మాట వినకపోతే బెదిరింపులు, 8 దేశాలపై అదనపు టారిఫ్‌లు

ఏడాది క్రితం రెండోసారి అమెరికా అధ్యక్ష పగ్గాళ్లు చేపట్టిన నాటి నుంచి డొనాల్డ్ ట్రంప్ దూకుడుగా వ్యవహరిస్తున్నారు. తన ఆధిపత్యానికి అడ్డు వచ్చేవారపై బెదిరింపులకు పాల్పడుతూ.. తన దారికి తెచ్చుకోవడానికి ప్రయత్నిస్తున్నారు. ఈ క్రమంలోనే భారత్‌పైనా.. రష్యా చమురు కొనుగోలు చేస్తుందన్న సాకుతో 50 శాతం టారిఫ్స్‌లు విధించారు. ఇటీవల డ్రగ్స్ నెపంతో వెనుజులా అధ్యక్షుడు మదురోను అరెస్ట్‌ చేసి బంధీగా అమెరికా తీసుకెళ్లారు. దీనికి అడ్డు చెప్పిన క్యూబా, కొలంబియా దేశాలకు కూడా అదే గతి పడుతుందని హెచ్చరించి నోరు మూయించారు. ఇక గత కొంత కాలంగా గ్రీన్‌లాండ్‌ను అమెరికాలో విలీనం చేయాలని పట్టుబడుతున్నారు. అయితే ఈ ప్రతిపాదనకు వ్యతిరేకించిన దేశాలపై కూడా అదే తీరు అవలంభిస్తున్నారు అమెరికా అధ్యక్షుడు ట్రంప్.

గ్రీన్‌లాండ్‌ విషయంలో అమెరికా ప్రతిపాదనను పలు ఐరోపా దేశాలు తీవ్రంగా వ్యతిరేకిస్తున్నాయి. ఇప్పుడు ఆ దేశాలపై ట్రంప్ కత్తిగట్టారు. తమ విధానాన్ని వ్యతిరేకిస్తున్న 8 ఐరోపా దేశాలపై 10 శాతం అదనపు టారిఫ్‌లు విధిస్తున్నట్లు ట్రంప్‌ ప్రకటించారు. ఈ దేశాల నుంచి అమెరికాకు దిగుమతి అయ్యే సరకులపై 10 శాతం అదనపు సుంకాలు 2026 ఫిబ్రవరి నుంచి అమల్లోకి వస్తాయని శనివారం (జనవరి 17) తన సోషల్‌ మీడియా పోస్టులో ట్రంప్ తెలిపారు. డెన్మార్క్, నార్వే, స్వీడన్, ఫ్రాన్స్, జర్మనీ, బ్రిటన్, నెదర్లాండ్స్, ఫిన్లాండ్‌ దేశాలకు ఈ కొత్త టారిఫ్‌లు వర్తిస్తాయని తెలిపారు.

అది జరగకపోతే, 25 శాతం పెంచుతాం..

కాగా, గ్రీన్‌లాండ్‌ను అమెరికా సంపూర్ణంగా కొనుగోలు చేయడంపై ఈ ఏడాది జూన్‌ 1 నాటికి అంగీకారం కుదరకపోతే టారిఫ్‌లను 25 శాతానికి పెంచుతానని వార్నింగ్ ఇచ్చారు అమెరికా అధ్యక్షుడు ట్రంప్. ఇదిలా ఉండగా.. గ్రీన్‌లాండ్‌ విషయంలో ట్రంప్‌ వాదనను అమెరికన్‌ కాంగ్రెస్‌ ద్వైపాక్షిక ప్రతినిధి బృందం వ్యతిరేకించడం గమనార్హం.

ఇటీవల వెనుజులా అధ్యక్షుడు మదురో అరెస్ట్ తర్వాత మళ్లీ గ్రీన్‌లాండ్ వ్యవహారాన్ని తెరపైకి తీసుకువచ్చారు ట్రంప్. రష్యా, చైనాల నుంచి రక్షణ కల్పించడంతో పాటు.. అక్కడి అపారమైన ఖనిజ సంపదను చేజిక్కించుకోవడమే దీని వెనుక ఉన్న ప్రధాన ఉద్దేశ్యమని నిపుణులు చెబుతున్నారు. అయితే డెన్మార్క్, గ్రీన్‌లాండ్‌ ప్రజలు దీన్ని ఒక దురాక్రమణ తీవ్రంగా వ్యతిరేకిస్తున్నారు. గ్రీన్‌లాండ్‌ అధికారికంగా డెన్మార్క్ దేశానికి చెందిన స్వయంప్రతిపత్తి కలిగిన భూభాగం. 2019లో కూడా ట్రంప్ ఈ గ్రీన్‌లాండ్‌ను కొనుగోలు చేస్తామని ప్రతిపాదించాజు. కానీ అప్పుడు ఆ ప్రతిపాదనను డెన్మార్క్ తిరస్కరించింది. ఇప్పుడు మరోసారి అదే ప్రతిపాదన చేసి.. వ్యతిరేకించిన దేశాలపై ఆర్థికంగా ఒత్తిడి తీసుకువస్తున్నారు.