ఏం చేసినా వెక్కిళ్ళు ఆగట్లేదా, ఇలా చేస్తే క్షణాల్లో కంట్రోల్ అవుతాయ్

మనకు అప్పుడప్పుడు అకస్మాత్తుగా వెక్కిళ్లు వస్తుంటాయి. కొందరికి ఇవి కొద్దిసేపటికే తగ్గిపోతే, మరికొందరికి మాత్రం అస్సలు తగ్గకుండా తీవ్రంగా ఇబ్బంది పెడుతుంటాయి. పది మందిలో ఉన్నప్పుడు వెక్కిళ్లు వస్తే కలిగే అసౌకర్యం అంతా ఇంతా కాదు. అసలు ఈ వెక్కిళ్లు ఎందుకు వస్తాయి? వీటిని సహజ పద్ధతుల్లో ఎలా తగ్గించుకోవాలి? అనే అంశాలపై సోషల్ మీడియా వేదికగా ప్రముఖ పీడియాట్రిషియన్ డాక్టర్ అజ్మీరా భగత్ సింగ్ కొన్ని చిట్కాలు చెప్పారు. వెక్కిళ్లను తక్షణమే అదుపు చేసే ఐదు అద్భుతమైన చిట్కాలు ఏంటంటే..

చల్లటి నీటిని సిప్ చేయడం.. 

​వెక్కిళ్లు రాగానే వెంటనే గటగటా నీళ్లు తాగేస్తుంటాం. కానీ అలా కాకుండా, ఐస్ కోల్డ్ వాటర్ తీసుకుని టీ తాగినట్లుగా చిన్న చిన్న సిప్స్ చేయాలని డాక్టర్ సూచించారు. ఇలా సుమారు 8 నుంచి 10 సార్లు మెల్లిగా నీటిని మింగడం వల్ల శరీరంలోని ప్రక్రియలు సరై వెక్కిళ్లు ఆగుతాయి. నీటిని వేగంగా తాగడం వల్ల ఫలితం ఉండదని ఆయన చెప్పుకొచ్చారు.

పేపర్ కవర్‌తో శ్వాస ప్రక్రియ.. 

ఇదొక విభిన్నమైన పద్ధతి. ఒక చిన్నపాటి ఖాళీ కవర్‌ను తీసుకుని దానిని ముక్కు, నోటికి అడ్డంగా ఉంచుకోవాలి. ఆ కవర్‌లోకి నెమ్మదిగా గాలిని వదులుతూ, మళ్ళీ అదే గాలిని పీల్చుకోవాలి. ఇలా 5 నుంచి 6 సార్లు చేయడం వల్ల రక్తంలో కార్బన్ డయాక్సైడ్ స్థాయిలో మార్పు వచ్చి వెక్కిళ్లు వెంటనే నిలిచిపోతాయి.

నిమ్మకాయ ముక్కను చప్పరించడం.. 

నోట్లోకి ఏదైనా పుల్లటి పదార్థం వెళ్లినప్పుడు మన శరీర స్పందన మారుతుంది. వెక్కిళ్లు ఆగనప్పుడు ఒక నిమ్మకాయ ముక్కను తీసుకుని చప్పరించాలి. ఇలా చేయడం ద్వారా వేగస్ నర్వ్ స్టిమ్యూలేట్ అవుతుంది. ఆ వెంటనే వెక్కిళ్లు రావడం ఆగిపోతుందని డాక్టర్ అజ్మీరా భగత్ సింగ్ వివరించారు.

ఊపిరి బిగబట్టడం.. 

శరీరంలోని వేగస్ నర్వ్ వల్ల వెక్కిళ్లు వస్తుంటాయి. దీనిని శాంతింపజేయడానికి గాలిని బాగా లోపలికి పీల్చుకోవాలి. అలా పీల్చుకున్న ఊపిరిని కనీసం 10 నుండి 15 సెకన్ల పాటు అలాగే బిగబట్టి ఉంచాలి. ఈ చిన్న టెక్నిక్ వేగస్ నర్వ్‌ను ప్రశాంతంగా మార్చి వెక్కిళ్లను దూరం చేస్తుంది.

నిటారుగా కూర్చొని ఇలా చేయాలి.. 

ఒక్కోసారి ఆహార వాహికపై ఒత్తిడి వల్ల కూడా వెక్కిళ్లు వస్తాయి. అలాంటప్పుడు నిటారుగా కూర్చోవాలి. తలను కొద్దిగా ముందుకు వంచి, గొంతులో ఏదైనా మింగుతున్నట్లుగా కదలికలు చేయాలి. ఇలా చేయడం వల్ల ఆహార వాహిక రిలాక్స్ అవుతుంది. ఫలితంగా వెక్కిళ్లు ఆగిపోతాయి.

సాధారణంగా వెక్కిళ్లు వాటంతట అవే తగ్గిపోతాయి. అయితే ఎక్కువ సేపు ఇబ్బంది పెట్టినప్పుడు డాక్టర్ అజ్మీరా భగత్ సింగ్ చెప్పిన ఈ సింపుల్ హోమ్ రెమెడీస్ పాటిస్తే సరిపోతుంది.