విద్యార్థులకు పండగే పండగ.. జనవరిలో సగానికి పైగా రోజులు సెలవులే!

ఆంధ్రప్రదేశ్ రాష్ట్రంలోని పాఠశాల విద్యార్థులకు ఈ జనవరి నెల తీపి కబురును మోసుకొచ్చింది. క్యాలెండర్‌ను గమనిస్తే ఈ నెలలో దాదాపు సగం రోజులు విద్యాసంస్థలు మూతపడనున్నాయి. ముఖ్యంగా సంక్రాంతి పండుగను పురస్కరించుకుని ఈ నెల 10వ తేదీ నుండి 18వ తేదీ వరకు వరుసగా 9 రోజుల పాటు ప్రభుత్వం సెలవులను ప్రకటించింది. దీనికి తోడు ఆదివారాలు, ఇతర పండుగలు తోడవడంతో విద్యార్థులకు చదువు ఒత్తిడి నుంచి భారీ ఊరట లభించనుంది.
ఈ నెలలో కేవలం సంక్రాంతి సెలవులే కాకుండా మరికొన్ని ముఖ్యమైన రోజులు కూడా సెలవుల జాబితాలో చేరాయి. జనవరి 23న వసంత పంచమి సందర్భంగా Aవిద్యాసంస్థలకు విరామం ఉండగా, జనవరి 25 ఆదివారం మరియు జనవరి 26 గణతంత్ర దినోత్సవం కావడంతో వరుసగా రెండు రోజులు స్కూళ్లు బంద్‌ కానున్నాయి. వెరసి సాధారణ పాఠశాలలకు ఈ నెలలో మొత్తం 12 రోజుల పాటు అధికారిక సెలవులు లభిస్తున్నాయి. ఇది అటు విద్యార్థులకు, ఇటు ఉపాధ్యాయులకు విశ్రాంతినిచ్చే అంశం.
నగరాల్లోని కార్పొరేట్ మరియు ఇంటర్నేషనల్ స్కూళ్ల పరిస్థితి చూస్తే సెలవుల సంఖ్య ఇంకా ఎక్కువగా ఉంది. సీబీఎస్ఈ (CBSE) సిలబస్ అనుసరించే స్కూళ్లు మరియు ఇంటర్నేషనల్ స్కూళ్లు శనివారాల్లో కూడా సెలవు పాటిస్తాయి. దీనివల్ల ఈ నెలలో వారికి అదనంగా మరో మూడు సెలవులు వచ్చి చేరుతున్నాయి. అంటే ఈ విద్యాసంస్థల విద్యార్థులు జనవరి నెలలో మొత్తం 14 నుండి 15 రోజుల పాటు ఇళ్లకే పరిమితం కానున్నారు. వెరసి నెలలో సగం రోజులు క్లాసులు జరిగితే, మిగిలిన సగం రోజులు ఆటపాటలతో గడిచిపోనున్నాయి.
పక్కనే ఉన్న తెలంగాణ రాష్ట్రంలో కూడా దాదాపు ఇదే పరిస్థితి నెలకొంది. అక్కడ పండుగ సెలవులు మరియు ఇతర సెలవు దినాలను పరిగణనలోకి తీసుకుంటే విద్యార్థులకు 10 నుండి 12 రోజుల వరకు సెలవులు లభించే అవకాశం ఉంది. సంక్రాంతి సెలవుల విషయంలో రెండు రాష్ట్ర ప్రభుత్వాలు స్పష్టమైన ఆదేశాలు జారీ చేయడంతో, విద్యార్థులు తమ సొంత గ్రామాలకు వెళ్లేందుకు ప్రణాళికలు సిద్ధం చేసుకుంటున్నారు. మొత్తం మీద ఈ జనవరి నెల తెలుగు రాష్ట్రాల్లోని విద్యార్థులకు సెలవుల సందడిని తీసుకువచ్చిందని చెప్పవచ్చు.