టార్గెట్ నారా లోకేష్...మంగళగిరిపై ఫుల్ ఫోకస్

అసెంబ్లీ ఎన్నికలపై ఇప్పటినుంచే నజర్ పెట్టిన ఏపీ ముఖ్యమంత్రి వైఎస్ జగన్ దూకుడు పెంచారు. తాజాగా టీడీపీ జాతీయ ప్రధాన కార్యదర్శి నారా లోకేష్ పోటీకి సిద్ధమైన గుంటూరు జిల్లా మంగళగిరి నియోజకవర్గంపైనా ఫోకస్ పెట్టినట్లు కనిపిస్తోంది.  టార్గెట్ 175గా ముందుకు సాగుతున్నారు.. వచ్చే ఎన్నికలకు ఇప్పటి నుంచే గ్రౌండ్ ప్రిపేర్ చేసుకుంటున్నారు. ఈ క్రమంలో ప్రతిపక్షంపై ఫోకస్ పెట్టారు. టీడీపీ అధినేత చంద్రబాబు నియోజకవర్గం కుప్పంలో జెండా ఎగరేయాలని భావిస్తున్నారు. ఆ దిశగా నియోజకవర్గానికి ప్రత్యేకంగా నిధులు కూడా కేటాయించిన సంగతి తెలిసిందే. మంగళగిరి నియోజకవర్గానికి చెందిన టీడీపీ ముఖ్య నేత గంజి చిరంజీవిని వైఎస్సార్‌సీపీలో చేర్చుకోగా.. ఆయనకు చేనేత విభాగం పదవి కూడా అప్పగించారు.

తాజాగా మంగళగిరి నియోజవర్గానికి రూ.137.11 కోట్లు విడుదల చేసింది ప్రభుత్వం. ఈ విషయాన్ని స్థానిక ఎమ్మెల్యే ఆళ్ల రామకృష్ణారెడ్డి ట్విట్టర్ ద్వారా తెలియజేశారు. తన నియోజకవర్గానికి రూ.137.11 కోట్లు విడుదల చేసినట్లు తెలిపారు. ముఖ్యమంత్రి వైఎస్ జగన్‌కు ఆర్కే ధన్యవాదాలు తెలిపారు. సీసీ, బీటీ రోడ్లు.. సీసీ డ్రెయిన్లు, రోడ్ల విస్తరణ వంటి పనుల కోసం ఈ నిధులు కేటాయించినట్లు జీవీలో పేర్కొన్నారు.

ఇటు కుప్పంకు కూడా ఇటీవల రూ.66 కోట్లు మంజూరు చేశారు. చెప్పిన వారానికే ఆ నిధుల్ని మంజూరు చేశారు. కుప్పం మున్సిపాలిటీకి రూ.66 కోట్లు మంజూరు చేస్తూ ప్రభుత్వం జీవో విడుదల చేసిన సంగతి తెలిసిందే. నియోజకవర్గంలో ప్రధానంగా తాగునీటి కోసం నూతనంగా బోర్లు, పైప్‌ లైన్లు, సిమెంట్‌ రోడ్లు, డ్రైనేజీ కాలువలు, దళవాయి, మురుగునీటి కాలువలు, కమ్యూనిటీ భవనాల నిర్మాణం, అంగన్‌వాడీ, కొత్తపల్లె చెరువు కట్ట వద్ద పార్కు అభివృద్ధి, చెరువు నుంచి పట్టణానికి నీటి సరఫరా కోసం పైప్‌లైన్ల ఏర్పాటుకు ఈ నిధులను వినియోగించనున్నారు. 25 వార్డుల్లో అభివృద్ధి పనుల కోసం రూ.67 కోట్లకు గతంలో ప్రతిపాదనలు పంపగా.. నిధులు మంజూరు చేస్తూ ప్రభుత్వం ఉత్తర్వులు ఇచ్చింది. మొత్తానికి అటు చంద్రబాబు, ఇటు లోకేష్‌లను ప్రభుత్వం టార్గెట్ చేసినట్లు కనిపిస్తోంది.