ఐరన్, జింక్ లోపాలు జుట్టుపై ఎలాంటి ప్రభావం చూపిస్తాయి

జుట్టు ప్రతి ఒక్కరి అందంలో కీలకపాత్ర పోషిస్తుంది. అందుకే ఒత్తైన, మందంగా ఉండే జుట్టును కోరుకుంటారు. అయితే జుట్టు రాలడం, జుట్టు పల్చబడటం, జుట్టు పెరుగుదల మందగించడం ప్రస్తుత రోజుల్లో సాధారణ సమస్యలుగా మారాయి. ఈ సమస్యలకు ప్రధాన కారణం శరీరంలో అవసరమైన పోషకాలు లేకపోవడం.

జుట్టు పెరగడానికి, బలంగా ఉండటానికి ఐరన్, జింక్ వంటి సూక్ష్మపోషకాలు చాలా అవసరం. ఇవి లేకపోతే జుట్టు కుదుళ్లకు సరైన పోషణ అందదు. దీంతో జుట్టు త్వరగా రాలిపోవడం, బలహీనపడటం జరుగుతుంది. మన జుట్టు పెరుగుదల, బలంగా మారడంలో జింక్, ఐరన్ పాత్ర ఏంటో డాక్టర్ రష్మి ఎస్, కన్సల్టెంట్- డెర్మటాలజీ (ఫోర్టిస్ హాస్పిటల్, బన్నెర్ఘట్ట రోడ్, బెంగళూరు) వివరించారు. ఆ వివరాలు ఇప్పుడు తెలుసుకుందాం.

  డెర్మటాలజిస్ట్ ఏమంటున్నారు?

జుట్టు పెరగడానికి, బలంగా ఉండటానికి ఐరన్, జింక్ వంటి సూక్ష్మపోషకాలు చాలా అవసరమని డాక్టర్ చెబుతున్నారు.

ఐరన్, జింక్ వంటి సూక్ష్మపోషకాలు జుట్టు పెరుగుదల, బలానికి చాలా ముఖ్యం. వాటి లోపం వల్ల జుట్టు కుదుళ్లకు సరైన పోషణ అందదు. దీంతో, జుట్టు త్వరగా రాలిపోవడం, విరిగిపోవడం, బలహీనపడటం జరుగుతుంది.

డాక్టర్ రష్మి ఎస్

ఐరన్ లోపం

మన రక్తంలో సరైన ఆక్సిజన్ సరఫరాకు ఐరన్ చాలా ముఖ్యమైన పోషకం. జుట్టు కుదుళ్లు చాలా స్ట్రాంగ్‌గా ఉండాలన్నా, బాగా పెరగాలన్నా వాటికి తగినంత ఆక్సిజన్ అందాలి. అదే శరీరంలో ఐరన్ తగ్గితే జుట్టు కుదుళ్లకు ఆక్సిజన్ సరిగ్గా అందదు. దీనివల్ల జుట్టు త్వరగా రెస్టింగ్ ఫేజ్‌లోకి వెళ్లిపోతుంది. దీంతో, విపరీతంగా జుట్టు రాలడం మొదలవుతుంది.

ఐరన్ లోపం ఉంటే జుట్టుకు సంబంధించిన లక్షణాలు

జుట్టు పల్చబడటం: జుట్టుకు సరైన ఆక్సిజన్ అందక అది నిర్జీవంగా మారుతుంది. దీంతో, అది క్రమక్రమంగా పల్చబడుతుంది.

మెరుపు కోల్పోతుంది: జుట్టు తన సహజ మెరుపును కోల్పోతుంది.

పెళుసుగా మారడం: జుట్టు తేమను కోల్పోయి పొడిగా, గరుకుగా మారుతుంది. దీంతో, జుట్టు విరిగిపోయే స్థితికి చేరుకుంటుంది. ఆ తర్వాత క్రమక్రమంగా రాలిపోతుంది.

జింక్ లోపం

జుట్టు నిర్మాణానికి ప్రధానమైన కెరాటిన్ అనే ప్రోటీన్ ఉత్పత్తిలో జింక్ ప్రధాన పాత్ర పోషిస్తుంది. ఇది కణాల మరమ్మత్తు అంటే రిపేర్‌కి కూడా అవసరం. అయితే, శరీరంలో జింక్ తక్కువైతే జుట్టు పీచులా మారి త్వరగా విరిగిపోతుంది. ఇది తలలోని నూనె గ్రంధుల పనితీరును కూడా దెబ్బతీస్తుంది.

