రాత్రంతా కాపలా కాసి,,, పసికందును కాపాడిన వీధి కుక్కలు

పశ్చిమ బెంగాల్‌లోని పురూలియాలో హృదయాన్ని కదిలించే సంఘటన చోటుచేసుకుంది. మానవత్వం మరిచిన మనుషులు.. ఏడు రోజుల వయసున్న పసికందును పాడేసి పోగా.. వీధి కుక్కలే కుటుంబ సభ్యులుగా మారాయి. ముఖ్యంగా రాత్రంతా అవే చిన్నారికి కాపలా కాసి మరీ.. కాపాడాయి. ఒకటి కాదు రెండు కాదు.. ఏకంగా నాలుగు వీధి కుక్కలు చిన్నారిని కాపాడగా.. అంతా ఆశ్చర్యపోతున్నారు.

అసలేం జరిగిందంటే..?

నవంబర్ 29వ తేదీ అంటే శనివారం రోజు ఉదయం పాఠశాల ఉపాధ్యాయుడు ఉల్హాస్ చౌదరి.. ప్రతిరోజూ లాగే బడికి వెళ్తున్నారు. అయితే తన ఇంటి నుంచి అలా నడుచుకుంటూ వెళ్లగా.. పాఠర్ది పారా ప్రాంతంలోని పొదల్లోంచి చిన్నారి ఏడుపు వినిపించింది. దీంతో ఒక్కసారిగా ఆశ్చర్యపోయిన ఆయన ఇదెక్కడి నుంచి వస్తుందోనని చుట్టూ తిరిగి చూశారు. తన వెనకా ముందూ, పక్కన ఎవరూ లేకపోవడంతో.. చిన్నారి ఏడుపు ఎక్కడి నుంచి వినిపిస్తుందో వెతకడం ప్రారంభించారు. ఈక్రమంలోనే ఓ నాలుగు వీధి కుక్కలు దేనిచుట్టో తిరగడం గమనించారు. దీంతో వెంటనే వెళ్లి చూడగా.. అక్కడ ఓ చిన్నారి కనిపించింది.

ముఖ్యంగా లేత గులాబీ రంగు గుడ్డలో చుట్టి ఉన్న నవజాత శిశువుకు.. ఆ నాలుగు కుక్కలు కాపలా కాయడాన్ని చూసి షాకయ్యారు. ముఖ్యంగా కాకులు, గద్దల చిన్నారి దగ్గరకు వస్తుంటే.. అరుస్తూ వాటిని అక్కడి నుంచి అవి వెళ్లగొట్టగా.. చౌదరి తెగ సంబుర పడిపోయారు. వెంటనే చిన్నారి దగ్గరకు వెళ్లగా.. వీధి కుక్కలు సైతం తోక ఆడిస్తూ అక్కడే కూర్చుండిపోయాయి. చిన్నారిని చేతుల్లోకి తీసుకున్న చౌదరి.. స్థానికులకు చెందిన శిశువు అయ్యుండొచ్చని అక్కడి వారందరికీ సమాచారం ఇచ్చారు. అంతా హుటాహుటిని అక్కడికి చేరుకుని చిన్నారిని, కుక్కలు కాపలా కాయడం గురించి తెలుసుకుని షాకయ్యారు.

ముఖ్యంగా చిన్నారి గుక్కపెట్టి ఏడుస్తుండడం చూసిన పర్వీన్ సేన్ అనే మహిళ.. చిన్నారిని తీసుకుని పాలు పట్టింది. ఆమెకు కూడా ఏడాది వయసున్న బాబు ఉండగా.. శిశువు ఆకలి తెల్సుకుని ఆ పని చేసింది. ఆపై వీరంతా కలిసి చిన్నారిని చౌదరి ఇంటికి తీసుకెళ్లారు. ఆపై పోలీసులకు ఫోన్ చేసి విషయం చెప్పగా.. వారు చైల్డ్ హెల్ప్‌లైన్‌కు సమాచారం అందించారు. మరోవైపు చిన్నారిని ఎక్కడికి తీసుకు వెళ్తే కుక్కలు కూడా అక్కడికే వెళ్లాయి. చిన్నారిని చౌదరి ఇంట్లో ఉంచగా.. వీధి శునకాలు ఇంటి బయటే నిల్చున్నాయి.

అయితే తమకు సమాచారం అందిన గంటలోపే పోలీసులు చౌదరి ఇంటికి చేరుకున్నారు. చిన్నారిని తమ ఆధీనంలోకి తీసుకొని దేబెన్ మహతో సదర్ ఆసుపత్రికి తరలించారు. వైద్యులు ఆ చిన్నారికి ఏడు నుంచి పది రోజుల వయసు ఉంటుందని.. ప్రస్తుతం 2.8 కిలోల బరువు ఉందని ధృవీకరించారు. ఆమెకు కొద్దిపాటి కామెర్ల లక్షణాలు ఉన్నప్పటికీ.. భయపడాల్సిన అవసరం లేదని డాక్టర్ శివశంకర్ మహతో తెలిపారు. చిన్నారిని ప్రస్తుతం ఆసుపత్రిలోని నవజాత ప్రత్యేక సంరక్షణ విభాగంలో చేర్చారు.

ఆసుపత్రి నుంచి విడుదలైన తర్వాత చిన్నారిని భట్‌బంద్‌లోని ప్రభుత్వ ఆధ్వర్యంలో నడుస్తున్న గృహం-కమ్-దత్తత కేంద్రానికి తరలిస్తామని చైల్డ్ హెల్ప్‌లైన్ జిల్లా సమన్వయకర్త దీపాంకర్ సర్కార్ తెలిపారు. "ఆ కుక్కలు లేకపోతే మేము ఆ చిన్నారిని కోల్పోయి ఉండేవాళ్లం. మేము వాటికి ఎంతో కృతజ్ఞులం" అని చౌదరి అన్నారు. అంతేకాకుండా ఆ బుజ్జాయికి సానియా అని పేరు కూడా పెట్టారు.