బొద్దింకల్ని ఇంటి నుంచి తరిమికొట్టే చిట్కాలు

వేసవి ప్రారంభమైంది. రోజు రోజుకి ఉష్ణోగ్రతలు పెరిగిపోతున్నాయి. వేసవిలో ఇంటిని శుభ్రంగా ఉంచుకోవడం చాలా ముఖ్యం. గమనించకపోతే కీటకాల బెడద పెరుగుతుంది. ముఖ్యంగా ఈ సీజన్‌లో చాలా ఇళ్లలో బొద్దింకలు పెరుగుతాయి. అవి వంటగది, కిచెన్ సింక్, ఆహార పదార్థాలపై ఎక్కువగా తిరుగుతుంటాయి. ఇవి మురికిని వ్యాప్తి చేయడమే కాకుండా అనారోగ్యానికి కూడా కారణమవుతాయి.

బొద్దింకలు సాధారణంగా వెచ్చని తేమ, చీకటి ప్రదేశాల్ని ఎక్కువగా ఇష్టపడతాయి. రాత్రిపూట వాటి బెడద మరింత పెరుగుతుంది. చూస్తుండగానే బొద్దింకల సంఖ్య పెరుగుతూ పోతుంది. అప్పుడు వీటిని వదిలించుకోవడం ఇంకా కష్టంగా మారుతుంది. బొద్దింకల్ని వదిలించుకోవడానికి మార్కెట్లో అనేక రకాల స్ప్రేలు, ప్రొడక్ట్స్ అందుబాటులో ఉన్నాయి. అయితే, వీటి ఘాటు వాసన చాలా మందికి పడకపోవచ్చు. కొన్ని సాధారణ పద్ధతులు, చిట్కాల ద్వారా వాటిని వదిలించుకోవచ్చని యూనివర్శిటీ ఆఫ్ కాలిఫోర్నియాలో పబ్లిష్ అయిన ఓ నివేదిక చెబుతుంది. ఆ పూర్తి వివరాలు ఇప్పుడు చుద్దాం.

బొద్దింకలు నాలుగు రకాలు

​యూనివర్శిటీ ఆఫ్ నెబ్రాస్కా అండ్ లింకన్‌లో పబ్లిష్ అయిన నివేదిక ప్రకారం బొద్దింకలు నాలుగు రకాలు.

జర్మన్ బొద్దింకలు: ఇవి బాత్రూమ్, కిచెన్‌ల్లో ఎక్కువగా కనిపిస్తాయి.

ఓరియంటల్ బొద్దింక : ఇవి తేమ, చల్లని వాతావరణంలో ఎక్కువగా కనిపిస్తాయి. ఇంటి బేస్మెంట్ ప్రదేశాల్లో ఎక్కువగా సంచరిస్తుంటాయి.

బ్రౌన్‌బ్యాండెడ్ బొద్దింక : ఇవి గోధుమ రంగు గీతలతో ఉంటాయి. వీటిని నీటి అవసరం చాలా తక్కువ. ఇవి వంటిల్లు, బాత్రూమ్‌లతో పాటు బెడ్రూమ్, లివీంగ్ రూమ్స్‌లో ఎక్కువగా కనిపిస్తాయి.

అమెరికన్ బొద్దింక : ఇవి ఎక్కువగా పాత భవనాల్లో కనిపిస్తుంటాయి.

ముందుగా నివారణ, పారిశుద్ధ్యం ముఖ్యం

​యూనివర్శిటీ ఆఫ్ నెబ్రాస్కా అండ్ లింకన్‌లో పబ్లిష్ అయిన నివేదిక ప్రకారం వాటిని నియంత్రించడానికి పారిశుద్ధ్యం చాలా ముఖ్యం. బొద్దింకలు ఆహారం, నీరు, ఆశ్రయం కోసం మీ ఇంట్లోకి వస్తాయి. వీటిని నియంత్రించడానికి మొదటి అడుగు వాటికి ఇవి అందకుండా చేయడం.

​ఆహారాన్ని దాచండి: ఆహార పదార్థాలను గాలి చొరబడని డబ్బాల్లో ఉంచండి. రాత్రిపూట ఎంగిలి పాత్రల్ని సింక్‌లో ఉంచకండి. ఎప్పటికప్పుడు వాటిని క్లీన్ చేస్తూ ఉండండి.

తడి లేకుండా చూడండి: సింక్ కింద లేదా బాత్‌రూమ్‌లో పైపుల లీకేజీలు ఉంటే వెంటనే సరిచేయండి. బొద్దింకలు నీరు లేకుండా ఎక్కువ రోజులు బతకలేవు. బాత్రూమ్, కిచెన్‌ని ఎప్పటికప్పుడూ క్లీన్ చేస్తూ ఉండండి.

