న్యూజిలాండ్‌లో భారత సంతతి వ్యక్తికి ఏడేళ్ల జైలుశిక్ష

న్యూజిలాండ్‌లో సంచలనం సృష్టించిన క్యాబ్ డ్రైవర్ లైంగిక దాడి కేసులో భారత సంతతికి చెందిన సత్విందర్ సింగ్‌కు అక్కడి న్యాయస్థానం కోర్టు ఏడేళ్ల రెండు నెలల జైలు శిక్ష విధించింది. ముఖ్యంగా 2023 ఫిబ్రవరిలో.. హామిల్టన్ ప్రాంతంలో రాత్రి వేళ క్యాబ్‌లో ప్రయాణించిన ఓ మైనర్ ప్రయాణికురాలిపై సదరు డ్రైవర్ అత్యాచారానికి పాల్పడ్డాడు. జీపీఎస్ ఆపి మరీ కారు దారి మళ్లించి దారుణానికి ఒడిగట్టాడు. అయితే ఈ నేరం రుజువు కావడంతోనే అతడికి శిక్ష పడింది.

అసలేం జరిగిందంటే..?

2023 ఫిబ్రవరిలో ఓ రోజు రాత్రి 17 ఏళ్ల బాధితురాలు.. హామిల్టన్ తూర్పు ప్రాంతంలోని తన స్నేహితుడి ఇంటికి వెళ్లాలనుకుంది. అందుకోసం సత్విందర్ సింగ్ నడుపుతున్న క్యాబ్‌ను బుక్ చేసుకుంది. పికప్ చేసుకున్న సింగ్ ఆమెను కారులో కూర్చోబెట్టుకుని ప్రయాణం మొదలు పెట్టాడు. ఈక్రమంలోనే ఆమెతో అసభ్యంగా ప్రవర్తించడం ప్రారంభించాడు. ఆమె వేసుకున్న టీషర్టు ఓవైపు కాస్త జారడంతో.. లోదుస్తులు వేసుకున్నావా లేదా అని ప్రశ్నిస్తూ.. తీవ్ర అసభ్యంగా మాట్లాడాడు. బాధితురాలు వద్దని వారించినా వినకుండా.. సింగ్ క్యాబ్ జీపీఎస్‌ను స్విచ్ ఆఫ్ చేసి మరీ కారు దారి మళ్లించాడు. ఆపై ట్రిప్ పూర్తయిందని పెట్టినప్పటికీ.. కారులోని కెమెరాలు మాత్రం అతడి చర్యలను రికార్డు చేశాయి.

ముఖ్యంగా కారు తలుపులు లాక్ చేసి.. బాధితురాలి సీటును వెనక్కి వంచాడు. ఆపై ఆమె మీద పడి దారుణానికి ఒడిగట్టాడు. అనంతరం ఓ చోట దింపేయగా.. ఆమె ఎలాగోలా తన స్నేహితుడికి ఇంటికి చేరుకుంది. కన్నీటి పర్యంతం అవుతూనే.. తనపై జరిగిన దాడి గురించి అతడికి వివరించింది. ఆపై పోలీసుల వద్దకు వెళ్లి ఫిర్యాదు చేసింది. కేసు నమోదు చేసుకున్న పోలీసులు దర్యాప్తు ప్రారంభించారు. ఈక్రమంలోనే నిందితుడు సత్విందర్‌ సింగ్‌ను అరెస్ట్ చేశారు. ఆపై విచారించగా.. తానేమీ అత్యాచారం చేయలేదని, కారులో జరిగిందంతా పరస్పర అంగీకారంతోనే అని చెప్పాు. అంతేకాకుండా న్యూజిలాండ్ మహిళలు 'ఫార్వర్డ్, సంప్రదాయాలకు విరుద్ధంగా' ఉంటారని అసంబద్ధమైన వ్యాఖ్యలు చేశాడు. మరోవైపు కారులోని కెమెరాలో రికార్డు అయిన దృశ్యాల ఆధారంగా అతడే నిందితుడిని పోలీసులు తేల్చారు.

ఆపై కోర్టులో కూడా హాజరు పరిచారు. నేరం రుజువు కావడంతో.. ధర్మాసనం అతడికి 7 సంవత్సరాల 2 నెలల జైలు శిక్షను విధించింది. అయితే సింగ్ తరఫు న్యాయవాది... నిందితుడు సిక్కు మతస్థుడని, న్యూజిలాండ్‌లో కేవలం 11 ఏళ్లపాటు మాత్రమే జీవించాడని, అందువల్ల కస్టడీలో అదనపు సవాళ్లు ఎదుర్కొంటాడని వాదిస్తూ శిక్షలో 'కష్టాల తగ్గింపు'కోరారు. కానీ ఈ అభ్యర్థనను న్యాయమూర్తి తిరస్కరించారు. సింగ్ ఊబర్ డ్రైవర్‌గా న్యూజిలాండ్ ప్రజలతో విస్తృతంగా సంభాషించాడని.. జైలులో ఎలాంటి ప్రత్యేక తగ్గింపు పొందడానికి అర్హుడు కాదని స్పష్టం చేశారు. న్యాయమూర్తి తీర్పునిస్తూ.. ఈ సంఘటన బాధితురాలి జీవితంపై తీవ్ర ప్రభావాన్ని చూపిందని పేర్కొన్నారు. ఇంటికి దూరంగా ఉండాలంటే భయపడటం, బయటి ప్రపంచం సురక్షితం కాదనే భావన ఆమెలో ఉందని న్యాయమూర్తి తెలిపారు.