20 ఏళ్లలో రూ. 3 కోట్లు సంపాదించాలంటే.. నెలనెలా ఎంత పొదుపు చేయాలి

చాలా మందికి ఆర్థిక లక్ష్యాలు ఉంటాయి. ఇంత కాలంలో ఇంత సంపాదించాలని లక్ష్యంగా పెట్టుకుంటుంటారు. అయితే కేవలం ఉద్యోగం చేసి సంపాదించడంతోనే అది నిలవదు. భవిష్యత్తు కోసం పొదుపు చేయాలి. పిల్లల చదువులు, పెళ్లిళ్ల కోసం.. ఇల్లు కట్టుకోవడం కోసం లేదా కారు కొనుగోలు చేయడం ఇలా ఎన్నో అవసరాలు ఉంటాయి. అత్యవసర ఖర్చులు కూడా ఉంటాయి. ఏదైనా వ్యాధితో ఆస్పత్రిలో చేరాల్సి వస్తే.. పెద్ద మొత్తంలో ఖర్చు చేయాల్సి వస్తుంది. అప్పుడు కూడా మన దగ్గర కొంత ఫండ్ ఉండాలి. ఇందుకోసం.. చిన్న వయసు నుంచే డబ్బు పొదుపు చేస్తూ.. కూడబెట్టాల్సి ఉంటుంది. ఇంకా దీనిని మదుపు చేయడం ద్వారా దీర్ఘకాలంలో మెరుగైన రాబడి అందుకోవచ్చు. పెద్ద మొత్తంలో ఫండ్ సృష్టించవచ్చు.

ఇప్పుడు మనం ఇందుకోసం ఉన్న అవకాశాల్ని చూద్దాం. చాలా మందికి డబ్బు కూడబెట్టాలని ఉన్నప్పటికీ.. ఎక్కడ పెట్టుబడి పెట్టాలో.. ఎలా చేయాలో తెలియక ఆగిపోతుంటారు. కానీ దిగ్గజ పెట్టుబడిదారులు, నిపుణులు.. మ్యూచువల్ ఫండ్లలో ఇన్వెస్ట్ చేయాలని సలహాలు ఇస్తుంటారు. ఇక్కడ కాంపౌండింగ్ ఇంట్రెస్ట్ బెనిఫిట్ కారణంగా లాంగ్ రన్‌లో సంపద పెద్ద మొత్తంలో పెరుగుతుందని చెబుతుంటారు. కాంపౌండింగ్ అంటే చక్రవడ్డీ.. దీనితో కాలం గడుస్తున్నకొద్దీ సంపద పెరుగుతూనే ఉంటుంది.

మ్యూచువల్ ఫండ్లలో లంప్ సమ్ (ఒకేసారి పెట్టుబడి) అలాగే సిప్ విధానంలో పెట్టుబడి పెట్టొచ్చు. అయితే లంప్ సమ్ కంటే నెలవారీగా క్రమపద్ధతిలో సిప్ విధానంలో పెట్టుబడుల్ని ప్రోత్సహిస్తుంటారు. ఇక్కడ కనీసం నెలకు రూ. 500 ఇలా చిన్న మొత్తాల్లోనూ పెట్టుబడి పెట్టేందుకు అవకాశం ఉండి.. అన్ని వర్గాల వారికి అందుబాటులో ఉంటుంది. గరిష్ట పెట్టుబడి మీ స్థోమతకు తగ్గట్లుగా ఎంచుకోవచ్చు. ఇక్కడ సగటున చాలా వరకు ఫండ్స్ వార్షిక ప్రాతిపదికన 12 శాతం చొప్పున రాబడి అందిస్తుంటాయి. ఇంకా ఇక్కడ మన లక్ష్యాలకు తగ్గట్లుగా ఎంత ఇన్వెస్ట్ చేస్తూ పోతే ఎన్నేళ్లకు రాబడి ఎంత వస్తుందనేది కూడా తెలుసుకునేందుకు ఎన్నో ఆన్‌లైన్ కాలిక్యులేటర్స్ అందుబాటులో ఉంటాయి.

>> ఇప్పుడు మనం దీర్ఘకాలంలో 20 ఏళ్ల వ్యవధిలో రూ. 3 కోట్లు సంపాదించాలని లక్ష్యంగా పెట్టుకున్నట్లయితే నెలకు సిప్ రూపంలో ఎంత ఇన్వెస్ట్ చేయాలో చూద్దాం. ఇక్కడ మీ ఆర్థిక లక్ష్యాలు, రిస్క్ సామర్థ్యం, పెట్టుబడి స్థోమత, కాల వ్యవధి కీలక పాత్ర పోషిస్తుంటాయి. దీనికి తగ్గట్లుగా ఎంత కాలంలో ఎంత సిప్ చేయాలో తెలుసుకోవాలి. ఇలా 20 ఏళ్లలో రూ. 3 కోట్లు కావాలంటే.. నెలవారీగా సగటున రూ. 32,923 చొప్పున ఇన్వెస్ట్ చేయాల్సి ఉంటుందని వాల్యూ రీసెర్చ్ చెబుతోంది. ఈ క్రమంలో మీ పెట్టుబడి మొత్తం కేవలం రూ. 79.01 లక్షలుగానే ఉంటుంది. మిగతాది మార్కెట్ రాబడి ద్వారా మీకు వస్తుందన్నమాట. కాంపౌండింగ్ కారణంగానే ఇలా సంపద పెరుగుతుందని గుర్తుంచుకోవాలి.