భారతీయులకు ఏడాదిలోనే ఏకంగా రూ. 117 లక్షల కోట్లు.. 25 ఏళ్లలో ఇదే రికార్డ్

అంతర్జాతీయంగా ఉద్రిక్తతలు, యుద్ధాలు, అనిశ్చితి నేపథ్యంలో సురక్షిత పెట్టుబడి సాధనంగా బంగారానికి విపరీతంగా డిమాండ్ పెరిగిందని చెప్పొచ్చు. ఇటువైపు ఎక్కువగా పెట్టుబడులు పెడుతుండటం వల్ల ధరలు కూడా అదే స్థాయిలో ఎగబాకాయి. గతేడాది రికార్డు స్థాయిలో గోల్డ్ రేటు 60-70 శాతం వరకు పెరిగింది. ఈ క్రమంలోనే బంగారం కలిగి ఉన్న వారికి వారి సంపద విలువ పెరిగిందనే చెప్పొచ్చు. ఇక బంగారాన్ని అధికంగా వినియోగించే దేశాల్లో భారత్ ముందు వరుసలో ఉంటుంది. భారతీయుల దగ్గర ఉన్న బంగారం విలువ దాదాపు దేశ జీడీపీతోనే పోటీపడుతుండటం విశేషం. 2025 సంవత్సరంలో బంగారం ధర భారీగా పెరిగిన క్రమంలో.. భారతీయ కుటుంబాల సంపద కూడా ఏకంగా రూ. 117 లక్షల కోట్లు పెరిగింది. ఇది 1.3 ట్రిలియన్ డాలర్లకు సమానం. భారతీయుల దగ్గర ఉన్న బంగారం విలువ ఇలా పెరిగిందని చెప్పొచ్చు. ఈ మేరకు హెచ్‌డీఎఫ్‌సీ మ్యూచువల్ ఫండ్ ఇయర్ బుక్ -2026 పేరిట ఒక రిపోర్ట్ విడుదల చేసింది.

అంటే 2025 సంవత్సరం భారతీయ కుటుంబాలకు బంగారు పంట పండించిందని చెప్పొచ్చు. స్టాక్ మార్కెట్లు గతేడాది తీవ్ర ఒడుదొడుకులకు లోనైనప్పటికీ.. పసిడి ధరలు ఆకాశాన్నంటడంతో భారతీయుల సంపద అనూహ్యంగా పెరిగిందని రిపోర్ట్ పేర్కొంది. ఇక గత పాతికేళ్లలో ఎన్నడూ లేనంతగా బంగారం ధరలు 2025లో పెరిగాయని.. ఇదే స్థాయిలో సంపద వృద్ధి చెందిందని తెలిపింది.

2025 ఏడాదిలో డిసెంబర్ 15 వరకు చూస్తేనే ఏడాదిలోనే 10 గ్రాముల బంగారం ధర రూ. 57 వేల మేర పెరిగింది. అంతకుముందు 2024లో రూ. 14 వేల మేర పెరిగింది. ఇక భారతీయుల వద్ద ఉన్న మొత్తం బంగారం విలువ రూ. 3.8 ట్రిలియన్ డాలర్లు (భారత కరెన్సీలో సుమారు రూ. 350 లక్షల కోట్లకుపైగా) ఉందని అంచనా. ఇది దాదాపు భారతదేశ జీడీపీతో సమానంగా ఉన్నట్లు చెబుతున్నారు. భారతీయుల దగ్గర సుమారు 34,600 టన్నుల మేర బంగారం నిల్వలు ఉన్నట్లు ఇటీవల మోర్గాన్ స్టాన్లీ అంచనా వేసింది.

ఇక గతేడాది బంగారం ఎలా రాణించిందో.. ఈక్విటీ మార్కెట్లు మాత్రం అంతగా వెనుకబడ్డాయి. గ్లోబల్ మార్కెట్లతో పోలిస్తే ఇండియాకు చెందిన నిఫ్టీ 50 ఇండెక్స్ సుమారు 25 శాతం తక్కువ పనితీరు కనబర్చింది. గత 3 దశాబ్దాల్లో ఇదే అత్యంత పేలవ ప్రదర్శనగా చెబుతున్నారు. కొన్నేళ్లుగా అద్భుత లాభాలు అందించిన స్మాల్, మిడ్ క్యాప్ షేర్లు.. గతేడాది డీలా పడ్డాయి. దాదాపు 30 శాతం వరకు స్మాల్ క్యాప్ స్టాక్స్.. తమ 52 వారాల గరిష్ఠాల నుంచి 30 శాతం కంటే ఎక్కువగా పతనం అయ్యాయి. గతేడాది ఓవరాల్‌గా గోల్డ్, యూరప్ మార్కెట్లు, ఎమర్జింగ్ మార్కెట్లు టాప్‌లో ఉండగా.. ఆయిల్, బిట్ కాయిన్, అమెరికన్ డాలర్ వంటివి వెనుకబడ్డాయి.