అమెరికాలో జీవితంపై విసుగుపుట్టిందని ,,,,ఇండియాకు అమెరికన్ యువకుడు

చాలా మంది విదేశీయులు మన భారతీయ జీవనశైలి, ఇక్కడ సంస్కృతి పట్ల అభిమానంతో తమ దేశం వదలిపెట్టి వస్తుంటారు. తాజాగా, మెరికాకు చెందిన ఓ 30 ఏళ్ల యువకుడు కొత్త జీవితాన్ని వెతుక్కొంటూ ఇండియాకు వచ్చేయాలని భావిస్తున్నాడు. ఈ విషయం గురించి అతడు సోషల్ మీడియాలో పోస్ట్ చేయడంతో ఆన్‌లైన్‌లో పెద్ద చర్చ జరుగుతోంది. టెలివిజన్ రంగంలో రాణించిన ఆ యువకుడు.. బాగా డబ్బు సంపాదించి, రిటైర్ అయ్యాడు. అమెరికాలోని సమస్యలతో తాను విసిగిపోయానని, అందుకే, భారత్‌లో ముఖ్యంగా ఢిల్లీలో కొత్త జీవితం ఎలా ఉంటుందో తెలుసుకోవాలనే ఉత్సాహంతో ఉన్నట్టు చెప్పాడు.

‘నాకు భారతీయ సంస్కృతికి కొత్త కాదు. భారతీయ ఆహారం, భారతీయ మహిళలంటే చాలా ఇష్టం. తన కంపెనీలో చాలా మంది భారతీయులు పనిచేస్తున్నారు. అందుకే, ఒక విదేశీయుడిగా ఢిల్లీలో మంచి జీవితం గడపడం సాధ్యమేనా’ అని రెడ్డిట్‌లో అతడు పోస్ట్ పెట్టారు. ‘నేను అమెరికాకు చెందిన ఒక శ్వేతజాతి యువకుడ్ని.. నా వయసు 30 ఏళ్ల మధ్యలో ఉంది. టీవీ పరిశ్రమలో అదృష్టం కలిసిరావడంతో త్వరగా రిటైర్ అయ్యాను. అమెరికాలోని వివిధ సమస్యలతో విసిగిపోయాను. నాకు భారతీయ ఆహారం, భారతీయ మహిళలంటే చాలా ఇష్టం. ప్రస్తుతం నా కంపెనీలో చాలా మంది భారతీయ ఉద్యోగులు ఉన్నారు. ఢిల్లీకి వెళ్లి మంచి జీవితం గడపడం సాధ్యమేనా? లేక అక్కడి సంస్కృతి నన్ను తిరస్కరిస్తుందా?’ అని ప్రశ్నించాడు.

ఈ పోస్ట్‌‌పై నెటిజన్లు స్పందిస్తూ.. అతడికి కొందరు సలహాలు ఇచ్చారు. కొందరు అతని ధైర్యాన్ని మెచ్చుకున్నారు. భారతీయులు విదేశీయులను బాగానే ఆదరిస్తారని కొందరు చెప్పారు. అయితే, చాలా మంది ఢిల్లీలోని తీవ్రమైన వాయు కాలుష్యం గురించి ఆందోళన వ్యక్తం చేశారు. ‘వాయు కాలుష్యం ఒక పెద్ద సమస్య. కానీ సాంస్కృతికంగా మీకు ఖచ్చితంగా ఆమోదం లభిస్తుంది. తెల్లజాతి వారిని గౌరవంగా చూస్తారు. అక్కడక్కడా చిన్న చిన్న కామెంట్లు వినిపించినా, చాలా మంది మిమ్మల్ని సాదరంగా ఆహ్వానిస్తారు’ అని ఓ నెటిజన్ కామెంట్ పెట్టారు.

‘సోదరా, ఢిల్లీ వాయు కాలుష్యం స్థాయిలను దయచేసి పరిగణనలోకి తీసుకో’ మరొక యూజర్ హెచ్చరించాడు: ఢిల్లీతో పాటు భారతదేశంలోని ఇతర ప్రాంతాలను కూడా సందర్శించి, ఆ తర్వాత నిర్ణయం తీసుకోవాలని మరి కొందరు సూచించారు. ‘భారత్‌లో అన్ని ప్రాంతాలను సందర్శించు. ఢిల్లీలో నివసించు, గోవా వెళ్లు, కేరళలో ప్రశాంతంగా టీ తాగు, ఈశాన్యంలో వర్షాన్ని ఆస్వాదించు, హిమాచల్ పర్వతాలలోని పచ్చదనాన్ని చూడు. ఆ తర్వాత ఎక్కడ ఉండాలో నిర్ణయించుకో. అద్భుతమైన ఆహారం ప్రతిచోటా దొరుకుతుంది.’ అని ఇంకొకరు సలహా ఇచ్చారు.