ఆర్బీఐ సేవింగ్స్ బాండ్లు.. బ్యాంక్ డిపాజిట్లకు మించి వడ్డీ

రిజర్వ్ బ్యాంక్ ఆఫ్ ఇండియా  డిసెంబర్ 5న రెపో రేటును 25 బేసిస్ పాయింట్లు తగ్గించింది. దీంతో ప్రస్తుతం వడ్డీ రేటు 5.25 శాతంగా ఉంది. ఈ ఏడాదిలోనే ఇప్పటి వరకు 4 సార్లు రెపో రేట్లు తగ్గించగా.. 6.50 శాతం నుంచి ప్రస్తుత స్థాయికి చేరింది. ఇదే క్రమంలో బ్యాంకులు లోన్ వడ్డీ రేట్లను తగ్గిస్తుండగా.. తమపై భారాన్ని తగ్గించుకునేందుకు బ్యాంకులు ఫిక్స్‌డ్ డిపాజిట్లపైనా వడ్డీ రేట్లను తగ్గిస్తున్నాయి. ఈ ఏడాది ఆరంభంలో ఎఫ్‌డీలపై ఆకర్షణీయ స్థాయిలో వడ్డీ రేట్లు ఉండేవి. ఆర్బీఐ రెపో రేటు కోతతో అంతే మేర తగ్గుతూ వచ్చాయి. తాజా రేట్ల కోతతో.. బ్యాంకులు డిపాజిట్ రేట్లను ఇంకా తగ్గిస్తాయి. ఇవి ఆల్ టైమ్ కనిష్టాలకు పడిపోయే ప్రమాదం ఉంది.

 ఈ క్రమంలోనే ఎఫ్‌డీలకు ప్రత్యామ్నాయంగా రిస్క్ లేని పెట్టుబడుల కోసం జనం చూస్తున్నారు. ప్రస్తుతం చాలా బ్యాంకులు ఫిక్స్‌డ్ డిపాజిట్లపై వడ్డీ రేట్లు గరిష్టంగా 7.50 శాతం వరకే ఉన్నాయి. కొన్ని స్మాల్ ఫైనాన్స్ బ్యాంకులే కాస్త ఎక్కువ అందిస్తున్నాయని చెప్పొచ్చు. ఇక్కడ దీనికి ప్రత్యామ్నాయంగా రిస్క్ లేని పెట్టుబడి పథకం.. ప్రభుత్వ హామీతో గ్యారెంటీ రిటర్న్స్ అందించే స్కీమ్ ఒకటి ఉంది. అదే ఆర్బీఐ ఫ్లోటింగ్ రేట్ సేవింగ్స్ బాండ్స్.

>> ఈ స్కీమ్ విషయానికి వస్తే ఆర్బీఐ అందించే సురక్షితమైన పథకం. ఇక్కడ వడ్డీ రేటు ప్రస్తుతం 8.05 శాతంగా ఉంది. ఈ వడ్డీ రేటు పోస్టాఫీస్ పొదుపు పథకం నేషనల్ సేవింగ్స్ సర్టిఫికెట్‌కు లింక్ అయి ఉంటుంది. ఆ స్కీమ్ వడ్డీ రేటుపై అదనంగా 0.35 శాతం వడ్డీ వస్తుంది. NSC వడ్డీ రేటు ప్రస్తుతం 7.70 శాతంగా ఉండగా.. ఆర్బీఐ బాండ్లలో 7.70+0.35= 8.05 శాతం వడ్డీ వస్తుందన్నమాట.

ఆర్బీఐ ఈ బాండ్ వడ్డీ రేట్లను ప్రతి 6 నెలలకు ఓసారి సవరిస్తుంది. జనవరి 1, జులై 1 న కొత్త రేట్లను ప్రకటిస్తుంది. అప్పుడు కూడా NSC వడ్డీ రేట్లపైనే ఆధారపడి ఉంటుంది. ఈ బాండ్ల కాల పరిమితి 7 సంవత్సరాలుగా ఉంది. కనీసం రూ. 1000 తో చేరొచ్చు. గరిష్ట పరిమితి లేదు. ఎంతైనా పెట్టుబడి పెట్టొచ్చు. వడ్డీ ప్రతి 6 నెలలకు ఓసారి జమవుతుంది. ఇక్కడ రాబడి పన్ను పరిమితులకు లోబడి ఉంటుంది. ప్రభుత్వ మద్దతు ఉంటుంది కాబట్టి.. ఎలాంటి రిస్క్ ఉండదు. నిర్దిష్ట వడ్డీ రేటు ప్రకారం కచ్చితమైన ఆదాయం పొందొచ్చు.

భారత నివాసితులు ఎవరైనా ఇన్వెస్ట్ చేయొచ్చు. మైనర్ పేరిట గార్డియెన్ ఖాతా తెరవొచ్చు. ఎన్ఆర్ఐలకు అవకాశం లేదు. అయితే ఏడేళ్ల పాటు డబ్బులు వద్దనుకున్న వారికే ఈ స్కీమ్ బెస్ట్ ఆప్షన్ అని చెప్పొచ్చు. కాల పరిమితి లోపు తీసుకునేందుకు వీలుండదు. సీనియర్ సిటిజెన్లకు షరతులకు లోబడి.. కొంత పెనాల్టీతో ముందుగా తీసుకునేందుకు వీలుంటుంది. ఇక్కడ కూడా నాలుగేళ్ల తర్వాతే అవకాశం ఉంటుంది. ఆర్బీఐ గుర్తింపు పొందిన బ్యాంకుల్లో ఈ బాండ్లను కొనుగోలు చేయొచ్చు. ఆధార్, పాన్ కార్డ్, అడ్రస్ ప్రూఫ్ కేవైసీ కోసం కావాలి. ఇంకా ఆర్బీఐ రిటైల్ డైరెక్ట్ పోర్టల్, బ్యాంక్ వెబ్‌సైట్ల ద్వారా కూడా ఆన్‌లైన్‌ ద్వారా ఇందులో చేరేందుకు అవకాశం ఉంది.