కొనుగోలు సీజన్లు వస్తున్న నేపథ్యంలో....బంగారు ధర తగ్గేనా

భారతీయుల గురించి ప్రత్యేకగా చెప్పనవసరం లేదు. పండగల సీజన్‌లో, పెళ్లిళ్లు ఇతర శుభకార్యాల సమయంలో బంగారం ఎక్కువగా కొంటుంటారు. ముఖ్యంగా మహిళలు అలంకరణగా బంగారు, వెండి ఆభరణాలు వాడుతుంటారు. అందుకే ఇటీవలి పండగ సీజన్‌లో బంగారానికి మస్తు డిమాండ్ నెలకొంది. ఆ సమయంలో భారీగా గోల్డ్ కొనుగోలు చేశారు. రేట్లు కూడా అప్పుడు చాలా తక్కువగా ఉన్నాయి. కానీ ఇప్పుడు మళ్లీ పెళ్లిళ్ల సీజన్ నడుస్తోంది. ఇదే సమయంలో అంతర్జాతీయంగా ప్రతికూల సంకేతాల నడుమ బంగారం, వెండి ధరలు గరిష్టాలకు చేరాయి. మరి చూడాలి రానున్న రోజుల్లో తగ్గుతాయో? మరింత పెరుగుతాయో? ఫెడ్ ఏ నిర్ణయం తీసుకుంటుందో?

రికార్డు గరిష్టాలకు చేరిన బంగారం, వెండి ధరలు కాస్త తగ్గుముఖం పడుతున్నాయి. ప్రస్తుతం అంతర్జాతీయ మార్కెట్‌లో స్పాట్ గోల్డ్ ధర ఔన్సుకు 1751 డాలర్లు పలుకుతోంది. ఇటీవలి కాలంలో ఇది 1800 డాలర్లకు చేరువైంది. ఇక స్పాట్ సిల్వర్ ఔన్సుకు 20.97 డాలర్ల వద్ద ఉంది. నాలుగైదు రోజుల క్రితం ఇది ఏకంగా 22 డాలర్లపైనే ట్రేడయింది. అయితే.. రూపాయి విలువ మాత్రం మరోసారి పతనం అవుతూ వస్తోంది. ప్రస్తుతం డాలర్‌తో పోలిస్తే రూపాయి మారకం విలువ రూ.81.66 వద్ద కొనసాగుతోంది. డాలర్ ర్యాలీతో ఈ పరిస్థితులు కనిపిస్తున్నాయి. అక్కడ ద్రవ్యోల్బణం తగ్గుతున్నా ఫెడ్ వడ్డీ రేట్ల పెంపుపై తగ్గేదే లేదని ఇటీవల ఫెడరల్ రిజర్వ్ ప్రకటించారు. దీంతో డాలర్‌ పెరుగుతూనే ఉంది. అప్పుడు బంగారాన్ని సురక్షితమైన పెట్టుబడిగా భావించరు. దీంతో బాండ్ల ప్రతిఫలాలు పెరుగుతాయి. ఇన్వెస్టర్లు అటువైపు మళ్లుతారు.

ఇక మన బులియన్ మార్కెట్‌లో బంగారం, వెండి ధరలు గత కొద్ది కాలంలో రికార్డు గరిష్టాలకు చేరాయి. బంగారం ధర ఏకంగా 7 నెలల గరిష్టాన్ని తాకిన విషయం తెలిసిందే. అయితే ఇవాళ మాత్రం కాస్త తగ్గింది. హైదరాబాద్‌లో 22 క్యారెట్లకు చెందిన 10 గ్రాముల బంగారం ధర రూ.10 మేర తగ్గింది. ప్రస్తుతం తులం బంగారం రేటు రూ.48 వేల 740 వద్ద ఉంది. ఇక 24 క్యారెట్లకు చెందిన తులం బంగారం మాత్రం రూ.10 తగ్గి 53 వేల 170కి చేరింది. దిల్లీలో 22 క్యారెట్లకు చెందిన తులం బంగారం రూ.48, 890 వద్ద ఉండగా.. 24 క్యారెట్లకు చెందిన తులం గోల్డ్ రేటు రూ.53,340 వద్ద ట్రేడవుతోంది.

ఇక వెండి విషయానికి వస్తే రేటు ఏ మాత్రం మారలేదు. గత 2 రోజుల్లో రూ.1500 మేర పతనమైనప్పటికీ ప్రస్తుతం రేట్లు స్థిరంగా ఉన్నాయి. హైదరాబాద్‌లో కిలో వెండి రేటు ప్రస్తుతం రూ.67 వేల వద్ద ఉంది. దిల్లీ మార్కెట్లో మాత్రం వెండి ధరలు చాలా కనిష్టాల వద్ద ఉన్నాయి. అక్కడ ప్రస్తుతం రూ.300 తగ్గి కిలోకు రూ.60 వేల 900 వద్ద ఉంది. ఇది ప్రాంతాలను బట్టి మారుతుంటాయి. అక్కడి పన్నులు, పరిస్థితులకు అనుగుణంగా రేట్లు వేర్వేరుగా ఉంటాయి. కొనేటప్పుడు చూసుకొని కొనుక్కుంటే మంచిది.