రంధ్రాల్ని మూసివేయండి: గోడల్లోని పగుళ్లు, కిటికీల సందుల్ని సీల్ చేయండి.

ఇవి ట్రై చేయండి.

​యూనివర్శిటీ ఆఫ్ కాలిఫోర్నియాలో పబ్లిష్ అయిన నివేదిక ప్రకారం శాస్త్రీయంగా కొన్ని పద్ధతులు బొద్దింకల బెడద తగ్గించడంలో ప్రభావవవంతంగా పనిచేస్తాయి.

1) బోరిక్ యాసిడ్ :

​ఇది బొద్దింకల నియంత్రణలో బాగా పనిచేస్తుంది. బొద్దింకలు దీనిపై నడిచినప్పుడు, ఆ పొడి వాటి శరీరానికి అంటుకుంటుంది. అవి తమను తాము శుభ్రం చేసుకునే క్రమంలో ఆ పొడిని మింగడం వల్ల వాటి నాడీ వ్యవస్థ దెబ్బతిని చనిపోతాయి.

ఎలా వాడాలి: చాలా పల్చటి పొరలా బొద్దింకలు ఎక్కువగా తిరిగే చోట చల్లండి. ఎక్కువగా చల్లితే అవి దానిపై నుండి వెళ్లవు.

2) జెల్ బైట్స్ :

వీటిలో ఫిప్రోనిల్ లేదా హైడ్రామెథైల్నాన్ వంటి రసాయనాలు ఉంటాయి. ఇవి బొద్దింకలను ఆకర్షించి, వాటిని తిన్న తర్వాత చంపేస్తాయి. చనిపోయిన బొద్దింకను మిగిలినవి తినడం వల్ల మొత్తం గుంపు నశిస్తుంది. ఇవి మార్కెట్లలో లభిస్తాయి.

3) కాక్ రోచ్ ట్రాప్స్:

​ఇవి సమస్య ఎంత తీవ్రంగా ఉందో తెలుసుకోవడానికి, గూళ్లు ఎక్కడ ఉన్నాయో గుర్తించడానికి ఉపయోగపడతాయి. ఈ పద్ధతి ద్వారా వాటి గూళ్లని నాశనం చేయొచ్చు. మీరు కావాలనుకుంటే వాక్యూమ్ క్లీనర్ సాయంతో వాటి గూళ్లను నాశనం చేయొచ్చు.

సహజ పద్ధతులు

వేప నూనె : వేపలోని చేదు గుణం బొద్దింకల పునరుత్పత్తి సామర్థ్యాన్ని తగ్గిస్తుంది. ఇందుకోసం వేప నూనె ఓ స్ప్రే బాటిల్‌లో తీసుకుని వాటిని బొద్దింకలు ఎక్కువగా తిరిగే ప్రాంతాల్లో చల్లుకోండి.

లవంగాలు: బొద్దింకలు లవంగాల ఘాటైనా వాసనను ఇష్టపడవు. ఇందుకోసం.. అల్మారాలు, వంటగది మూలల్లో కొన్ని లవంగాలను ఉంచండి.

తులసి ఆకులు: కిటికీలు, తలుపుల దగ్గర తులసి ఆకుల్ని ఉంచడం వల్ల బొద్దింకల్ని దూరంగా ఉంచవచ్చు. తులసి సహజ వికర్షంగా పనిచేస్తుంది.

పెట్రోలియం జెల్లీ ట్రాప్: పెట్రోలియం జెల్లీని ఒక కూజాకు పూసి లోపల బ్రెడ్ లేదా పండ్ల వంటి ఎరను ఉంచండి. బొద్దింకలు లోపలికి ఎక్కుతాయి కానీ జిగట ఉపరితలం కారణంగా తప్పించుకోలేవు.

తీసుకోవాల్సిన జాగ్రత్తలు

బోరిక్ యాసిడ్ లేదా ఇతర రసాయనాలు వాడేటప్పుడు పెంపుడు జంతువులు, చిన్న పిల్లలకు అందకుండా జాగ్రత్త వహించండి.

నీటితో అమ్మోనియాను కలిపి నేలలు, కౌంటర్‌టాప్‌లు, ఇతర ఉపరితలాల్ని శుభ్రం చేయండి. ఇది ఇంటిని క్రిమిసంహారక చేయడమే కాకుండా బొద్దింకలు లోపలికి రాకుండా నిరోధిస్తుంది.

బాత్రూమ్‌లు, వంటగదుల్ని ఎప్పటికప్పుడూ శుభ్రం చేస్తూ ఉండండి. మురికిగా ఉండే వాతావరణాన్ని బొద్దింకలు ఎక్కువగా ఇష్టపడతాయి.