మీ దగ్గర ఈ 11 అంకెల ఐడీ ఉందా, లేకపోతే ఇబ్బందే!

ఆంధ్రప్రదేశ్ రైతుల కోసం ప్రభుత్వం ఎన్నో సంక్షేమ పథకాలను అమలు చేస్తోంది. అన్నదాత సుఖీభవ, పంటల బీమా, రాయితీపై పరికరాలు, డ్రోన్లు, గోకులాలు, సబ్సిడీపై విత్తనాలు, ఇలా ఎన్నో పథకాలు అమలవుతున్నాయి. కేంద్రం సహకారంతో కూడా కొన్ని పథకాలు ఏపీ రైతులకు అమలవుతున్నాయి. అయితే ఈ పథకాలు రైతులకు అందించేందుకు ప్రభుత్వం కీలక నిర్ణయం తీసుకుంది. అన్నదాతలు ‘ఫార్మర్‌ రిజిస్ట్రీ’ నమోదు చేయించుకోవాలని సూచిస్తోంది. 11 అంకెల యూనిక్ ఐడీతో ఎన్నో ఉపయోగాలు ఉన్నాయని చెబుతున్నారు అధికారులు. ప్రతి ఒక్క రైతు తప్పనిసరిగా ఈ ప్రక్రియ పూర్తి చేయాలని కోరుతున్నారు.

‘ఫార్మర్‌ రిజిస్ట్రీ’ నమోదు ద్వారా రైతులకు ప్రభుత్వ పథకాలు సులభంగా అమలు చేయొచ్చు. భవిష్యత్తులో కేంద్రం ప్రవేశపెట్టే ఏ పథకానికైనా ఈ ఫార్మర్‌ రిజిస్ట్రీ తప్పనిసరి అంటున్నారు. రైతులకు ఆర్థిక సహాయం అందించే పీఎం కిసాన్ పథకానికి ఇది చాలా ముఖ్యం అంటున్నారు. గ్రామాల్లోని రైతు సేవా కేంద్రాల్లో వీవీఏలు ఈ నమోదు ప్రక్రియను ఏడాదిగా నిర్వహిస్తున్నారు. ఈ నమోదు ప్రక్రియ కోసం రైతులు పెద్దగా కష్టపడాల్సిన అవసరం లేదు. తమ ఆధార్ కార్డు, భూమి పట్టాదారు పాసు పుస్తకం, ఆధార్‌తో లింక్ అయిన మొబైల్ నంబరుతో రైతు సేవా కేంద్రాన్ని సంప్రదిస్తే సరిపోతుంది. అక్కడి సిబ్బంది మీ వివరాలను నమోదు చేసి, మీకు ప్రత్యేక గుర్తింపు సంఖ్య (యూనిక్ ఐడీ)ను అందిస్తారు. ఈ సంఖ్య మీ మొబైల్‌కు మెసేజ్ రూపంలో వస్తుంది.

రైతులందరూ తప్పనిసరిగా 'ఫార్మర్‌ రిజిస్ట్రీ' చేసుకోవాలని వ్యవసాయ శాఖ అధికారులు సూచిస్తున్నారు. పెట్టుబడి సాయం, ఎరువుల రాయితీలు, పంటల బీమా వంటివి పొందడానికి ఇది చాలా అవసరం. అలాగే, పంటలు అమ్ముకునేటప్పుడు, అవసరమైనప్పుడు రుణాలు తీసుకునేటప్పుడు కూడా ఈ రిజిస్ట్రీ ఉపయోగపడుతుంది. భవిష్యత్తులో ప్రభుత్వ పథకాలన్నీ ఈ 'ఫార్మర్‌ రిజిస్ట్రీ' ఆధారంగానే అమలు అయ్యే అవకాశం ఉంది. భవిష్యత్తులో ప్రభుత్వ పథకాలకు ఇదే ప్రామాణికంగా మారే అవకాశం ఉందని.. దీని ద్వారా పీఎం కిసాన్ నిధులు కూడా నేరుగా రైతుల ఖాతాల్లో జమ అవుతాయని అధికారులు చెబుతున్నారు. రైతులు వెంటనే ఈ ప్రక్రియను పూర్తి చేసుకోవాలని అధికారులు కోరుతున్నారు. కాబట్టి రైతులు ఈ అవకాశాన్ని సద్వినియోగం చేసుకొని.. తమ పేర్లను నమోదు చేసుకోవడం ద్వారా ప్రభుత్వ పథకాల ప్రయోజనాలను పూర్తిగా పొందాలని వ్యవసాయ శాఖ అధికారులు సూచిస్తున్నారు. ఈ మేరకు వ్యవసాయశాఖ సిబ్బంది రైతులకు అవగాహన కల్పిస్తున్నారు. ఈ యూనిక్ ఐడీతో ఉపయోగాలు ఏంటో వారికి వివరిస్తున్నారు.. వెంటనే ఈ ప్రక్రియ పూర్తి చేయాలని సూచిస్తున్నారు.