వాళ్ల రక్షణకు రెండు కుక్కల బండ్లే ఉన్నాయి.. గ్రీన్‌లాండ్‌‌పై ట్రంప్

గ్రీన్‌లాండ్ స్వాధీనం విషయంలో అమెరికా అధ్యక్షుడు డొనాల్డ్ ట్రంప్ మరోసారి బహిరంగ వ్యాఖ్యలు చేశారు. డెన్మార్క్ పాత్రను తోసిపుచ్చిన ఆయన.. ఈ ద్వీపాన్ని రష్యా లేదా చైనా చేజిక్కించుకోవచ్చని హెచ్చరించారు. గ్రీన్‌లాండ్‌కు లేదా డెన్మార్క్‌కు మీరు స్పష్టమైన ఆఫర్ ఇచ్చారా? అన్న ప్రశ్నకు.. ‘నేను ఏమీ ఆఫర్ చేయలేదు. కానీ గ్రీన్‌లాండ్ ఈ ఒప్పందాన్ని చేసుకోవాలి ఎందుకంటే అది రష్యా లేదా చైనా స్వాధీనంలోకి వెళ్లాలనుకోవడం లేదు’ అని సమాధానం ఇచ్చారు. ‘‘ రక్షణ వ్యవస్థలు చాలా బలహీనంగా ఉన్నందున గ్రీన్‌లాండ్ ఒక ఒప్పందం చేసుకోవాలి’ అనిని ట్రంప్ పేర్కొన్నారు.

  ‘‘వారి రక్షణ వ్యవస్థ ఏమిటో మీకు తెలుసా? రెండు కుక్కల స్లెడ్ బండ్లు. అదే సమయంలో రష్యా, చైనాల యుద్ధ విమానాలు, జలాంతర్గాములు అన్ని చోట్లా ఉన్నాయి. మేము అలా జరగనివ్వం’ అని ఆయన అన్నారు. ‘ఒకవేళ అది నాటోను ప్రభావితం చేస్తే, అప్పుడు అది నాటోను ప్రభావితం చేస్తుంది కానీ మీకు తెలుసు, మనకు వారి అవసరం కంటే వారికే మన అవసరం చాలా ఎక్కువ’ అని ట్రంప్ తనదైన శైలిలో గ్రీన్‌లాండ్ స్వాధీనం చేసుకునే అంశాన్ని సమర్దించుకున్నారు. అమెరికా సైనిక చర్య నుంచి గ్రీన్‌లాండ్ రక్షణకు నాటో సంయుక్త కార్యచరణపై చర్చిస్తున్నట్టు యూకే, జర్మనీలు నివేదించిన నేపథ్యంలో ట్రంప్ చేసిన వ్యాఖ్యలకు ప్రాధాన్యత ఏర్పడింది.

ఈ చర్చలు మీ విధానాన్ని మార్చాయా అని అడిగితే.. ‘లేదు’ అని ట్రంప్ సూటిగా సమాధానమిచ్చారు. గ్రీన్‌లాండ్‌ను కొనుగోలు చేయడమే తమ లక్ష్యమని ఆయన నొక్కి చెప్పారు. ‘మేము లీజుకు తీసుకోవడం, స్వల్పకాలికంగా ఉంచుకోవడం గురించి మాట్లాడటం లేదు. మేము కొనుగోలు చేయడం గురించి మాట్లాడుతున్నాం’ అని ఆయన అన్నారు. అమెరికా సైన్యం ఇప్పటికే గ్రీన్‌లాండ్‌లో ఉందని, అవసరమైతే మరింత మందిని పంపుతామని ఆయన తెలిపారు. అయితే, ప్రస్తుతం ఉన్న సైనికుల ఉనికి సరిపోదని, ఇంకా ఎక్కువ కావాలి. మాకు యాజమాన్యం కావాలి. మాకు నిజంగా టైటిల్ కావాలి’ అని ట్రంప్ పేర్కొన్నారు.

గ్రీన్‌లాండ్‌ను కొనుగోలు చేస్తామన్న ట్రంప్ వ్యాఖ్యలపై డెన్మార్క్ ప్రధానమంత్రి స్పందిస్తూ.. ‘తమ దేశం ఒక నిర్ణయాత్మక క్షణాన్ని ఎదుర్కొంటుందని అన్నారు. డెన్మార్క్‌ అధీనంలో స్వయంప్రతిపత్తి కలిగిన గ్రీన్‌లాండ్ గతంలో అమెరికా ప్రతిపాదనలను తిరస్కరించింది. గ్రీన్‌ల్యాండ్ అమ్మకానికి లేదని కోపెన్‌హాగన్ స్పష్టం చేసింది. ఆర్కిటిక్‌లోని ఈ దీవిని కొనుగోలు చేయాలనే ట్రంప్ ప్రయత్నాల నేపథ్యంలో బిలియనీర్లు కూడా అక్కడ పెట్టుబడులు పెడుతున్నారని వార్తలు వస్తున్నాయి. కఠినమైన మార్గంలో గ్రీన్‌లాండ్‌ను స్వాధీనం చేసుకుంటామని ట్రంప్ ఇటీవల ప్రకటించారు.