ఖర్చులు తగ్గించుకొంటనే భవిష్యత్తు: అమెజాన్ బాస్ జెఫ్ బెజోస్

ముంచుకొస్తున్న ఆర్థిక మాంధ్యం నేపథ్యంలో ఖర్చులు తగ్గించుకొంటనే మంచిందని ప్రజలకు అమెజాన్ బాస్ జెఫ్ బెజోస్ కీలక సూచనలు చేశారు. వాస్తవానికి ఇదో హెచ్చరిక లాంటిది. ఖర్చులు, నిల్వల గురించి చిట్కాలు చెప్పారు. ముఖ్యంగా హాలిడే సీజన్‌లో దుబారా ఖర్చులు తగ్గించుకోవాలని, వీలైనంత ఎక్కువగా నగదు నిల్వ ఉంచుకోవాలని ప్రజలకు పిలుపునిచ్చారు బెజోస్. ఇటీవల సీఎన్ఎన్ తో ఇంటర్వ్యూలో బెజోస్ ఈ వ్యాఖ్యలు చేశారు. ముఖ్యంగా అమెరికా పౌరులు.. రిఫ్రిజరేటర్లు, కొత్త కొత్త బ్రాండ్ల విలువైన కార్లు, టీవీలు వంటివి కొనడం తగ్గించుకోవాలని చెప్పారు. ఆర్థిక పరిస్థితులు రోజురోజుకు మందగిస్తున్న తరుణంలో బెజోస్ ఈ వ్యాఖ్యలు చేశారు. ఆర్థిక మాంద్యం సంకేతాలు బయటికి కనిపిస్తున్న తరుణంలో.. దాని నుంచి బయటపడేందుకు సిద్ధం కావాలని అన్నారు.

''మీకు పెద్ద స్క్రీన్ ఉన్న టీవీ కొనాలని ఆశ కలగొచ్చు. కానీ ఆ కోరికను తగ్గించుకుంటే మంచిది. ఆ నగదును మీ దగ్గరే ఉంచుకోండి. తర్వాత ఏం జరుగుతుందో చూడండి. రిఫ్రిజరేటర్, కారు ఇలా ఏదైనా కావొచ్చు. అన్నింటికీ ఇదే వర్తిస్తుంది.'' అని బెజోస్ చెప్పారు. ఇంకా చిన్న చిన్న బిజినెస్‌లు చేసుకునేవారికి కూడా బెజోస్ సలహా ఇచ్చారు. కొత్త వాటిపై ఇన్వెస్ట్‌మెంట్లను తగ్గించుకొని, వాటిని నగదు రూపంలోకి మలుచుకోవాలని అన్నారు. హోప్ ఫర్ ది బెస్ట్, ప్రిపేర్ ఫర్ ది వరస్ట్ అనే సామెతను ఈ సందర్భంగా చెప్పి ప్రజలను జాగ్రత్తగా ఉండాలని సూచించారు బెజోస్.

మరోవైపు ఇదే సందర్భంలో బెజోస్ కీలక వ్యాఖ్యలు చేశారు. తన సంపదలో పెద్ద మొత్తం అంటే ఎక్కువ భాగం డొనేషన్లే చేస్తానని ప్రకటించారు. ఇది వాతావరణ మార్పులు లేదా సామాజిక, రాజకీయ వివక్షకు గురవుతున్న వారి కోసం కేటాయిస్తానని చెప్పారు. బ్లూమ్‌బెర్గ్ బిలియనీర్స్ ఇండెక్స్ ప్రకారం బెజోస్ సంపద 124 బిలియన్ డాలర్లు ఉంది. అంటే భారత కరెన్సీలో ఇది రూ.10 లక్షల కోట్లకుపైనే. దీంట్లో ఎక్కువ భాగం దానం చేస్తానని ప్రకటించారు బెజోస్. అంటే వివిధ రూపాల్లో మొత్తంగా లక్షల కోట్ల మేర డొనేషన్లు ఇస్తారన్న మాట.

ఆండీ జాస్సీకి అమెజాన్ సీఈఓ పదవిని ఇచ్చి బెజోస్.. ప్రస్తుతం ఈ- కామర్స్ సంస్థకు ఎగ్జిక్యూటివ్ ఛైర్మన్ హోదాలో ఉన్నారు. ఇటీవల ట్విట్టర్, మెటాలో ఉద్యోగులను తొలగించిన తర్వాత.. అమెజాన్ కూడా పెద్ద ఎత్తున ఉద్యోగుల తొలగింపు ప్రక్రియ చేపట్టింది. ఈ సంఖ్య 10 వేలకుపైనే ఉంది. పెరుగుతున్న ద్రవ్యోల్బణంతో ఆర్థిక మాంద్యం భయాలు పెరుగుతున్న నేపథ్యంలో.. ఖర్చులను తగ్గించుకోవడం కోసం ఉద్యోగులను తగ్గించుకోవడం తప్పట్లేదని చాలా కంపెనీలు చెబుతున్నాయి. ఈ నేపథ్యంలోనే ఉద్యోగులను తగ్గించుకుంటూ.. కొత్తగా నియామకాలను కూడా నిలిపివేశాయి.