29 ఏళ్లకే రూ.లక్ష కోట్ల కంపెనీ,,,ప్రపంచంలోనే అత్యంత పిన్నవయస్కురాలైన యువ బిలియనీర్

ప్రపంచంలోనే అత్యంత పిన్న వయస్కురాలైన స్వయంకృషి బిలియనీర్‌గా బ్రెజిల్‌కు చెందిన లువానా లోప్స్ లారా నిలిచింది. కేవలం 29 ఏళ్ల వయసులోనే బ్రెజిలియన్ పారిశ్రామికవేత్త లువానా లోప్స్ లారా.. ఈ ఘనత సాధించి.. చరిత్ర సృష్టించింది. ఆమె స్థాపించిన ప్రిడిక్షన్ మార్కెట్ ప్లాట్‌ఫారమ్ కాల్షి.. ఇటీవలే 11 బిలియన్ డాలర్లు అంటే మన భారత కరెన్సీలో ఏకంగా రూ.లక్ష కోట్లకు పైగా విలువను చేరుకోవడంతో ఆమెకు ఈ ఘనత దక్కింది.

బ్రెజిల్‌లో పుట్టిన లువానా లోప్స్ లారా.. ప్రతిష్టాత్మక బోల్షోయ్ థియేటర్ స్కూల్‌లో ప్రొఫెషనల్ బ్యాలరీనాగా (డ్యాన్సర్‌) ట్రైనింగ్ తీసుకుంది. హైస్కూల్ తర్వాత కొంతకాలం ఆస్ట్రియాలో ప్రొఫెషనల్‌గా ప్రదర్శనలు కూడా ఇచ్చింది. విద్యాభ్యాసంలోనూ రాణించిన.. లువానా లోప్స్ లారా.. బ్రెజిల్‌లో జరిగిన జాతీయ, ప్రాంతీయ సైన్స్/గణిత ఒలింపియాడ్‌లలో పతకాలు దక్కించుకుంది. ఉన్నత విద్య కోసం ఆమె అమెరికా వెళ్లి.. మసాచుసెట్స్ ఇన్‌స్టిట్యూట్ ఆఫ్ టెక్నాలజీ నుంచి కంప్యూటర్ సైన్స్, గణితంలో డిగ్రీలను సంపాదించుకుంది.

మసాచుసెట్స్ ఇన్‌స్టిట్యూట్ ఆఫ్ టెక్నాలజీలో చదువుతున్నప్పుడు.. బ్రైడ్‌వాటర్ అసోసియేట్స్, సిటాడెల్ వంటి అగ్రశ్రేణి ఆర్థిక సంస్థల్లో.. లువానా లోప్స్ లారా ఇంటర్న్‌షిప్‌లు చేసింది. 2018లో లారా, ఆమె కో ఫౌండర్ తారెక్ మన్సూర్ కలిసి.. రియల్ వరల్డ్ సంఘటనల ఫలితాలపై ప్రజలు నేరుగా ట్రేడింగ్ చేయడానికి వీలు కల్పించే వేదిక అయిన కాల్షి అనే సంస్థను స్థాపించారు. అనేక సవాళ్లు ఎదుర్కొన్న తర్వాత.. 2024 సెప్టెంబర్‌లో అమెరికా ఎన్నికల ట్రేడింగ్‌కు సంబంధించిన ఒక కీలకమైన దావాలో వీరిద్దరూ విజయం సాధించారు.

దీంతో ఆ దావాలో గెలవడంతోపాటు.. తాజాగా 1 బిలియన్ డాలర్ల నిధులు సమీకరించడంతో.. కాల్షి సంస్థ విలువ ఈ ఏడాది జూన్ నాటికి 2 బిలియన్ డాలర్లు ఉండగా.. 2025 డిసెంబర్ నాటికి 11 బిలియన్ డాలర్లకు పెరిగింది. ఇక ఈ కాల్షి కంపెనీలో లారాకు సుమారు 12 శాతం వాటా కలిగి ఉంది. దీంతో లారా వ్యక్తిగత సంపద సుమారు కూడా భారీగా పెరిగింది. ఆమె ఆస్తులు 1.3 బిలియన్ డాలర్లు.. అంటే మన కరెన్సీలో ఏకంగా రూ.12 వేల కోట్లకు చేరుకోవడంతో ఆమె ప్రపంచంలోని అత్యంత పిన్న వయస్కురాలైన స్వయంకృషి బిలియనీర్‌గా నిలిచింది.

లువానా లారా నేపథ్యం కళ, విజ్ఞాన రంగాల కలయికగా ఉంటుంది. బోల్షోయ్ థియేటర్ స్కూల్‌లో కఠినమైన బ్యాలెట్ శిక్షణ పొందిన లువానా లారా.. మసాచుసెట్స్ యూనివర్సిటీలో చదివిన దాని కంటే.. బోల్షోయ్ థియేటర్ స్కూల్ ట్రైనింగ్ కష్టంగా ఉంటుందని ఆమె తెలిపింది. లువానా లారా తల్లి మ్యాథ్స్ ప్రొఫెసర్ కాగా.. తండ్రి ఒక ఎలక్ట్రికల్ ఇంజనీర్. వారిద్దరి స్ఫూర్తితోనే ఆమె మసాచుసెట్స్ యూనివర్సిటీలో కంప్యూటర్ సైన్స్, గణితంలో డిగ్రీలు పూర్తి చేసింది. ఇంటర్న్‌షిప్‌ల ద్వారా క్వాంటిటేటివ్ ట్రేడింగ్‌లో అనుభవాన్ని పొందింది.

రియల్ వరల్డ్ సంఘటనల ఫలితాలపై.. ట్రేడింగ్ చేయాలనే ఆలోచనతో కాల్షి సంస్థను లారా స్థాపించడం విశేషం. కాల్షి సంస్థ.. కాంట్రాక్ట్ మార్కెట్‌గా పనిచేయడానికి ఫెడరల్ ఆమోదం పొందడం కోసం కమోడిటీ ఫ్యూచర్స్ ట్రేడింగ్ కమిషన్‌తో చట్టపరంగా అనేక సవాళ్లను ఎదుర్కొంది. 2024 సెప్టెంబర్‌లో ఒక కీలక దావాలో గెలుపొందడం ద్వారా.. కాల్షి సంస్థ తిరుగులేని శక్తిగా మారింది.