జింక్ లోపం ఉంటే జుట్టుకు సంబంధించిన లక్షణాలు

జుట్టు సన్నబడటం: జింక్ లోపం ఉంటే జుట్టు పలుచబడి కుదుళ్లు స్పష్టంగా కనిపిస్తాయి. తలపై జుట్టు సాంద్రత క్రమంగా తగ్గిపోతుంది.

తల చర్మం పొడిబారడం: జింక్ లోపం ఉంటే తల చర్మం పొడిబారుతుంటుంది. దీంతో పొట్టు రాలడం, దురద రావడం వంటి సమస్యలు వస్తాయి.

మంట రావడం: తల చర్మం పొడిబారడం వల్ల దురదతో పాటు మంట సమస్య వస్తుంది.

పోషకాహార లోపం ఉందని సూచించే లక్షణాలు

ఈ కింది లక్షణాలు కనిపిస్తే పోషకాహార లోపం ఉందని అర్థం చేసుకోవచ్చు.

జుట్టు విపరీతంగా రాలడం

జుట్టు పెరుగుదల నెమ్మదించడం లేదా ఆగిపోవడం

జుట్టు త్వరగా విరిగిపోవడం, పల్చబడటం

తలలో చర్మం బాగా పొడిబారడం

ఐరన్ ఎక్కువగా ఉండే ఆహారాలు

వెబ్ఎమ్‌డిలోని ఓ నివేదిక ప్రకారం శరీరంలో రక్తాన్ని పెంచి జుట్టు కుదుళ్లకు ఆక్సిజన్ అందించడానికి కొన్ని ఆహారాలు సాయపడతాయి.

ఆకుకూరలు: ముఖ్యంగా పాలకూర, తోటకూర, గోంగూర

మాంసాహారం: చికెన్, మేక మాంసం, మటన్ లివర్

పప్పుధాన్యాలు: శనగలు, పెసలు, రాజ్మా వంటి పప్పుధాన్యాల్లో ఐరన్ ఎక్కువగా లభిస్తుంది.

డ్రై ఫ్రూట్స్: ఎండుద్రాక్ష, ఖర్జూరం, అంజీరా పండ్లు, బాదం పప్పు

ఇతర ఫుడ్స్: బెల్లం, గుమ్మడి గింజల్లో కూడా ఐరన్ ఎక్కువగా లభిస్తుంది.

జింక్ ఎక్కువగా ఉండే ఆహారాలు

కెరాటిన్ అనే ప్రోటీన్ తయారీకి జింక్ అవసరం. హార్వర్డ్ హెల్త్‌లో పబ్లిష్ అయిన ఓ నివేదిక ప్రకారం కొన్ని ఆహారాల్లో జింక్ ఎక్కువగా లభిస్తుంది.

గింజలు: గుమ్మడి గింజలు, పుచ్చకాయ గింజలు, నువ్వులు

సీ ఫుడ్: చేపలు, రొయ్యలు, పీతలు

నట్స్: వేరుశెనగలు, బాదం పప్పు, జీడిపప్పు

పాల ఉత్పత్తులు: పాలు, పెరుగు, పన్నీర్

తృణధాన్యాలు: ఓట్స్, మిల్లెట్స్ వంటి జింక్ ఎక్కువగా లభిస్తుంది.

పాటించాల్సిన ముఖ్యమైన చిట్కాలు

ఐరన్ తీసుకున్నప్పుడు దాని శోషణ కోసం విటమిన్ సి ఎంతో ముఖ్యం. విటమిన్ సి ఉండే ఉసిరి, నిమ్మ, నారింజ వంటి పండ్లను కూడా తీసుకోండి. దీంతో ఐరన్‌ను శరీరం బాగా శోషించుకుంటుంది.

జుట్టు ప్రధానంగా ప్రోటీన్‌తో తయారవుతుంది. ఇందుకోసం రోజూ కనీసం ఒక గుడ్డు లేదా తగినంత పప్పు ఉండేలా చూసుకోండి.

చివరగా సమతుల్య ఆహారం తీసుకోవడం, అవసరమైతే డాక్టర్ సలహాతో సప్లిమెంట్స్ వాడటం ద్వారా ఈ లోపాలను సరిదిద్ది జుట్టును బలంగా, ఆరోగ్యంగా మార్చుకోవచ్చు.

సంప్రదించిన వైద్య నిపుణులు

డాక్టర్ రష్మి ఎస్, కన్సల్టెంట్- డెర్మటాలజీ