రూ.10 వేల 'సిప్' పెట్టుబడితో రూ.1.36 .. హైరిటర్న్స్ స్కీమ్

ప్రస్తుత రోజుల్లో ఎక్కువ మంది మ్యూచువల్ ఫండ్స్‌లో ఇన్వెస్ట్ చేస్తున్నారు. ఈక్విటీల్లో రిస్క్ ఉన్నప్పటికీ హైరిటర్న్స్ కారణంగా చాలా మంది పెట్టుబడులు పెడుతున్నారు. కొన్ని ఫండ్స్ దీర్ఘకాలంలో భారీగా లాభాలు అందించాయి. అందులో ఒకటి కెనరా రొబెకో ఇన్‌ఫ్రాస్ట్రక్చర్ ఫండ్. ఈ స్కీమ్ తమ ఇన్వెస్టర్లను కోటీశ్వరులను చేసింది. సిస్టమాటిక్ ఇన్వెస్ట్‌మెంట్ ప్లాన్ (సిప్) ద్వారా పెట్టుబడి పెట్టిన వారికి ఊహించని రిటర్న్స్ ఇచ్చింది. సాధారణంగా మ్యూచువల్ ఫండ్స్‌ల సగటు రాబడి 12 శాతం అంచనా వేస్తుంటారు. కానీ ఈ ఫండ్ 15 శాతానికిపైగా లాభాలు ఇచ్చింది.

కెనరా రొబెకో ఇన్‌ఫ్రాస్ట్రక్చర్ ఫండ్ గడిచిన 20 సంవత్సరాల్లో సిప్ పెట్టుబడులపై హైరిటర్న్స్ ఇచ్చింది. ఈ స్కీమ్ సగటున వార్షిక రాబడి 15.23 శాతంగా ఉంది. దీని ప్రకారం చూసుకుంటే నెలకు రూ.10 వేల చొప్పున సిప్ పెట్టుబడి పెట్టి ఉంటే ఇప్పుడు ఆ విలువ రూ.1.36 కోట్లు అవుతుంది. ఇక గత 15 సంవత్సరాల రాబడులు చూసుకుంటే ఈ స్కీమ్ సగటు రాబడి ఎక్స్ఐఆర్ఆర్ 17.04 శాతంగా ఉంది. అంటే ఇందులో నెల నెలా రూ.10 వేలు 15 సంవత్సరాలు పెట్టుబడి పెట్టి ఉంటే ఆ ఫండ్ విలువ ఇప్పుడు రూ.73.63 లక్షలు అవుతుంది. ఇక గత 10 సంవత్సరాల వార్షిక రాబడి చూసుకుంటే 19.46 శాతంగా ఉంది. ఇందులో రూ.10 వేలు నెల నెలా 10 సంవత్సరాలు పెట్టుబడి పెట్టిన వారికి ఇప్పుడు రూ.33.41 లక్షలు వస్తాయి.

ఇక కెనరా రొబెకో ఇన్‌ఫ్రాస్ట్రక్చర్ ఫండ్‌లో ఒకేసారి లంప్ సమ్ విధానంలో పెట్టుబడి పెట్టిన వారికి సైతం మంచి రాబడులే అందించింది. ఈ స్కీమ్ లాంచ్ అయినప్పుడు ఇందులో రూ. 10 వేలు పెట్టి ఇప్పటి వరకు కొనసాగినట్లయితే ఆ విలువ రూ.1,61,310 అవుతుంది. బెంచ్ మార్క్ రాబడి రూ. 1,24,925 కు మించి రాబడి అందించింది. ఈ ఫండ్ కింద అసెంట్స్ విలువ నవంబర్ 28వ తేదీ నాటికి రూ.916.58 కోట్లుగాన్నాయి. ఈ స్కీమ్ రెగ్యులర్ ప్లాన్ గత 1 సంవత్సరం, 3 సంవత్సరాలు, 5 సంవత్సరాల కాంపౌండింగ్ యాన్యువల్ గ్రోత్ రేటు వరుసగా 1.32 శాతం, 24.29 శాతం, 28.96 శాతం మేర ఉంది.

కెనరా రొబెకో ఇన్‌ఫ్రాస్ట్రక్చర్ ఫండ్ 2005, డిసెంబర్ 2వ తేదీన లాంచ్ చేశారు. అప్పటి నుంచి చూసుకుంటే కాంపౌండింగ్ యాన్యువల్ గ్రోత్ రేటు (CAGR) 14.91 శాతంగా ఉంది. అయితే బెంచ్ మార్క్ ఇండెక్స్ బీఎస్ఈ సెన్సెక్స్ టీఆర్ఐ రేటు 13.46 శాతాన్ని మించి రాబడులు అందించడం గమనార్హం. ఈ స్కీమ్ మేనేజర్లుగా విశాల్ మిశ్రా, శ్రీదత్త భంద్వల్దార్ ఉన్నారు. ఈ స్కీమ్ 80 శాతం నుంచి 100 శాతం మేర ఈక్విటీ, ఈక్విటీ ఆధారిత మార్గాల్లో ఇన్వెస్ట్ చేస్తుంది.