ఎండల తీవ్రత.. మీ వాహనం కింద ప్రాణం ఉండొచ్చు.. ఒక్క నిమిషం గమనించండి

భానుడి భగభగలకు మనుషులే కాకుండా మూగజీవాలు కూడా విలవిలలాడుతున్నాయి. మండుతున్న ఎండల నుండి ఉపశమనం పొందడానికి కుక్కలు, పిల్లులు వంటి జంతువులు నీడ కోసం ఆగి ఉన్న కార్లు, ఇతర వాహనాల కింద ఆశ్రయం పొందుతుంటాయి. వాహనం కింద ఉండే చల్లదనం కోసం అవి అక్కడ గాఢ నిద్రలో ఉండవచ్చు. ఈ క్రమంలో వాహనదారులు తమ పనిలో తాముండి గమనించకుండా బండిని స్టార్ట్ చేసి ముందుకు తీయడం వల్ల ఆ మూగజీవాలు చక్రాల కింద పడి ప్రాణాలు కోల్పోయే ప్రమాదం ఉంది.
ప్రతి వాహనదారుడు బండిని కదిలించే ముందు కేవలం ఒక్క నిమిషం కేటాయించి కింద ఏవైనా జంతువులు ఉన్నాయేమో పరిశీలించాలని జంతు ప్రేమికులు విజ్ఞప్తి చేస్తున్నారు. ముఖ్యంగా టైర్ల దగ్గర లేదా ఇంజిన్ కింద భాగంలో చిన్న పిల్లలు, పిల్లులు దాక్కునే అవకాశం ఉంటుంది. బండిని స్టార్ట్ చేసే ముందు ఒక్కసారి హారన్ కొట్టినా లేదా బండి చుట్టూ తిరిగి చూసినా ఆ శబ్దానికి అవి బయటకు వచ్చేస్తాయి. మనం చేసే ఈ చిన్న ప్రయత్నం ఒక మూగజీవి ప్రాణాన్ని కాపాడుతుందని మర్చిపోకూడదు.
కేవలం వాహనాల వద్దే కాకుండా, ఆరుబయట ఎండలో తిరిగే పక్షుల పరిస్థితి కూడా ప్రస్తుతం దయనీయంగా ఉంది. చెరువులు, కుంటలు ఎండిపోవడంతో దాహాన్ని తీర్చుకోవడానికి పక్షులు అల్లాడిపోతున్నాయి. ఇంటి మిద్దెలపై, కిటికీల దగ్గర లేదా బాల్కనీలలో చిన్న పాత్రల్లో నీటిని, గుప్పెడు గింజలను ఏర్పాటు చేస్తే అవి సేద తీరుతాయి. అపార్ట్మెంట్లలో ఉండేవారు కూడా తమకు వీలైన చోట పక్షుల కోసం నీటి వసతి కల్పిస్తే పర్యావరణ సమతుల్యతకు తోడ్పడిన వారవుతారు.
ఎండ తీవ్రత పెరుగుతున్న కొద్దీ మూగజీవాలకు ఆహారం కంటే నీటి అవసరమే ఎక్కువగా ఉంటుంది. మన చుట్టూ ఉండే కుక్కలకు, పక్షులకు మనం అందించే కొంచెం నీడ, నీరు వాటికి పునర్జన్మను ఇస్తాయి. మానవత్వంతో ఆలోచించి ప్రతి ఒక్కరూ ఈ జాగ్రత్తలు పాటిస్తే ఎన్నో జీవాల అకాల మరణాలను అరికట్టవచ్చు. ప్రకృతిలో భాగమైన ఈ ప్రాణులను కాపాడుకోవడం మనందరి కనీస బాధ్యతగా గుర్తించాలి.