పల్లీలు తింటే హాని? ఈ సమస్యలు ఉన్నవారు దూరంగా ఉండాలి

వేరుశెనగల్లో ప్రోటీన్‌, ఆరోగ్యకరమైన కొవ్వులు, ఫైబర్‌, విటమిన్‌ E, మెగ్నీషియం వంటి కీలక పోషకాలు సమృద్ధిగా ఉంటాయి. ఇవి గుండె ఆరోగ్యాన్ని మెరుగుపరచడంతో పాటు శరీరానికి అవసరమైన శక్తిని అందించడంలో కీలక పాత్ర పోషిస్తాయి. అయితే ఆయుర్వేద నిపుణుడు కిరణ్‌ గుప్తా తెలిపిన వివరాల ప్రకారం, కొన్ని ప్రత్యేక ఆరోగ్య సమస్యలు ఉన్నవారు కాల్చిన వేరుశెనగలను తీసుకోవడంలో జాగ్రత్త వహించాల్సి ఉంటుంది.తరచూ గ్యాస్‌, అజీర్ణం, మలబద్ధకం లేదా కడుపు ఉబ్బరం వంటి జీర్ణ సంబంధిత సమస్యలు ఉన్నవారు కాల్చిన పల్లీలకు దూరంగా ఉండటం మంచిదని నిపుణులు సూచిస్తున్నారు. వీటిలో ఉండే అధిక ఫైబర్‌, కొవ్వులు జీర్ణం కావడానికి ఎక్కువ సమయం తీసుకోవడం వల్ల కడుపులో అసౌకర్యం పెరిగే అవకాశం ఉంది. అలాంటి వారు తినాలనుకుంటే రాత్రంతా నీటిలో నానబెట్టిన వేరుశెనగలను పరిమితంగా తీసుకోవచ్చు.అలాగే పిత్తాశయంలో రాళ్లు ఉన్నవారు లేదా కాలేయ సంబంధిత వ్యాధులతో బాధపడేవారు వేరుశెనగలను నివారించడం మంచిది. వీటిలో నూనె శాతం ఎక్కువగా ఉండటం వల్ల కాలేయంపై అదనపు ఒత్తిడి ఏర్పడి సమస్య మరింత తీవ్రమయ్యే ప్రమాదం ఉంటుంది. కొంతమందికి వేరుశెనగల వల్ల అలెర్జీ ప్రతిచర్యలు కూడా రావచ్చు. చర్మంపై దద్దుర్లు, దురద లేదా శ్వాస తీసుకోవడంలో ఇబ్బంది వంటి లక్షణాలు కనిపిస్తే వెంటనే వాటిని తినడం మానేయాలి, ఎందుకంటే కొన్ని సందర్భాల్లో ఇవి ప్రాణాంతక అలెర్జీలకు దారితీయవచ్చు.మధుమేహంతో బాధపడే వారు వేయించిన, ఉప్పు లేదా కారం కలిపిన వేరుశెనగలను తీసుకోకపోవడం మంచిది. ముఖ్యంగా తీపి పూత పూసిన వేరుశెనగలు రక్తంలో చక్కెర స్థాయిని అకస్మాత్తుగా పెంచే అవకాశం ఉంటుంది. అందువల్ల డాక్టర్‌ సూచనల మేరకు మాత్రమే పరిమితంగా తీసుకోవాలి. అదేవిధంగా, వేరుశెనగల్లో ఉండే గోయిట్రోజెన్స్ అనే పదార్థాలు థైరాయిడ్‌ గ్రంథి పనితీరును ప్రభావితం చేసే అవకాశం ఉన్నందున, థైరాయిడ్‌ సమస్యలు ఉన్నవారు వీటిని నియంత్రిత మోతాదులో మాత్రమే తీసుకోవాలని నిపుణులు సూచిస్తున్నారు.ఆరోగ్యపరంగా చూస్తే వేరుశెనగలను నేరుగా కాల్చుకుని తినడం కంటే నానబెట్టి తినడం శరీరానికి మరింత మేలు చేస్తుంది. ఇలా తీసుకుంటే పోషకాలు శరీరానికి మెరుగుగా అందడంతో పాటు జీర్ణక్రియ కూడా సులభమవుతుంది. అయితే ఎంత ఆరోగ్యకరమైన ఆహారమైనా అతిగా తీసుకుంటే బరువు పెరగడం, శరీరంలో వేడి పెరగడం వంటి సమస్యలు రావచ్చని గుర్తుంచుకోవాలి.