ఆన్‌లైన్ రిఫండ్ రిక్వెస్టులతో రూ. 5 కోట్ల స్కామ్: యువకుడికి ఆరేళ్ల జైలు శిక్ష!

నేటి కాలంలో ఈ-కామర్స్ ప్లాట్‌ఫాంలు వినియోగదారుల సౌకర్యార్థం ప్రవేశపెట్టిన 'రిటర్న్ అండ్ రిఫండ్' పాలసీలను కొందరు కేటుగాళ్లు తమకు అనుకూలంగా మార్చుకుంటున్నారు. చైనాకు చెందిన 'లూ' అనే యువకుడు కూడా సరిగ్గా ఇదే లూప్‌హోల్‌ను ఆసరా చేసుకున్నాడు. ఒక ప్రముఖ కాస్మొటిక్ షాపింగ్ వెబ్‌సైట్‌ను లక్ష్యంగా చేసుకున్న ఇతడు, సాంకేతికతలోని లోపాలను వాడుకుంటూ భారీ అక్రమాలకు తెరలేపాడు. తప్పుడు వివరాలతో రిఫండ్ క్లెయిమ్ చేస్తూ సంస్థను నిలువునా ముంచడం మొదలుపెట్టాడు.
ఈ యువకుడు ఒకసారి కాదు, రెండుసార్లు కాదు.. ఏకంగా 11,900 సార్లు ఫేక్ రిఫండ్ రిక్వెస్టులు పంపి అధికారుల కళ్లు గప్పాడు. కంపెనీ నుండి వస్తువులను ఆర్డర్ చేయడం, అవి అందిన తర్వాత వస్తువులో ఏదో లోపం ఉందని నెపంతో రిఫండ్ కోరడం ఇతని శైలి. విచిత్రమేమిటంటే, అటు కంపెనీ నుండి డబ్బులు వెనక్కి పొందుతూనే, తన దగ్గరున్న ఒరిజినల్ వస్తువులను సెకండ్ హ్యాండ్ మార్కెట్లో విక్రయించి రెట్టింపు లాభం ఆర్జించాడు. ఇలా సుమారు ₹5 కోట్ల రూపాయల వరకు కొల్లగొట్టాడు.
చాలా కాలం పాటు సాఫీగా సాగిపోయిన ఈ మోసం, 2024లో కంపెనీ నిర్వహించిన అంతర్గత తనిఖీల్లో బయటపడింది. ఒకే వ్యక్తి లేదా కొన్ని నిర్దిష్ట అకౌంట్ల నుండి అసాధారణ స్థాయిలో రిఫండ్ రిక్వెస్టులు రావడంపై కంపెనీ ప్రతినిధులకు అనుమానం కలిగింది. దీనిపై లోతుగా విచారణ చేపట్టిన సంస్థ వెంటనే పోలీసులకు ఫిర్యాదు చేసింది. రంగంలోకి దిగిన పోలీసులు లూ చేసిన కిలాడీ వ్యవహారాన్ని చూసి విస్తుపోయారు. పక్కా ఆధారాలతో అతడిని అదుపులోకి తీసుకుని కోర్టులో ప్రవేశపెట్టారు.
ఈ కేసును విచారించిన న్యాయస్థానం లూ చేసిన నేరాన్ని తీవ్రంగా పరిగణించింది. ఈ-కామర్స్ వ్యవస్థను దుర్వినియోగం చేస్తూ భారీ ఆర్థిక నేరానికి పాల్పడినందుకు అతనికి 6 ఏళ్ల కఠిన జైలు శిక్ష విధిస్తూ తీర్పునిచ్చింది. ఈ సంఘటన ఆన్‌లైన్ వ్యాపార సంస్థలకు కనువిప్పుగా మారింది. ఇలాంటి మోసాలను అరికట్టడానికి కంపెనీలు తమ రిటర్న్ పాలసీలను మరింత కఠినతరం చేయడంతో పాటు, ఏఐ ఆధారిత పర్యవేక్షణ వ్యవస్థలను బలోపేతం చేసుకోవాలని నిపుణులు సూచిస్తున్నారు.