దొంగల ఫోటోలతో ఫ్లెక్సీలు,,,ఏలూరు పోలీసులు వినూత్న ఆలోచన

వినూత్న పద్ధతులు, వినూత్న కార్యక్రమాలకు పెట్టింది పేరైన ఏలూరు పోలీసులు .. మరో సరికొత్త ప్రయోగానికి శ్రీకారం చుట్టారు. పాత నేరస్థుల ఫోటోలతో ఫ్లెక్సీలు ఏర్పాటు చేయిస్తున్నారు. నేను ఎవరో మీకు తెలుసా? అంటూ పోస్టర్లు, ఫ్లెక్సీలు ఏర్పాటు చేస్తున్నారు. ఇలాంటి పోస్టర్ ఇప్పుడు సోషల్ మీడియాలో వైరల్ అవుతోంది. ఇళ్లల్లో చోరీలు చేసేవారు, బైకులు దొంగతనం చేసేవారు, చైన్ స్నాచర్లు, ట్రాన్స్‌‍ఫార్మర్లు దొంగిలిస్తూ గతంలో చిక్కిన నేరస్థుల ఫోటోలతో ఏలూరు పోలీసులు ఈ ఫ్లెక్సీలు ఏర్పాటు చేశారు. ఇలాంటి దొంగలు మీ మధ్యలోనే ఉండొచ్చు.. జాగ్రత్త అంటూ అవగాహన కల్పిస్తున్నారు. ఈ ఫోటో సోషల్ మీడియాలో వైరల్ అవుతుండగా.. నేరాలకు అరికట్టేందుకు ఏలూరు పోలీసుల ఆలోచనను నెటిజనం మెచ్చుకుంటున్నారు.

సాధారణంగా పుట్టినరోజు, ఏదైనా శుభకార్యాలకు ఫ్లెక్సీలు ఏర్పాటు చేయడం చూస్తుంటామని.. అలాగే రాజకీయ నాయకులకు బ్యానర్లు, ఫ్లెక్సీలు కట్టడం చూశామని.. కానీ ఇలా దొంగలు, పాత నేరస్థుల కోసం పోలీసులు ఫ్లెక్సీలు ఏర్పాటు చేయడం కొత్తగా ఉందని నెటిజన్లు కామెంట్లు పెడుతున్నారు. ఇలా ఫ్లెక్సీలు ఏర్పాటు చేయటం ద్వారా మన మధ్యలో తిరిగే దొంగలను గుర్తించేందుకు వీలవుతుందని.. అలాగే దొంగలకు కూడా బయటకు రావాలంటే భయం పట్టుకుంటుందని చెప్తున్నారు. మొత్తంగా ఏలూరు పోలీసుల ఫ్లెక్సీ ఐడియాపై నెట్టింట ప్రశంసలు కురుస్తున్నాయి.

మరోవైపు ఏలూరు పోలీసులు ఇలా క్రియేటివ్‌గా ఆలోచించడం ఇదే తొలిసారి కాదు. గతంలోనూ ఇలాంటి అనేక వినూత్న కార్యక్రమాలు చేపట్టారు. నిరుపేదల అవసరాలు తీర్చడం కోసం కైండ్‌నెస్ వాల్ పేరుతో గతంలో ఓ వినూత్న కార్యక్రమం నిర్వహించారు. అవసరమైనది తీసుకోండి, అవసరం లేనిది పెట్టండి.. అంటూ ఈ కార్యక్రమం నిర్వహించారు. పుస్తకాలు, బొమ్మల దగ్గర నుంచి ఎలక్ట్రానిక్ వస్తువుల వరకూ ఒకరికి ఉపయోగపడని వస్తువు.. మరొకరికి ఉపయోగపడే విధంగా ఈ కైండ్‌నెస్ వాల్ ఏర్పాటు చేశారు. ఏలూరు పోలీస్ స్కూల్ సమీపంలో పెట్రోల్ బంక్ వద్ద ప్రత్యేక అల్మారాను ఏర్పాటు చేశారు.

ఈ కైండ్‌నెస్ వాల్ అల్మరాలో.. మనం ఉపయోగించని వస్తువులు ఏవైనా ఉంచవచ్చు. అలాగే అల్మారాలో మనకు అవసరమయ్యే వస్తువు ఏదైనా ఉంటే.. ఉచితంగా ఇంటికి తీసుకెళ్లవచ్చు. దీనిపైనా నెట్టింట ప్రశంసలు వ్యక్తమయ్యాయి. అలాగే చిన్నారులకు ట్రాఫిక్ నిబంధనల మీద అవగాహన కల్పించాలనే ఉద్దేశంతో ఏర్పాటు చేసిన ట్రాఫిక్ పార్కు కూడా ప్రశంసలు అందుకుంది. ఏలూరు జిల్లా ప్రధాన కార్యాలయంలో ఈ చిల్డ్రన్ ట్రాఫిక్ పార్కు ఏర్పాటు చేశారు. ట్రాఫిక్ రూల్స్, రహదారి భద్రతపై చిన్నారులు ఆడుతూ పాడుతూ అవగాహన పెంచుకునేలా ఈ పార్క్ ఏర్పాటు చేశారు. 84 లక్షలతో ఏలూరు అర్బన్ డెవలప్‌మెంట్ అథారిటీ, ఏలూరు పోలీసులు దీనిని ఏర్పాటు చేశారు.