బీఎస్ఎన్ఎల్ క్రిస్మస్ బొనాంజా.. 1 రూపాయికే 30 రోజులు, రోజుకు 2జీబీ డేటా

మొబైల్ వినియోగదారులకు బంపర్ ఆఫర్. ప్రభుత్వ రంగ టెలికాం దిగ్గజం భారత్ సంచార్ నిగమ్ లిమిటెడ్ (బీఎస్ఎన్ఎల్) క్రిస్మస్ బొనాంజా ప్రకటించింది. క్రిస్మస్ కానుకగా మొబైల్ యూజర్లకు ఉచితంగా సిమ్ కార్డులు అందిస్తోంది. దీంతో పాటు రూ. 1 కే 30 రోజుల వ్యాలిడిటీ ప్యాక్ అందిస్తోంది. బీఎస్ఎన్ఎల్‌లోకి మారాలనుకుంటున్న వారికి ఇది మంచి అవకాశంగా చెప్పవచ్చు. కేవలం ఒక్క రూపాయికే బీఎస్ఎన్ఎల్ సిమ్ పొందవచ్చు. మరి ఆ వివరాలు తెలుసుకుందాం.

ఈ మేరకు క్రిస్మస్ బొనాంజ్ ఆఫర్ గురించి సోషల్ మీడియా ఎక్స్ వేదికగా ఓ పోస్ట్ చేసింది బీఎస్ఎన్ఎల్. ' బీఎస్ఎన్ఎల్ క్రిస్మస్ బొనాంజాతో మరిన్ని వేడుకలు చేసుకోండి. ఉచిత సిమ్ కార్డు పొందండి. ఫ్రీ సిమ్ కార్డుతో పాటు ఒక్క రూపాయికే అపరిమిత కాల్స్, రోజుకు 2 జీబీ డేటా, రోజుకు 100 ఎస్ఎంఎస్‌లు 30 రోజుల వ్యాలిడిటీతో పొందండి. భారతీయ నమ్మకమైన స్వదేశీ నెట్‌వర్క్‌తో అనుసంధానం అయి ఉండండి. త్వరపడండి ఈ ఆఫర్ డిసెంబర్ 31, 2025 వరకే అందుబాటులో ఉంటుంది' అని బీఎస్ఎన్ఎల్ ఇండియా ఎక్స్ ఖాతాలో పేర్కొంది.

సెలబ్రేషన్లు కొనసాగుతాయంటూ క్రిస్మస్ బొనాంజా ప్రకటించింది బీఎస్ఎన్ఎల్. కొత్త యూజర్లకు మాత్రమే ఈ ఆఫర్ అందుబాటులో ఉంటుంది. అంటే ఉచిత బీఎస్ఎన్ఎల్ సిమ్ కార్డు పొందడంతో పాటు ఒక్క రూపాయి చెల్లించి 30 రోజుల ప్యాక్ పొందవచ్చు రోజుకు 2జీబీ డేటా, అన్ లిమిటెడ్ కాల్స్, రోజుకు 100 ఎస్ఎంఎస్‌లు వస్తాయి. గతంలో స్వాతంత్య్ర దినోత్సవం సందర్భంగా ఫ్రీడమ్ ఆఫర్ పేరుతో రూ. 1 కే సిమ్ కార్డు, 30 రోజుల వ్యాలిడిటీ అందించింది. ఆ తర్వాత దీపావళికి ఈ రూపాయి సిమ్ కార్డు ఆఫర్ అందించింది. ఇప్పుడు క్రిస్మస్ సందర్భంగానూ రూపాయి సిమ్ కార్డ్ ఆఫర్ అందిస్తోంది. డిసెంబర్ 31వ తేదీ లోపు సిమ్ కార్డు తీసుకునే వారికి 30 రోజుల పాటు ఈ ప్యాక్ అందుబాటులో ఉంది.

అయితే, ఈ ఆఫర్ గురించి స్థానిక స్టోర్లలో అడిగితే లేదని చెబుతున్నారని పలువురు నెటిజన్లు కామెంట్లు చేస్తున్నారు. రూ. 1 సిమ్ ఆఫర్ కి బదులుగా రూ. 100 ఆఫర్ గురించి వివరిస్తున్నారని, ఈ ఆఫర్ ఎక్కడ అందుబాటులో ఉంటుందో చెప్పాలని కోరుతున్నారు. అయితే, బీఎస్ఎన్ఎల్ మాత్రం ఒక్క రూపాయి ఆఫర్ కొత్త యూజర్లకు అందుబాటులో ఉంటుందని చెబుతోంది. పూర్తి వివరాలకు బీఎస్ఎన్ఎల్ అధికారిక వెబ్‌సైట్‌లోకి వెళ్లాలి సూచిస్తోంది.