8.5 శాతం వడ్డీకే 50 లక్షల హోం లోన్.. ఈ ట్రిక్‌తో 18 లక్షలు ఆదా!

సొంతంగా ఇల్లు కట్టుకోవాలన్నా.. కొనుగోలు చేయాలన్నా.. చాలా ఖర్చుతో కూడుకున్న వ్యవహారం అన్న సంగతి తెలిసిందే. అందుకే ఎక్కువగా బ్యాంకుల్లో లోన్లు తీసుకుంటుంటారు. ఇటీవల ఆర్బీఐ కీలక రెపో రేట్లను క్రమంగా తగ్గించుకుంటూ వస్తోంది. గతేడాది 125 బేసిస్ పాయింట్ల మేర రెపో రేటు తగ్గగా.. బ్యాంకులు కూడా దాదాపు హోం లోన్ వడ్డీ రేట్లను దాదాపు ఇంతే మొత్తంలో తగ్గించినవి చాలా ఉన్నాయి. కనీసం 8 శాతం వడ్డీ రేటుకు కూడా హోం లోన్లు ఇప్పుడు అందుబాటులో ఉన్నాయి. టాప్ బ్యాంకుల్లో కూడా ఈ స్థాయిలో ఉండటం విశేషం. దీంతో ప్రజలపై కాస్త వడ్డీ భారం తగ్గిందని చెప్పొచ్చు. అయితే హోం లోన్ అనేది దీర్ఘ కాలం కొనసాగుతుంది కాబట్టి ఇక్కడ వడ్డీ భారం ఎక్కువగా ఉంటుందన్న సంగతి తెలిసిందే. తీసుకున్న అసలు కంటే వడ్డీనే ఎక్కువగా చెల్లించాల్సి వస్తుంది.

కానీ కొన్ని ట్రిక్స్ పాటించడం ద్వారా.. తెలివైన నిర్ణయాల ద్వారా ఈ భారాన్ని కొంతలో కొంతైనా తగ్గించుకునేందుకు ఛాన్స్ ఉంటుంది. అదే ప్రీపేమెంట్ ట్రిక్. ఇక్కడ మొత్తం ముందుగా చెల్లించాలని కాదు.. ఏడాదికి ఓసారి ప్రీపేమెంట్ కొంత చేయడం వల్ల ఈ భారం గణనీయంగా తగ్గుతుందని చెప్పొచ్చు. ఉదాహరణకు మీరు రూ. 50 లక్షల హోం లోన్‌ను 8.50 శాతం వడ్డీ రేటుకు 25 ఏళ్ల కాలానికి తీసుకుంటే.. ఇప్పుడు తెలుసుకోబోయే ప్రీ పేమెంట్ ట్రిక్‌తో 20 ఏళ్లలోపే దానిని చెల్లించొచ్చు. అంతే కాదు ఇంకా రూ. 18 లక్షలకుపైగా చెల్లించాల్సిన వడ్డీ ఆదా అవుతుంది. అదెలాగో చూద్దాం.

రూ. 50 లక్షల హోం లోన్‌పై 25 ఏళ్ల కాలానికి 8.5 శాతం వడ్డీ రేటు చొప్పున చూస్తే నెలకు ఈఎంఐ రూ. 40,261 చొప్పున పడుతుంది. ఇక్కడ మొత్తం కాలానికి చెల్లించాల్సిన వడ్డీనే రూ. 70.78 లక్షలుగా ఉంది. ఇక మొత్తంగా రూ. 1.21 కోట్ల వరకు చెల్లించాల్సి ఉంటుంది. ఇక్కడ మీరు చూస్తే మీరు తీసుకున్న అసలు రూ. 50 లక్షల కంటే వడ్డీ ఇంకా 21 లక్షలు ఎక్కువ పడుతుంది. ఇది దీర్ఘకాలంలో మీపై రుణ భారాన్ని పెంచుతుంది.

అందుకే ఈ భారాన్ని తగ్గించుకునేందుకు ప్రయత్నించాలి. మీ లోన్ మొత్తం రూ. 50 లక్షలపై నెలకు ఈఎంఐ రూ. 40,261 పడుతుందని తెలుసు కదా.. ఇక్కడ మీరు లోన్ తీసుకున్న రెండో సంవత్సరం నుంచి ప్రతి ఏటా ఒక ఈఎంఐ ఎక్స్‌ట్రాగా చెల్లించండి. ఇక ఇదే వడ్డీ రేటు టెన్యూర్ మొత్తానికి వర్తిస్తే గనుక ఇలా ఏటా ఒక ఈఎంఐ ముందస్తుగా చెల్లించడం వల్ల.. వడ్డీ రూ. 18.31 లక్షలు ఆదా చేసుకోవచ్చు. ఇక్కడ లోన్ కాల పరిమితిని కూడా 65 నెలలు అంటే 5 సంవత్సరాల 5 నెలలు తగ్గించుకోవచ్చు. దీని ద్వారా మీరు 20 ఏళ్లలోపే పూర్తిగా చెల్లిస్తారు.