మాత్రం బయటపెట్టలేదు.

మరోవైపు దేశంలో కారకాస్‌లో జరిగిన భారీ ర్యాలీలో నికోలస్ మదురో ప్రసంగించారు. విదేశాల నుంచి వస్తున్న ఒత్తిడికి, ఆధిపత్యానికి తమ దేశం లొంగబోదని స్పష్టం చేశారు. తమకు సమానత్వం, స్వేచ్ఛతో కూడిన శాంతి మాత్రమే కావాలని.. బానిసత్వంతో కూడిన శాంతి తమకు అక్కర్లేదని ప్రకటించారు. వెనుజులా ముఠాల నుంచి అమెరికాకు మాదకద్రవ్యాలు ముంచెత్తుతున్నాయని ట్రంప్ మొదటి నుంచి ఆందోళన వ్యక్తం చేస్తున్నారు. ఈ క్రమంలోనే యూఎస్ దళాల సైనిక కార్యకలాపాలను వెనెజులా భూభాగంపై ట్రంప్ విస్తరించారు. ఈ సైనిక కార్యకలాపాల విస్తరణపై చర్చించేందుకు ట్రంప్ అత్యున్నత జాతీయ భద్రతాధికారులతో సమావేశమయ్యేందుకు సిద్ధమైనట్లు వైట్‌హౌస్ ధ్రువీకరించింది.