అమెరికన్ మెడికేర్ నిధులను అక్రమంగా కాజేసిన కేసులో,,,, భారతీయుడికి రెండేళ్ల జైలుశిక్ష

అమెరికాలో వృద్ధులు, పేదలకు ఉద్దేశించిన మెడికేర్ వ్యవస్థను దుర్వినియోగం చేస్తూ.. రూ. 10 కోట్లకు పైగా హెల్త్‌కేర్ స్కామ్‌కు పాల్పడిన భారత సంతతికి చెందిన వ్యక్తికి యూఎస్‌ కోర్టు రెండేళ్ల జైలు శిక్ష విధించింది. 35 ఏళ్ల వయసు కల్గిన మహ్మద్ ఆసిఫ్ అనే వ్యక్తి.. డయాగ్నస్టిక్ ల్యాబ్ ద్వారా ఈ మోసానికి పాల్పడినట్లు యూఎస్ అటార్నీ చార్లెస్ నైల్ ఫ్లాయిడ్ తీర్పు వెల్లడించారు. మెడికేర్ నిధులు.. వృద్ధులు, పేదలకు ముఖ్యమైన వైద్య సంరక్షణ అందించడానికి ఉద్దేశించినవి. ముఖ్యంగా ఆసిఫ్‌ వాషింగ్టన్‌లోని ఇలాంటి సేవలు అందించే డయాగ్నస్టిక్ టెస్టింగ్ లాబొరేటరీకి డైరెక్టర్‌గా వ్యవహరించాడు. అయితే మహ్మద్ ఆసిఫ్ తన పదవిని దుర్వినియోగం చేస్తూ ప్రభుత్వ సొమ్మును పక్కదారి పట్టించాడు. ముఖ్యంగా ఆసిఫ్ మరికొందరితో కలిసి కొవిడ్-19తో సహా ఇతర శ్వాసకోశ సమస్యలకు పరీక్షలు చేయకుండానే నకిలీ బిల్లులను తయారు చేసినట్లు ప్రాసిక్యూటర్లు తెలిపారు.

ఈ మోసం వల్ల ప్రభుత్వంతో పాటు కష్టపడి పన్ను చెల్లించే అమెరికన్లకు ఎక్కువ నష్టం కలిగిందని, ఈ నిధులను అర్హులైన వారికి వైద్య సంరక్షణ కోసం వినియోగించాల్సి ఉందని అటార్నీ ఫ్లాయిడ్ ఆవేదన వ్యక్తం చేశారు. కోర్టులో సమర్పించిన వివరాల ప్రకారం.. ఈ ల్యాబ్ ద్వారా చాలామందికి తాము ఎన్నడూ చేయించుకోని పరీక్షలకు కూడా ఛార్జీలు విధించారు. అంతేకాకుండా చనిపోయిన వ్యక్తుల పేర్ల మీద కూడా పరీక్షలు నిర్వహించినట్లు నకిలీ బిల్లులు సృష్టించడం ఈ స్కామ్‌లో అత్యంత దారుణమైన విషయం కాగా.. ఆసిఫ్ ఈ కంపెనీ యొక్క ఆర్థిక కార్యకలాపాలన్నింటినీ నిర్వహించేవాడని అధికారులు గుర్తించారు.

ఈ మోసానికి ఉపయోగించిన ల్యాబ్‌ను 2021లో ఏర్పాటు చేశారు. దీని మెడికల్ లైసెన్స్ 2023లో పూర్తి అయినా.. ఫిర్యాదుల కారణంగా 2025లో దీన్ని మూసివేశారు. ఈ ఏడాది ఏప్రిల్‌లో చికాగోలోని ఓహేర్ ఎయిర్‌పోర్టులో విమానం ఎక్కుతుండగా అధికారులు మహ్మద్ ఆసిఫ్‌ను అదుపులోకి తీసుకున్నారు. నిందితుడు మోసాన్ని అంగీకరించిన నేపథ్యంలో.. యూఎస్ కోర్టు అతనికి రెండేళ్ల జైలు శిక్ష విధించింది. ఈ జైలు శిక్ష పూర్తయిన అనంతరం మహ్మద్ ఆసిఫ్‌ను అమెరికా నుంచి బహిష్కరించే అవకాశాలు కూడా ఉన్నట్లు అధికారులు తెలిపారు. పవిత్రమైన మెడికేర్ నిధులను పక్కదారి పట్టిస్తున్న ఇలాంటి మోసాలను ప్రభుత్వం సహించదని, దోషులకు కఠిన శిక్షలు తప్పవని యూఎస్ అటార్నీ స్పష్టం చేశారు.