జేబు నుంచి రూపాయి తీయకుండా.. ఎల్ఐసీ ప్రీమియం కట్టొచ్చు

ప్రతి ఒక్కరు జీవిత బీమా తీసుకోవాలని ఆర్థిక నిపుణులు సూచిస్తుంటారు. లైఫ్ ఇన్సూరెన్స్‌తో పాటు ప్రస్తుతం హెల్త్ ఇన్సూరెన్స్ సైతం తప్పనిసరిగా కొనుగోలు చేయాలంటారు. ఎన్ని ఆర్థిక ఇబ్బందులు తలెత్తినా ఇన్సూరెన్స్‌ను నిర్లక్ష్యం చేయకూడదని సూచిస్తుంటారు. ఇంటి పెద్దకు ఏ ఆపద వచ్చినా ఆ కుటుంబానికి ఆర్థిక భరోసా కల్పిస్తుంది. అలాగే బీమా కొనుగోలు చేసిన తర్వాత సకాలంలో ప్రీమియం చెల్లింపులు చేయడం చాలా ముఖ్యం. అయితే, కొన్ని సార్లు ఆ ప్రీమియం చెల్లించేందుకు ఆర్థిక కష్టాలు ఎదురవుతుంటాయి. అలాంటి సందర్భంలో అప్పులు చేయాల్సి వస్తుంది. అయితే ఉద్యోగులకు మరో అవకాశం ఉంది. జేబులో నుంచి రూపాయి తీయకుండానే ప్రీమియం కట్టవచ్చు. ప్రావిడెంట్ ఫండ్ అకౌంట్ నుంచే నేరుగా ప్రీమియం చెల్లించేందుకు అవకాశం ఉంటుంది. మరి ఆ వివరాలు తెలుసుకుందాం.

ఎంప్లాయీస్ ప్రావిడెంట్ ఫండ్ ఆర్గనైజేషన్ తీసుకొచ్చిన ఈపీఎఫ్ స్కీమ్ ప్రకారం కొత్త పాలసీ కొనుగోలుకు, ప్రీమియం చెల్లింపులకు పీఎఫ్ ఖాతాలోని డబ్బులను ఉపయోగించుకోవచ్చు. యాక్టివ్ పీఎఫ్ అకౌంట్ ఉన్న వారు ఈ ఆప్షన్ ఎంచుకోవచ్చు. అయితే, రెండు నెలల వేతనానికి సమానమైన నిల్వలు కలిగి ఉండాల్సి ఉంటుంది. అయితే, తీసుకునే ఎల్ఐసీ పాలసీ ఉద్యోగి పేరు మీదే ఉండాలి. జీవిత భాగస్వామి లేదా పిల్లల పేరు మీద ఉన్న పాలసీ ప్రీమియంలు చెల్లించేందుకు వీలు ఉండదు. అలాగే వార్షిక ప్రీమియంలు చెల్లించేందుకు మాత్రమే ఈ ఆప్షన్ ఉపయోగపడుతుంది. అలాగే ఇతర ప్రైవేట్ కంపెనీల్లో కొనుగోలు చేసిన ఇన్సూరెన్స్ ప్రీమియంలకు చెల్లించే వెసులుబాటు సైతం లేదు.

 పీఎఫ్ అకౌంట్ నుంచి ప్రీమియం చెల్లించే ఆప్షన్‌ను వినియోగించుకోవాలంటే ఈపీఎఫ్ఓ వెబ్‌సైట్ నుంచి ఫారం 14ను డౌన్‌లోడ్ చేసుకోవాలి.

ఈ ఫారంలోని వివరాలు నింపి సబ్మిట్ చేయాల్సి ఉంటుంది.

ఈపీఎఫ్ఓ వెబ్‌సైట్లోకి వెళ్లి యూఏఎన్, పాస్‌వర్డ్‌తో లాగిన్ కావాలి.

వెబ్‌సైట్లోని కేవైసీ సెక్షన్‌లోకి వెళ్లి అక్కడ కనిపించే ఎల్ఐసీ ఆప్షన్ ఎంచుకోవాలి.

పాలసీ నంబర్, ఇతర వివరాలు సమర్పించాల్సి ఉంటుంది.

పాలసీ వివరాలను లింక్ చేసి ప్రీమియం మొత్తం ఆటో మేటిక్‌గా పీఎఫ్ అకౌంట్ నుంచి డెబిట్ అవుతుంది.

ప్రీమియం తేదీ మిస్ అవ్వకుండా పేమెంట్లు చేసేందుకు ఈ ఆప్షన్ ఉపయోగపడుతుంది.

ప్రీమియం చెల్లింపులకు బయట లోన్ తీసుకోవాల్సిన అవసరాన్ని ఈ ఆప్షన్ తప్పిస్తుంది. అదే సమయంలో రిటైర్మెంట్ సేవింగ్స్ కోసం ఉద్దేశించిన పీఎఫ్ అకౌంట్లోని డబ్బులు తగ్గిపోయే అవకాశం ఉంది. అందుకే ఇతర మార్గాల నుంచి చెల్లించేని విధంగా ఆర్థిక కష్టాలు ఎదురైనప్పుడు మాత్రమే ఈ ఆప్షన్ వినియోగించుకోవడం మంచిదని ఆర్థిక నిపుణులు సూచిస్తున్నారు.