ఏపీలో ఉచిత విద్యుత్, ఆరోజు నుంచే అమలు

చేనేత, పవర్‌లూమ్ కార్మికులకు కూటమి ప్రభుత్వం తీపికబురు అందించింది. నేతన్నలకు ఉచిత విద్యుత్ పథకం త్వరలో అమలు చేస్తామని తెలిపింది. అంతేకాకుండా పింఛన్ల పెంపు హామీ కూడా నెరవేర్చినట్లు వెల్లడించింది. ఈ మేరకు చేనేత, టెక్స్‌టైల్స్‌ శాఖ మంత్రి సవిత గురువారం (జనవరి 29) ప్రకటించారు. కాగా, ఈ పథకం ఈ ఏడాది ఏప్రిల్ 1 నుంచి అమల్లోకి రానున్నట్లు తెలిపారు. దీంతో 2024 ఏపీ అసెంబ్లీ ఎన్నికలకు ముందు కూటమి ఇచ్చిన నెరవేరిందని మంత్రి చెప్పారు.

లక్షకు పైగా కుటంబాలకు లబ్ధి..

ఈ సందర్భంగా మంత్రి సవిత మాట్లాడారు. గతంలో టీడీపీ ఎన్టీఆర్ కాలం నుంచి చేనేతలకు తోడుగా ఉంటోందన్నారు. కూటమి హామీ ఇచ్చిన ప్రకారం హ్యాండ్‌లూమ్‌కు (మగ్గం) 200 యూనిట్లు, పవర్‌లూమ్‌కు (మరమగ్గం) 500 యూనిట్ల వరకు ఉచిత విద్యుత్ అందించస్తున్నట్లు తెలిపారు. కాగా, ఈ పథకం ద్వారా ఏపీ వ్యాప్తంగా మొత్తం 1,03,534 (హ్యాండ్‌లూమ్ - 93,000 కుటుంబాలు, పవర్‌లూమ్ – 10,534) చేనేత కుటుంబాలు లబ్ధి పొందనున్నాయని పేర్కొన్నారు.

మరోవైపు, ఈ పథకం అమలుతో రాష్ట్ర ఖజానాపై నెలకు దాదాపు రూ. 85 కోట్ల భారం పడనుందని మంత్రి సవిత తెలిపారు. ఉచిత విద్యుత్ అమలులోకి వచ్చిన తర్వాత మగ్గం లబ్ధిదారులకు నెలకు దాదాపు రూ. 720, ఏడాదికి రూ. 8,640 వరకు ఆదా కానుందని తెలిపారు. ఇక మర మగ్గం లబ్ధిదారులకు నెలకు సుమారు రూ. 1,800, ఏడాదికి రూ. 21,600 వరకు ఆదా అవుతుందని మంత్రి చెప్పారు.

నేతన్నలకు పింఛన్లు పెంపు..

కాగా, 50 సంవత్సరాల వయస్సు నుంచే నేతన్నలకు రూ. 4,000 చొప్పున పింఛన్ అందిస్తున్నామని మంత్రి సవిత చెప్పారు. ప్రస్తుతం 87,280 మంది నేతన్నలకు పింఛన్లు అందుతున్నాయన్న మంత్రి.. రూ. 3,000 నుంచి రూ. 4,000కి పెంచినట్లు తెలిపారు. తద్వారా ఒక్కో నేతన్నకు ఏడాదికి రూ. 12,000 అదనపు లబ్ధి చేకూరుతోందని వివరించారు.

అంతేకాకుండా మొత్తంగా చేనేత పరిశ్రమ అభివృద్ధి కోసం ప్రభుత్వం చర్యలు చేపట్టినట్లు మంత్రి సవిత వివరించారు. ఆప్కో ద్వారా చేనేత సహకార సంఘాలకు రూ. 7 కోట్ల బకాయిలను ఇటీవల చెల్లించినట్లు వివరించారు. ఇక ఈ ఏడాది తొలి విడతగా రూ. 1.67 కోట్ల త్రిఫ్ట్ ఫండ్ నిధులు విడుదల చేశామని.. ఎన్‌హెచ్‌డీసీ ద్వారా నూలుపై 15 శాతం రాయితీ ఇస్తున్నట్లు తెలిపారు. కాగా, నేతన్నలకు ఇచ్చే ప్రాసెసింగ్ ఛార్జీలను కూడా ప్రభుత్వం పెంచనుందని తెలుస్తోంది.