పల్చగా ఉన్న జుట్టు ఒత్తుగా పెరిగేందుకు చియా సీడ్స్

ఈ రోజుల్లో చాలా మంది జుట్టు రాలడం, పొడిబారడం వంటి సమస్యలతో బాధపడుతున్నారు. దీంతో జుట్టు పల్చగా మారుతోంది. పోషకాహార లోపాలు, ఒత్తిడి, హార్మోన్ల మార్పులు, కాలుష్యం, వాతావరణ మార్పులు ఇందుకు కారణాలు కావచ్చు. కొన్నిసార్లు, సరైన పోషకాహారం అందకపోవడం వల్ల జుట్టు దెబ్బతింటుంది. పల్చగా ఉన్న జుట్టును ఒత్తుగా మార్చుకోవడానికి చాలా మంది మార్కెట్లో దొరికే ప్రొడక్ట్స్ ఉపయోగిస్తారు.

అయితే ఈ ప్రొడక్ట్స్, జుట్టు సంరక్షణ ఉత్పత్తుల్లో రసాయనాలు ఎక్కువగా ఉంటాయి. ఇవి దీర్ఘకాలికంగా జుట్టుపై హానికరమైన ప్రభావాన్ని చూపుతాయి. అయితే, సహజంగా జుట్టుకు తగిన పోషణ అందించాలి. చియా సీడ్స్ ఉపయోగిస్తే జుట్టు బలంగా మారుతుందని బ్యూటీ అండ్ హెయిర్ కంటెంట్ అందించే నేహా నైల్‌వాల్ చెప్పారు. ఆ చియా సీడ్స్‌ని ఎలా ఉపయోగించాలో ఇప్పుడు తెలుసుకుందాం.

చియా విత్తనాలు చేసే మ్యాజిక్

​చియా విత్తనాల్లో ఒమేగా-3 కొవ్వు ఆమ్లాలు, ప్రోటీన్, ఐరన్, జింక్, ఫైబర్, యాంటీఆక్సిడెంట్లు ఉంటాయి. అంతేకాకుండా విటమిన్లు బి1, బి3 కూడా ఉంటాయి. ఈ పోషకాలన్నీ జుట్టు మూలాల్ని బలోపేతం చేస్తాయి. అంతేకాకుండా పల్చగా ఉన్న జుట్టును ఒత్తుగా మారుస్తుంది.

తలపై మంటను తగ్గించడంతో పాటు కొత్త జుట్టు పెరుగుదలకు చియా సీడ్స్ సాయపడతాయి. రసాయనాలు లేకుండా జుట్టు పొడువుగా, మందంగా, బలంగా పెరగాలనుకుంటే చియా సీడ్స్‌ బెస్ట్ ఆప్షన్ అంటున్నారు నిపుణులు. ఈ చియా సీడ్స్‌ని ఎలా వాడాలో ఇప్పుడు తెలుసుకుందాం.

చియా సీడ్స్ జెల్ హెయిర్ మాస్క్

​ఒత్తైన, మెరిసే జుట్టు కోసం చియా సీడ్స్ జెల్ హెయిర్ మాస్క్ బెస్ట్ ఆప్షన్ అంటున్నారు ఎక్స్‌పర్ట్స్. ఇందుకోసం ముందుగా ఒక కప్పు నీటిని తీసుకోని మరిగించండి. ఆ నీరు మరిగేటప్పు రెండు టీస్పూన్ల చియా సీడ్స్ కూడా వేసి మరిగించండి. కొన్ని నిమిషాల్లో ఇది జెల్ లాంటి ఆకృతిని ఏర్పరుస్తుంది.

చల్లబడిన తర్వాత వడకట్టి జెల్‌ను పక్కకు తీసుకోండి. ఈ జెల్‌ని తలమీద, జుట్టు పొడవునా అప్లై చేసుకోండి. ఈ మాస్క్‌ను 30-40 నిమిషాలు అలాగే ఉంచండి. ఆ తర్వాత షాంపూతో తలస్నానం చేయండి.ఈ మాస్క్‌ను వారానికి ఒకసారి అప్లై చేయండి. ఇది పొడిబారడం, చుండ్రు, జుట్టు చిక్కుబడటం తగ్గిస్తుంది. మీ జుట్టుకు సహజమైన మెరుపును ఇస్తుంది.

చియా సీడ్స్ చిట్కాపై ఓ లుక్కేయండి

​చియా సీడ్స్, కొబ్బరి నూనె

ఈ చిట్కా కోసం ముందుగా చియా సీడ్స్ ఓ రాత్రంతా నీటిలో నానబెట్టండి. ఆ తర్వాత నానబెట్టిన చియా సీడ్స్‌ని తేలికగా రుబ్బి.. గోరువెచ్చని కొబ్బరి నూనెతో కలపండి. ఆ తర్వాత ఈ మిశ్రమాన్ని మీ తలకు 5-7 నిమిషాలు మసాజ్ చేయండి.

ఈ నూనెను వారానికి 1-2 సార్లు రాయడం వల్ల రక్త ప్రసరణ పెరుగుతుంది. జుట్టు పెరుగుదల మెరుగుపడుతుంది. షాంపూ చేసే ముందు ఈ పేస్ట్‌ను మీ జుట్టు మీద కొద్దిసేపు ఉంచి ఆ తర్వాత స్నానం చేయండి.

చియా సీడ్స్, అలోవేరా జెల్

1 టేబుల్ స్పూన్ చియా సీడ్స్, 2 టేబుల్ స్పూన్ల కలబంద జెల్ తీసుకోండి. చియా గింజల్ని నీటిలో కొద్దిసేపు నానబెట్టండి. ఆ తర్వాత తాజా కలబంద జెల్ వేసి బాగా కలపండి. ఇప్పుడు, ఈ జెల్ హెయిర్ మాస్క్‌ను మీ జుట్టుకు బాగా అప్లై చేసి, తలకు మసాజ్ చేయండి. 20 నుంచి 30 నిమిషాలు అలాగే ఉంచి, తర్వాత శుభ్రం చేసుకోండి. ఈ మాస్క్ అప్లై చేసుకోవడం వల్ల జుట్టు ఒత్తుగా పెరుగుతుంది. జుట్టు రాలడం కూడా తగ్గుతుంది.

గుర్తించుకోవాల్సిన విషయాలు

​మీకు చియా గింజలు, కొబ్బరి నూనె, కలబందకు అలెర్జీ ఉంటే ప్యాచ్ టెస్ట్ చేసుకోండి. ఈ మాస్క్‌ను చేతులపై పరీక్షించవచ్చు. ఏదైనా దురద, మంట ఉంటే వాడకుండా ఉంటే మంచిది.

జుట్టు పెరుగుదలను ప్రోత్సహించడానికి చియా గింజల నీరు తాగవచ్చు. ఒక గ్లాసు నీటిలో 1 టీస్పూన్ చియా విత్తనాలను రాత్రంతా నానబెట్టండి. ఉదయం ఖాళీ కడుపుతో తాగండి. ఈ నీరు శరీరాన్ని లోపలి నుంచి హైడ్రేట్ చేస్తుంది. జుట్టు కుదుళ్లను పోషిస్తుంది.

ఇంకో ముఖ్యమైన విషయం చియా విత్తనాల్ని డైరెక్టుగా తినకండి. ఇది కడుపులో చికాకు, మంటను కలిగించవచ్చు. అందుకే నానబెట్టిన తర్వాత మాత్రమే చియా సీడ్స్ తీసుకోవాలని నిపుణులు సూచిస్తున్నారు.