ఎమ్మెల్యే కాన్వాయ్‌ను ఢీకొట్టి,,,,మద్యం మత్తులో ఏఎస్ఐ బీభత్సం

రక్షణ కల్పించాల్సిన పోలీసులే మద్యం మత్తులో రోడ్లపై వీరంగం సృష్టించారు. కొత్త ఏడాది వేడుకల వేళ విధుల్లో ఉండాల్సిన వారు.. నిబంధనలను తుంగలో తొక్కి వీఐపీ భద్రతా వాహనాన్ని ఢీకొట్టారు. ఈ తీవ్ర నిర్లక్ష్యానికి బాధ్యులుగా చేస్తూ గురుగ్రామ్ పోలీసు విభాగం ఒక అసిస్టెంట్ సబ్-ఇన్ స్పెక్టర్ సహా నలుగురు సిబ్బందిని గురువారం సస్పెండ్ చేసింది.

అసలేం జరిగిందంటే?

డిసెంబర్ 31వ తేదీ అర్ధరాత్రి నూతన సంవత్సర వేడుకల నేపథ్యంలో గురుగ్రామ్ వ్యాప్తంగా భారీగా పోలీసు బందోబస్తు ఏర్పాటు చేశారు. ఐనాక్స్ మాల్ సమీపంలోని చెక్ పాయింట్ వద్ద ఎస్ఐ రమేష్ కుమార్ నేతృత్వంలో బృందం విధుల్లో ఉంది. అయితే అదే సమయంలో ఏఎస్ఐ బల్జీత్ సింగ్ తన సొంత కారులో అక్కడికి చేరుకున్నారు. విధుల్లో ఉన్న ఎస్పీఓ అజయ్ పాల్, హెడ్ కానిస్టేబుళ్లు సంజయ్ కుమార్, హన్సరాజ్‌లను తన కారులో ఎక్కించుకుని మాల్ వైపు వెళ్లారు. తిరుగు ప్రయాణంలో ఏఎస్ఐ బల్జీత్ సింగ్ మద్యం మత్తులో కారును అత్యంత వేగంగా నడిపారు. ముఖ్యంగా యూ-టర్న్ తీసుకునే క్రమంలో.. రైల్వే స్టేషన్ వైపు నుంచి వస్తున్న వీఐపీ భద్రతా వాహనాన్ని (స్కోర్పియో) బలంగా ఢీకొట్టారు. ఆ సమయంలో సదరు వాహనం కాన్వాయ్‌లో భాగంగా ఉంది.

నంబర్ ప్లేట్ మాయం.. డ్రైవర్‌కు గాయాలు

ఈ ప్రమాదంలో కాన్వాయ్ డ్రైవర్‌కు తీవ్ర గాయాలు అయ్యాయి. అయితే విషయం గుర్తించిన స్థానికులు వెంటనే ఆయన్ను ఆస్పత్రికి తరలించారు. మరోవైపు పోలీసులకు సమాచారం అందించగా.. దీనికి కారణం డ్యూటీలో ఉన్న పోలీసులేనని తేలింది. ముఖ్యంగా ప్రమాదానికి కారణమైన ఏఎస్ఐ కారుకు నంబర్ ప్లేట్లు కూడా లేకపోవడం గమనార్హం కాగా.. వెంటనే స్పందించిన ఉన్నతాధికారులు ఏఎస్ఐ బల్జీత్ సింగ్‌పై న్యూ కాలనీ పోలీస్ స్టేషన్‌లో పలు సెక్షన్ల కింద ఎఫ్ఐఆర్ నమోదు చేశారు. ఏఎస్ఐ మద్యం సేవించి కారు నడిపినట్లు ప్రాథమిక దర్యాప్తులో తేలడంతో కారును సీజ్ చేశారు.

ఈ ఘటనను తీవ్రంగా పరిగణించిన గురుగ్రామ్ పోలీస్ కమిషనరేట్.. క్రమశిక్షణా రాహిత్యానికి పాల్పడినందుకు ఏఎస్ఐ బల్జీత్ సింగ్, ఎస్పీఓ అజయ్ పాల్, హెడ్ కానిస్టేబుళ్లు సంజయ్ కుమార్, హన్సరాజ్‌లను సస్పెండ్ చేస్తున్నట్లు ప్రకటించింది. వీరిపై శాఖాపరమైన విచారణకు కూడా ఆదేశించినట్లు పోలీసు ప్రతినిధి తెలిపారు. శాంతిభద్రతలను పర్యవేక్షించాల్సిన వారే బాధ్యతా రాహిత్యంగా వ్యవహరించి.. వీఐపీ భద్రతకే ముప్పు వాటిల్లేలా చేయడంతో స్థానికంగా ఈ అంశం చర్చనీయాంశంగా మారింది.