బ్లింకిట్, స్విగ్గీ, జెప్టో.. 10 నిమిషాల డెలివరీ ఆప్షన్ తొలగింపు

ఈ కామర్స్ ప్లాట్‌ఫామ్స్ ప్రతినిధులతో కేంద్ర కార్మిక శాఖ మంత్రి మన్‌సుఖ్ మాండవియా మంగళవారం సమావేశమయ్యారు. ఈ సందర్భంగా, డెలివరీ భాగస్వాముల భద్రతకు ప్రాధాన్యత ఇవ్వాలని ఆయన సూచించారు. దీంతో బ్లింకిట్ వంటి ఆన్‌లైన్ ప్లాట్‌ఫామ్స్ తమ 10 నిమిషాల డెలివరీ ఆప్షన్‌ను తొలగించాలని నిర్ణయించాయి. ఈ భేటీలో, డెలివరీ భాగస్వాముల భద్రత చాలా ముఖ్యమని మంత్రి నొక్కి చెప్పారు. వేగంగా డెలివరీ చేయడం కంటే, వారి క్షేమం చూడటం ముఖ్యం అని ఆయన తెలిపారు. ఈ సూచనల మేరకు బ్లింకిట్ వంటి సంస్థలు తమ 10 నిమిషాల డెలివరీ హామీ నిలిపివేయాలని నిర్ణయించుకున్నాయి. ఇది డెలివరీ భాగస్వాములకు మరింత సురక్షితమైన పని వాతావరణాన్ని కల్పించడంలో సహాయపడుతుంది.

 కాగా, 10 నిమిషాల డెలివరీ నిబంధనను ఎత్తివేయాాలని డిమాండ్ చేస్తూ గతేడాది డిసెంబరు 31న గిగ్ వర్కర్లు సమ్మెకు దిగిన సంగతి తెలిసిందే. ఈ నిబంధన తమ ప్రాణాలకు ముప్పుగా పరిణమించిందని చాలా కాలం నుంచి వారు ఆందోళన వ్యక్తం చేస్తున్నారు. ప్రభుత్వ వర్గాల ప్రకారం.. జొమాటో, స్విగ్గీ, బ్లింకిట్, జెప్టో సహా పలు ఆన్‌లైన్ డెలివరీ యాప్‌లకు సంబంధించిన ప్రతినిదులు కేంద్ర మంత్రితో సమావేశమయ్యారు. బ్లింకిట్ తన ‘10 నిమిషాల్లో 10,000+ ఉత్పత్తులు డెలివరీ’ అనే ట్యాగ్‌లైన్‌ను ‘30,000+ ఉత్పత్తులు మీ ఇంటి వద్దకే డెలివరీ’గా సవరించిందని ఆ వర్గాలు తెలిపాయి. 10 నిమిషాల డెలివరీ వాగ్దానం తీవ్ర చర్చనీయాంశమైంది. ఇది డెలివరీ బాయ్‌ల భద్రతకు ముప్పుగా పరిణమించిందని చాలామంది అభిప్రాయపడుతున్నారు .

డిసెంబర్ 25న గిగ్ వర్కర్ల యూనియన్లు మెరుగైన జీతం, సామాజిక భద్రతా ప్రయోజనాలను డిమాండ్ చేస్తూ ఆందోళనలు నిర్వహించాయి. తమ డిమాండ్లు నెరవేరకపోతే డిసెంబర్ 31న దేశవ్యాప్త సమ్మె చేస్తామని వారు హెచ్చరించారు. వారి డిమాండ్లలో 10 నిమిషాల డెలివరీ కూడా ఒకటి. కస్టమర్ల వద్దకు 10 నిమిషాల్లో చేరుకోవాలనే నిబంధన కారణంగా గిగ్ ఏజెంట్లు ట్రాఫిక్ నిబంధనలు ఉల్లంఘించాల్సి వస్తోంది. దీంతో భారీగా ట్రాఫిక్ జరిమానా పడుతున్నాయని ఆరోపిస్తున్నారు. దీంతో పాటు ప్రమాదాలు కూడా జరుగుతున్నాయని డెలివరీ బాయ్స్ ఆవేదన వెళ్లబోసుకుంటున్నారు. రెస్టారెంట్ నుంచి లేదా వినియోగదారుల వైపు నుంచి ఆలస్యం జరిగినా.. చివరికి డెలివరీ ఏజెంట్లకే శిక్ష పడుతోందని గిగ్ వర్కర్లు ఆరోపిస్తున్నారు.